އިންޑިއާގައި އައިފޯން 12 އުފައްދަން ފަށައިފި

ސްމާޓްފޯންގެ ދެވަނަ އަށް އެންމެ ބޮޑު މާކެޓެއް އޮތް އިންޑިއާގައި އައިފޯން 12 އުފެއްދުމުގެ މަސައްކަތް ފަށާފައިވާ ކަމަށް އެޕަލް އިން ބުނެފި އެވެ

އެ ކުންފުނިން މިކަން ބުރާސްފަތި ދުވަހު އިއުލާންކޮށް ބުނެފައި "އިންޑިއާގެ ކަސްޓަމަރުންނަށް ހާއްސަކޮށްގެން އައިފޯން 12 އެ ގައުމުގައި އުފައްދަން ފަށަނީ ވަރަށް އުފަލާ އެކީގައި" ކަމަށެވެ ނަމަވެސް މި މަސައްކަތް ކުރިއަށް ގެންދަނީ ކޮން ކުންފުންޏަކާ ގުޅިގެން ކަމެއް އެޕަލް އިން ހާމައެއް ނުކުރެ އެވެ.

ބައެއް މީޑިއާތަކުން ބުނެފައިވާ ގޮތުގައި އެ މަސައްކަތް ކުރަނީ އެޕަލް ޓައިވާންގެ ކޮންޓްރެކްޓަރު ފޮކްސްއިންނެވެ.

އެ ކުންފުނިން މިދިޔަ އަހަރު އިންޑިއާގައި އައިފޯން 11 އުފެއްދުމުގެ މަސައްކަތް ވެސް ފަށާފައިވެ އެވެ. އައިފޯންގެ މަސައްކަތް އެންމެ ފުރަތަމަ އެޕަލް އިންޑިއާގައި ފެށީ 2017 ގަ އެވެ.

ފޮކްސްކޮންގެ އިންޑިއާގެ ޕްލާންޓް ހިންގަނީ ޓަމިލް ނާޑޫ ސްޓޭޓްގެ ދެކުނުގަ އެވެ.

އައިފޯން 12 އިންޑިއާގައި އުފައްދަން ފެށުމާ ގުޅިގެން އެކަމަށް މަރުހަބާ ވިދާޅުވެ އިންޑިއާގެ އިލެކްޓްރޯނިކްސް އެންޑް އިންފޮމޭޝަން ޓެކްނޮލޮޖީ މިނިސްޓަރު ރަވީ ޝަންކަރް ޕްރަސާދު ކުރެއްވި ޓްވީޓެއްގައި ވިދާޅުވީ މޮބައިލް ފޯނު އުފެއްދުމުގެ ހަބަކަށް އިންޑިއާ ހަދަން ކުރާ މަސައްކަތަށް ބައިނަލްއަގްވާމީ ސަމާލުކަން ލިބުމަކީ ވަރަށް ބޮޑު ކުރިއެރުމެއް ކަމަށެވެ. އަދި މީގެ ސަބަބުން އެ ގައުމުގައި އެތަކެއް ވަޒީފާތަކެއް އުފެދިގެން ދާނެ ކަމަށް ވިދާޅުވި އެވެ.

އައިފޯން 12 އަކީ އެޕަލް އިން އެންމެ ފަހުން ނެރުނު މޮޑެލެވެ. މި ސީރީޒްގައި ހިމެނީ އައިފޯން 12، އައިފޯން 12 މިނީ، އައިފޯން 12 ޕްރޯ އަދި އައިފޯން 12 ޕްރޯ މެކްސް އެވެ.

މި ސީރީޒްގެ ފޯނު ވެސް އިންޑިއާގައި އުފައްދަނީ ފޮކްސްކޮން އިން ކަމަށް މީޑިއާތަކުން ބުންޏަކަސް އެކަމާ ބެހޭ ގޮތުން އެ ކުންފުނިން މިހާތަނަށް އެއްވެސް އެއްޗެއް ނުބުނެ އެވެ.

އައިފޯން އުފެއްދުމުގެ މަސައްކަތް އެޕަލް އިން އިންޑިއާގައި ފަށާފައި މި ވަނީ ކުރިން އެ މަސައްކަތް އެންމެ ފުޅާކޮށް ކުރަމުން ދިޔަ ޗައިނާ އާއި އެމެރިކާއާ ދެމެދު އުފެދިފައިވާ ނުތަނަސްވަސްކަމާ ހެދި ވިޔަފާރީގެ ގުޅުންތައް ވަރަށް ބޮޑަށް ހީނަރުވެފައިވާތީ އެވެ. އެހެންވެ މިހާރު އެޕަލްގެ އަމާޒަކީ ޗައިނާ އަށް ބަރޯސާވުން ވީހާ ވެސް ބޮޑަށް ކުޑަކުރުމެވެ.

ބައެއް ރިޕޯޓްތައް ބުނާގޮތުން ޗައިނާގައި ފޮކްސްކޮން އިން ކުރަމުން އަންނަ މަސައްކަތުގެ ތެރެއިން އައިޕެޑާއި މެކްބުކް އުދެއްދުން ވެސް މިދިޔަ ނޮވެމްބަރު ވަނީ ވިއެޓްނާމަށް ބަދަލުކޮށްފަ އެވެ. އަދި ވަރަށް އަވަހަށް އިންޑިއާގައި އައިޕެޑް އުފެއްދުމުގެ މަސައްކަތް ވެސް ފަށާނެ ކަމަށް މީޑިއާތަކުން ބުނެފައިވެ އެވެ.