ފަސް ލައްކަ ވަނަ ޓޫރިސްޓާ އެކު އުންމީދީ މަންޒަރެއް

ކޮވިޑް-19 ގެ ސަބަބުން ރާއްޖޭގެ ޓޫރިޒަމަށް އައި ބޮޑު ހީނަރުކަމަށް ފަހު، ލަފާކުރި ވަރަށް ވުރެ އަވަހަށް ޓޫރިޒަމް ރަނގަޅުވާން ފަށައި މި އަހަރުގެ ފަސް ލައްކަ ވަނަ ޓޫރިސްޓު އައުން މިއަދު ކުލަ ގަދަކޮށް ފާހަގަކޮށްފި އެވެ.

އަހަރުގެ ފަސް ލައްކަ ވަނަ ޓޫރިސްޓަށްވީ އެމިރޭޓްސް އެއާލައިނުން ބައިވެރިޔާ އެކު އައި ޖަރުމަނު އަންހެނެއް ކަމަށްވާ އުމުރުން 33 އަހަރުގެ ކިއާސްޓިން މެޑަލީން އެވެ.

މެޑަލީން އަކީ ފަސް ލައްކަ ވަނަ ޓޫރިސްޓުކަން އިމިގްރޭޝަނުން ކައުންޓަރުން އެނގުމާ އެކު އޭނާގެ ކަރުގައި ސޭޝްއަކާއި މާފައްޗެއް އެޅުވި އެވެ. އަދި އެއާޕޯޓުގެ އެރައިވަލް ގޭޓުން ބޭރަށް ނުކުތުމާ އެކު ބޮޑެބެރާ އެކު މަރުހަބާ ކިޔާފައިވެ އެވެ. ބޮޑުބެރު ލަވަ އަށް މެޑަލީން އާއި އޭނާގެ ބައިވެރިޔާ ނަށައި މަޖަލުގައި ބައިވެރިވި އެވެ.

ޓޫރިޒަމް މިނިސްޓްރީގެ ފަރާތުން މޯލްޑިވްސް ވޭވްގެ ލިޔެލާ ކަލެކްޝަން ސީރީޒްގެ ގަޑިއެއް މެޑަލީން އަށް ހަދިޔާކުރި އެވެ. މި ހަވާލުކޮށްދެއްވީ ޑެޕިއުޓީ މިނިސްޓަރު ޑރ. ނައުޝާދު މުހައްމަދެވެ.

މީގެ އިތުރުން އެމްއެމްޕީއާރްސީ އާއި އެމްއޭސީއެލް އިން ވެސް ވަނީ ހަދިޔާ ދީފަ އެވެ. އަދި އެލައިޑް އިންޝުއަރެންސުން ރާއްޖެއަށް އަލަށް ތައާރަފް ކޮށްފައިވާ ކޮވިޑް-19 އިންޝުއަރެންސް ކަމަށްވާ "އެލައިޑް އިންބައުންޑް"ގެ ވައުޗަރެއް ވެސް ކިއާސްޓިން އަށް ހަދިޔާކޮށްފައިވެ އެވެ.

އެންމެ ހާއްސަ ހަދިޔާއަކަށް ދިނީ ކޮކޯ ބޮޑު ހިތީގެ އައިލެންޑް ވިލާއެއްގައި ހަތް ރޭ ހުރުމުގެ ޗުއްޓީއެކެވެ. މި ހަދިޔާގެ ވައުޗަރު ހަވާލުކުރެއްވީ ކޮކޯ ބޮޑު ހިތީގެ އޮޕަރޭޝަންސް މެނޭޖަރު މުހައްމަދު ޝިހާމެވެ.

ފަސް ލައްކަ ޓޫރިސްޓުން މި އަހަރު ހަމަވުމަކީ ބޮޑު ކާމިޔާބީއެއްކަން ފާހަގަކޮށް ޓޫރިޒަމް މިނިސްޓަރު ޑރ. އަބްދުالله މައުސޫމް ވިދާޅުވީ، އަންދާޒާކުރި ތާރީހަށް ވުރެ ކުރިން ފަސް ލައްކަ ޓޫރިސްޓުން ހަމަވީ ޓޫރިޒަމް އިންޑަސްޓްރީން އަޒުމާ އެކު ކުރި ހިތްވަރުން ކަމަށެވެ.

"ދިވެހިރާއްޖެ ސަލާމަތީ ރައްކާތެރި މަންޒިލެއްގެ ގޮތުގައި ދުނިޔެއަށް މަޝްހޫރުކޮށްލި މަންޒިލަކަށް ބަދަލުކޮށް ދިނުމުގައި، ހެލްތް ޕްރޮޓެކްޝަން އޭޖެންސީ އާއި ހެލްތް ޕްރޮފެޝަނަލުންނާއި، ސަރުކާރުގެ އިދާރާތަކުގެ އިތުރުން އެހެނިހެން މުއައްސަސާތަކާއި ވޮލަންޓިއަރުން ކޮށްދެއްވި އިހުލާސްތެރި ބުރަ މަސައްކަތްތަކަށް ވަރަށް ޝުކުރެއް ރައްދުކުރަން،" މިނިސްޓަރު ވިދާޅުވި އެވެ.

އެމްއެމްޕީއާރްސީގެ މެނޭޖިން ޑިރެކްޓަރު ތޮއްޔިބު މުހައްމަދު ވިދާޅުވި ގޮތުގައި ކޮވިޑް-19 ގެ ސަބަބުން އޮތް ކަމުގެ ތެރޭގައި ވެސް މިކަހަލަ ބޮޑު ކާމިޔާބީތަކެއް ހާސިލްވުމީ ވަރަށް ބޮޑު އުފަލެކެވެ.

މިދިޔަ ހޮނިހިރު ދުވަހު ވަނީ ކޮވިޑް-19 ފެތުރޭތީ ބޯޑަރު ބަންދުކޮށް އަލުން ހުޅުވި ފަހުން ރާއްޖެ އަށް އެއްލައްކަ ޓޫރިސްޓުން އައުން ވެސް ފާހަގަކޮށްފަ އެވެ.

ކޮވިޑާ ހެދި ޓޫރިޒަމް ދާއިރާ ހުއްޓުމަކަށް އައިސްފައި އޮތުމަށް ފަހު އަލުން ފަށައި މިހާރު އަމާޒު ހިފާފައިވަނީ އަންނަ އަހަރު 1.5 މިލިއަން ޓޫރިސްޓުން ރާއްޖެއަށް ގެނައުމަށެވެ.