ކޮވިޑް-19: ކްލަސްޓާތަކާ އެއްވެސް ގުޅުމެއް ނެތް އިތުރު ހަ މީހަކު ފުވައްމުލަކުން ޕޮޒިޓިވްވެއްޖެ

ފުވައްމުލަކުން މިހާތަނަށް ފެނިފައިވާ ކްލަސްޓާއާ އެއްވެސް ގުޅުމެއް ނެތް އިތުރު ހަ މީހަކު ކޮވިޑް-19 އަށް ޕޮޒިޓިވްވެއްޖެ އެވެ.

ހެލްތު އިމަޖެންސީ އޮޕަރޭޝަން ސެންޓަރު (އެޗްއީއޯސީ) އިން ރޭ ބޭއްވި މީޑިއާ ބްރީފިންގައި އެ ސެންޓަރުގެ ތަރުޖަމާނު ޑރ. ނަޒްލާ ރަފީގު ވިދާޅުވީ އެއްވެސް ކޭހަކާ ގުޅުމެއް ނެތް ކޭހެއް މިދިޔަ ހޮނިހިރު ދުވަހު ފުވައްމުލަކުން ފެނުނު ކަމަށެވެ. އެ ކޭހާ ގުޅުން ހުރި އިތުރު ކޭސްތަކެއް އިއްޔެ ފެނުނު ކަމަށް ވެސް ޑރ. ނަޒްލާ ވިދާޅުވި އެވެ.

އާބާދީގައި 10،000 އަށް ވުރެ ގިނަ މީހުން އުޅޭ ފުވައްމުލައް އޮތީ ކޮމިއުނިޓީ ސްޕްރެޑެއް އޮތުމުން މޮނިޓަރިންގެ ހާލަތަށް ގެންގޮސްފަ އެވެ. ފުވައްމުލަކުގެ އިތުރުން މިހާރު މޮނިޓަރިންގެ ހާލަތުގައި އޮތީ އައްޑު އާއި މ. ކޮޅުފުއްޓެވެ.

ފުވައްމުލަކު ހޮސްޕިޓަލްގެ މެނޭޖަރު އަހުމަދު ސައީދު މިއަދު ވިދާޅުވީ، އެ ސިޓީގައި މިވަގުތު ހިމެނޭ ދެ ކްލަސްޓާއާ ގުޅުމެއް ނެތް ކްލަސްޓާއެއް ފެނުނީ ރޯގާގެ އަލާމަތްތައް ހުރި އުމުރުން 13 އަހަރުގެ ކުއްޖަކު ފްލޫ ކްލިނިކަށް ދެއްކުމުން ނެގި ސާމްޕަލް ޕޮޒިޓިވްވުމުން ކަމަށެވެ. އޭގެ ފަހުން ހެދި ކޮންޓެކްޓް ޓްރޭސިންގެ ތެރެއިން ފުވައްމުލަކުން އިތުރު ތިން މީހަކު ކޮވިޑަށް ޕޮޒިޓިވްވި ކަމަށާއި މާލެ ދަތުރުކުރި "ހަވާސް ބޯޓު" ގައި ހިމެނޭ ދެ މީހަކު ވެސް ޕޮޒިޓިވްވެފައިވާ ކަމަށް ސައީދު ވިދާޅުވި އެވެ..

"އެ ކުއްޖާގެ ކޮންޓެކްޓުންގެ ތެރޭގައި ހިމެނޭ މީހަކު އެ ބޯޓުގައި މާލެ ދަތުރުކުރުމުން އެޗްޕީއޭ އިން އެ ބޯޓު މޮނިޓަރިންގެ ހާލަތައް ގެނެސް، ނުވަ މީހެއްގެ ސާމްޕަލް ނެގި. އޭގެ ތެރެއިން ދެ މީހަކު ޕޮޒިޓިވްވީ،" އޭނާ ވިދާޅުވި އެވެ.

އެ ސިޓީގައި މިހާރު ހިމެނޭ ކްލަސްޓާތަކަކީ ޔޫއޭއީން ގޮސް ކަރަންޓީންގައި ހުރި މީހަކު ޕޮޒިޓިވްވެ، އޭނާގެ ކޮންޓެކްޓުންގެ ކްލަސްޓާ އާއި އައްޑޫން ދިޔަ މީހަކު ޕޮޒިޓިވްވުމުން އުފެދުނު ކްލަސްޓާ އާއި މިހާރު ފެނިފައިވާ އާ ކްލަސްޓާ އެވެ.

ސައީދު ވިދާޅުވިގޮތުގައި، ކޮވިޑަށް ޕޮޒިޓިވްވެފައިވާ 14 މީހަކު ފުރަތަމަ ކްލަސްޓާގައި، ދެވަނަ ކްލަސްޓާގައި 13 މީހަކު ހިމެނެ އެވެ. އަދި ތިން ވަނަ ކްލަސްޓާގައި ހިމެނޭ ހަތަރު މީހަކު އެ ސިޓީގައި އުޅޭ ކަމަށް ވެސް ވިދާޅުވި އެވެ.

ޖުމްލަ 38 މީހަކު ފުވައްމުލަކުން ކޮވިޑަށް ޕޮޒިޓިވްވެފައިވާ އިރު، ހަތް މީހަކު މިހާތަނަށް ރަނގަޅުވެފައި ވެ އެވެ. މިވަގުތު ބައްޔަށް ފަރުވާ ހޯދަނީ 31 މީހެކެވެ.

ކޮންޓެކްޓުންގެ ގޮތުގައި ފާހަގަކުރެވި، ކަރަންޓީން ކުރި މީހުންގެ ތެރެއިން 46 މީހަކު ދޫކޮށްފައިވާ ކަމަށް ވެސް ސައީދު ވިދާޅުވި އެވެ. ކޮންޓެކްޓުންގެ ތެރޭގައި 846 މީހަކު ހިމެނޭ އިރު އޭގެ ތެރޭގައި ހައި ރިސްކު 71 މީހަކު ހިމެނެ އެވެ.

"ހައި ރިސްކު ކަމަށް ފާހަގަ ކުރެވިފައިވާ މީހުންގެ ތެރެއިން އެކަކުގެ ފަރާތުން ބަލީގެ އަލާމަތްތައް ފެނޭ،" ސައީދު ވިދާޅުވި އެވެ.

މިދިޔަ ހޮނިހިރު ދުވަހުގެ ހަވީރު 6 އިން އިއްޔެގެ ހަވީރު 6 އަށް ކޮވިޑަށް އިތުރު 157 މީހަކު ޕޮޒިޓިވްވެފައިވާ އޭގެ ތެރެއިން 20 މީހަކަށް އެ ބަލި ޖެހުނީ އެކި ރަށްރަށުންނެވެ.. ބައްޔަށް ޕޮޒިޓިވްވެފައިވާ މީހުންގެ ޖުމްލަ އަދަދު 18،000 އަށް ވުރެ މަތި އިރު 60 މީހަކު މި ބަލި ޖެހިގެން މަރުވެފައި ވެ އެވެ.