އެއާ އަސްތާނާއާ އެކު ރާއްޖެ އިޝްތިހާރު ކުރުމުގެ ކެމްޕެއިނެއް ފަށައިފި

ކަޒަކިސްތާނުގެ ގައުމީ އެއާލައިން އެއާ އަސްތާނާއާ އެކު ރާއްޖެ އިޝްތިހާރު ކުރުމުގެ ކެމްޕެއިނެއް މޯލްޑިވްސް މާކެޓިން އެންޑް ޕަބްލިކް ރިލޭޝަންސް (އެމްއެމްޕީއާރްސީ) އިން ފަށައިފި އެވެ.

އެމްއެމްޕީއާރްސީން ބުނީ މިފަދަ ކެމްޕެއިނެއް ހިންގުމުގެ ބޭނުމަކީ ކަޒަކިސްތާނުގައި ރާއްޖޭގެ ޓޫރިޒަމް ޕްރޮމޯޓު ކުރަން އިތުރު މަސައްކަތްތަކެއް ކުރުން ކަމަށެވެ. މި ކެމްޕެއިންގެ ތެރެއިން ތަފާތު އެކި ކަހަލަ ހަރަކާތްތައް ހިންގުމަށް ހަމަޖެހިފައިވެ އެވެ.

މި ކެމްޕެއިންގެ ތެރެއިން ފެމިލިއަރައިޒޭޝަން ޓްރިޕްތަކާއި ޓްރެވަލް އޭޖެންސީތަކަށް ހާއްސަކޮށް ވެބިނާތައް ބޭއްވުމަށް ހަމަޖެހިފައިވެ އެވެ. މި ކެމްޕެއިންގެ ތެރެއިން މިދިޔަ ބުދަ ދުވަހު ކަޒަކިސްތާނުގެ ޓްރެވަލް އޭޖެންޓުން ރާއްޖެއަށް އައިސްފައިވެ އެވެ.

އެއާ އަސްތާނާ އިން ރާއްޖެއަށް އެންމެ ފުރަތަމަ ދަތުރު ފެށީ މިދިޔަ އަހަރުގެ ޑިސެމްބަރުގަ އެވެ. ކޮވިޑަށް ފަހު ބޯޑަރު ހުޅުވާލި ފަހުން ކަޒަކިސްތާނު ހިމެނެނީ ރާއްޖެ އަށް އެންމެ ގިނައިން ޓޫރިސްޓުން އަންނަ ފަސް ގައުމުގެ ތެރޭގަ އެވެ. އެ ގައުމުން މިހާތަނަށް 14،000 ޓޫރިސްޓުން އައިސްފައިވެ އެވެ.