ކޮވިޑްގައި ކުއްލިއަކަށް އާންމުވި ޒޫމް އިތުރަށް ފުޅާކުރަނީ

އޮންލައިންކޮށް ބާއްވާ ބައްދަލުވުންތަކަށް މިހާރު އެންމެ ގިނަ ބަޔަކު ބޭނުންކުރާ އެއް ޕްލެޓްފޯމް ކަމަށްވާ ޒޫމްގެ ރިސާޗް އެންޑް ޑިވެލޮޕްމަންޓް ސެންޓަރެއް ސިންގަޕޫރްގައި ހަދަން ނިންމައިފި އެވެ.

މިކަން ބުދަ ދުވަހު އިއުލާންކޮށް އެމެރިކާގެ ޒޫމް ވީޑިއޯ ކޮމިއުނިކޭޝަން އިން ބުނީ އެ ސެންޓަރުން ޒޫމްގެ މަސައްކަތްތައް ފުޅާކުރާނެ ކަމަށެވެ. ސިންގަޕޫރުގައި ޑޭޓާ ސެންޓަރެއް ޒޫމުން ހުޅުވީ މިދިޔަ އޮގަސްޓް މަހުގެ ތެރޭގަ އެވެ. އަދި އެއީ ދެކުނު އޭޝިއާގައި ޒޫމުން ހެދި ފުރަތަމަ ޑޭޓާ ސެންޓަރު ވެސް މެ އެވެ

މި ސެންޓަރުގެ މަސައްކަތް އިތުރަށް ފުޅާކޮށް ރިސާޗް އެންޑް ޑިވެލޮޕްމަންޓް ސެންޓަރެއް ހެދުމުން ގިނަ އަދަދެއްގެ ޓެކް އިންޖިނިއަރުންނަށް ވަޒީފާގެ ފުރުސަތު ވެސް ހުޅުވިގެން ދާނެ ކަމަށް ޒޫމުން ބުންޏެވެ.

"އަހަރެމެން މިހާރު ވެސް މި ތިބީ ގިނަ އަދަދެއްގެ މުވައްޒަފުން ނަގަން ތައްޔާރަށް. ބޭނުމަކީ ވީހާ ވެސް ބޮޑަށް ޒޫމްގެ ހިދުމަތް ފުޅާކުރުން،" އެ ކުންފުނީގެ ޕްރޮޑަކްޓް އެންޑް އިންޖިނިއަރިންގެ ޕްރެޒިޑެންޓް ވެލްޗަމީ ސަންކަރްލިންގަމް ވިދާޅުވި އެވެ.

އޭނާ ވިދާޅުވި ގޮތުގައި ރިސާޗް އެންޑް ޑިވެލޮޕްމަންޓް ބިނާކުރާނެ ރަނގަޅު ލޮކޭޝަނެއް ނިންމުމުގެ ކަންކަން މިހާރު އަންނަނީ ކުރެވެމުންނެވެ.

ޒޫމްގެ ރިސާޗް އެންޑް ޑިވެލޮމަންޓް ސެންޓަރުތައް މިހާރު ހުރި ގައުމުތަކުގެ ތެރޭގައި އެމެރިކާ އާއި އޭޝިއާގެ އެންމެ އާބާދީ ބޮޑު ދެ ގައުމު ކަމަށްވާ ޗައިނާ އާއި އިންޑިއާ ހިމެނެ އެވެ.

ޒޫމަކީ މީގެ 11 އަހަރު ކުރިން 2009 ގއި ވުޖޫދަށް އައި ހިދުމަތެކެވެ. އެކަމަކު މީގެ މަގުބޫލުކަން ކުއްލިއަކަށް ބޮޑުވީ ކޮވިޑް-19 ގެ ބަލިމަޑުކަމާ އެކީގަ އެވެ. ސަބަބަކީ ބަލީގެ ހާލަތު އެންމެ ގޯސްވި ދުވަސްވަރު ގައުމުތަކުން ލޮކްޑައުންތައް އިއުލާންކުރުމުން، ގިނަ ބަޔަކު ތެރޭގައި ބަންދުވެގެން ތިބެން ޖެހުމުން އޮންލައިން ބައްދަލުވުންތަކަށް ޒޫމް ބޭނުންކުރާ މިންވަރު އެތައް ގުނައެއް އުފުލިގެން ދިއުމެވެ.

އެމެރިކާގެ ސެން ޖޯޒްގައި ހެޑްކުއާޓަރު ހުންނަ ޒޫމްގައި ވަޒީފާ އަދާކުރާ މުވައްޒަފުންގެ އަދަދު 2،500 އަށް ވުރެ ގިނަ އެވެ.