އޮމިކްރޯންގެ ރާޅު ރާއްޖެ އަށް ވެސް އެތައް ގުނައެއް ހަލުއިވެދާނެ: އެޗްޕީއޭ

ދުނިޔޭގައި ހަލުއިކަމާއެކު ފެތުރެމުންދާ ކޮވިޑު-19 ގެ އާ ވޭރިއެންޓް، އޮމިކްރޯންގެ ނުރައްކާ މުޅި ރާއްޖެ އަށް ފެތުރިދާނެ ކަމަށާއި މި މަހުގެ ފަހުކޮޅު ކޭސްތައް ވަރަށް ބޮޑަށް އިތުރުވެގެންދާނެ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން މިއަދު ބުނެފި އެވެ.

އެ އެޖެންސީގައި ބޭއްވި ނޫސްވެރިންގެ ބައްދަލުވުމުގައި ތަރުޖަމާނު ޑރ. ނަޒްލާ ރަފީގު ވިދާޅުވީ މީގެ ކުރިން ފެނުނު ޑެލްޓާ ވޭރިއެންޓަށް ވުރެ އޮމިކްރޮން ވޭރިއެންޓް ފެތުރޭ މިންވަރާއި ބަލި ޖައްސާ ވަރު ހަލުއި ކަމަށެވެ.

މި މަހުގެ ފަހުކޮޅު ނުވަތަ އަންނަ މަހުގެ ކުރީކޮޅު މުޅި ރާއްޖެއިން ކޮވިޑުގެ ޕީކެއް ފެންނާނެ ކަމަށް ޕްރޮޖެކްޝަންތަކުން ދައްކާ ކަމަށް އޭނާ ވިދާޅުވި އެވެ.

އެއް ދުވަހުގެ ތެރޭގައި ކޮވިޑަށް ޕޮޒިޓިވްވާ މީހުންގެ އަދަދު މިދިޔަ އަހަރު އިތުރުވީ، އޭރު އެންމެ ހަލުއިކޮށް ފެތުރުނު ޑެލްޓާ ވޭރިއެންޓްގެ ސަބަބުންނެވެ. ރަށްރަށުގެ ހާލަތު އޭރު އެއްވަރެއްގައި ހިފެހެއްޓިފައި އޮތްއިރު، އެންމެ ގޯސްކޮށް އުޅުނީ މާލެ، ހުޅުމާލެ އަދި ވިލިނގިލީގަ އެވެ.

އެކަމަކު އޮމިކްރޮން ވޭރިއެންޓް ފެނުނު ފަހުން، ރަށްރަށުގެ ކޭސްތަކާ އެއްކޮށް މުޅި ރާއްޖޭގެ ހާލަތު ވެސް ގޯހެވެ. ޕީކް ފެންނާނީ ވެސް މާލޭގައި އެކަނި ނޫން ކަމަށާއި ރަށްރަށުގައި ވެސް ކޮވިޑަށް ޕޮޒިޓިވްވާ މީހުންގެ އަދަދު އިތުރުވާނެ ކަމަށް ޑރ. ނަޒްލާ ވިދާޅުވި އެވެ.

ޑެލްޓާ ވޭރިއެންޓް ފެތުރުނުއިރު މާލެއިން ރަށްރަށަށް ދަތުރުކުރުމުގައި އޮތީ ހަރުކަށި ފިޔަވަޅުތައް އަޅައިފަ އެވެ. އާބާދީގެ ބޮޑު ބައެއް ވެކްސިން ފުރިހަމަކޮށްފައިވުމުން ފިޔަވަޅުތަކަށް ލުއި ދިނުމުން، މުޅި ރާއްޖެއިން އޭގެ އަސަރު ފެންނާނެ ކަމަށް ވެސް އޭނާ ވިދާޅުވި އެވެ.

ޑރ. ނަޒްލާ ވިދާޅުވީ ކޮމިއުނިޓީ ތެރޭގައި އޮމިކްރޮން ވޭރިއެންޓް އުޅޭކަން ޖީން ސީކުއެންސް އިން ކަށަވަރުވެފައިވާ ކަމަށެވެ. އިއްޔެ ލިބުނު ނަތީޖާއިން ހަތް ދިވެއްސަކު އަދި އޭގެ ކުރީ ހަފްތާގެ ނަތީޖާއިން އެއް ދިވެއްސަކު އޮމިކްރޮނަށް ޕޮޒިޓިވްވެފައިވެ އެވެ. އެއީ މާލެއިން ހަތަރު މީހަކާއި ކ. މާފުށިން ތިނެއް އަދި ދ. ކުޑަހުވަދޫން މީހެކެވެ.

މިހާތަނަށް 19 ޓޫރިސްޓެއް އޮމިކްރޮނަށް ޕޮޒިޓިވްވެފައިވެ އެވެ.

"މާނައަކީ އެއަށްވުރެ އިތުރު ކޭސްތައް އުޅެމުންދާނެ ކަމަށް. އޮމިކްރޮން ފެތުރެމުންދާ ގައުމުތަކަށް ބަލާއިރު މިއީ ވަރަށް ހަލުއިކޮށް ފެތުރޭ އެއްޗެއް. ކޭސްތައް ޑަބަލްވާ ނިސްބަތް، އެހެން ވޭރިއެންޓުތަކާ ބަލާފައި ވަރަށް މަތީގައި އުޅެނީ. އެއް ދުވަހާ ތިން ދުވަހާ ދޭތެރޭގައި ގާތްގަނޑަކަށް ކޭސްތައް ޑަބަލްވަމުންދާކަށް އޮމިކްރޮން ގިނައިން އުޅޭ ގައުމުތަކުގައި ފާހަގަކުރެވިފައިވޭ،" ޑރ. ނަޒްލާ ވިދާޅުވި އެވެ.

ހެލްތުގެ ސްޓޭޓް މިނިސްޓަރު ޑރ. ޝާހު މާހިރު ވިދާޅުވީ ކޮވިޑަށް ޕޮޒިޓިވްވާ މީހުންނާއި ހޮސްޕިޓަލުގައި އެޑްމިޓުކޮށްގެން ފަރުވާ ދޭ މީހުންގެ އަދަދު މަޑުމަޑުން އިތުރުވަމުން ގޮސް ފްލޫ ކްލިނިކްތަކަށް ބާރުބޮޑުވެފައިވާ ކަމަށެވެ. އެހެންވެ، ކުރިއަށް އޮތް ދެ ހަފްތާއަކީ ގޮންޖެހުންތައް ދިމާވާނެ ދުވަސްތަކެއް ކަމަށް އޭނާ ވިދާޅުވި އެވެ.

"މިކަމަށް އިތުރަށް ތައްޔާރުވެ، ހުށިޔާރުވެ ރައްކާތެރިވުމަށްޓަކައި އަޅުގަނޑުމެން ކުރަންޖެހިފައިވާ ރައްކާތެރިކަމުގެ ހުރިހާ ކަމެއް ކުރުމަކީ މިހާރު ވަރަށް މުހިއްމު ކަމެއް....މި އަންނަ ސާޖާ ގުޅިގެން އެޗްއީއޯސީގެ އޮޕަރޭޝަންތައް އިތުރަށް ހަރުދަނާކުރުމަށް ބައިވަރު މަސައްކަތްތަކެއް މި ދަނީ ކުރެވެނުން،" ޑރ. ޝާހު ވިދާޅުވި އެވެ.

އޭނާ ވިދާޅުވި ގޮތުގައި ކޮވިޑުގެ ނަމްބަރުތައް ދަށްވާން ފެށުމުން އެޗްއީއޯސީގެ އޮޕަރޭޝަން ކުޑަކޮށްލުމަށްފަހު، ސިއްހީ ހިދުމަތްތެރިންނާއި އިތުރު ވޮލެންޓިއަރުން ހޯދަމުން އަންނަ ކަމަށެވެ.

ކޮވިޑުގެ އެތައް ރާޅަކަށްފަހު އެ ބަލީގައި ރާއްޖޭގެ ހާލަތު ރަނގަޅުވެ، އިގުތިސޯދު ވަނީ ކުރިއަށް ޖެހިފަ އެވެ. ޑރ. ޝާހު ވިދާޅުވި އެ ކާމިޔާބު ލިބުނީ އެންމެން ގުޅިގެން ކުރި މަސައްކަތުން ކަމަށާއި ރާއްޖެއަކީ ކޭސްތައް މެނޭޖްކުރުމުގައި އެހެން ގައުމުތަކަށް ނަމޫނާއެއް ކަމަށް ވެސް އޭނާ ވިދާޅުވި އެވެ.

ދެން އަންނަ ސާޖު ކޮންޓްރޯލް ކުރުމަށް ސަރުކާރާއި އާއްމުންގެ އެއްބާރުލުން ވަރަށް މުހިއްމުކަން ފާހަގަކުރައްވައި ޑރ. ޝާހު ވަނީ ބަލިން ރައްކާތެރިވުމަށް އަޅާފައިވާ ފިޔަވަޅުތަކަށް ބޯލެނބުމަށް އިލްތިމާސްކުރައްވައިފަ އެވެ.

ކޮވިޑު ފެތުރޭ މިންވަރު ފާއިތުވި 4-5 މަސް ދުވަހު ވަރަށް ބޮޑަށް ކޮންޓްރޯލްގައި އޮތުމަށްފަހު، ހަފްތާއެއްގެ ތެރޭގައި އެ ބަލި ޖެހޭ މީހުންގެ އަދަދު އަނެއްކާ ވެސް 1،000 އިން މައްޗަށް އަރާފައިވެ އެވެ. އެއާއެކު، އެޗްޕީއޭއިން ވަނީ މާލެ ސަރަހައްދުން ރަށްރަށަށް ދަތުރުކުރުމުގައި ފިޔަވަޅުތައް ހަރުކަށިކޮށްފަ އެވެ.