އެއް މިލިއަން ޓޫރިސްޓުން ހަމަކުރެވުނީ އެންމެންގެ ބުރަ މަސައްކަތުން: ތޮއްޔިބު

ރާއްޖެއަށް މި އަހަރު އެއް މިލިއަން ޓޫރިސްޓުން ހަމަކުރުމުގެ ކާމިޔާބީ އަކީ ޓޫރިޒަމް ދާއިރާގެ ހުރިހާ އެންމެން ގުޅިގެން ކުރި ބުރަ މަސައްކަތުގެ ނަތީޖާ ކަމަށް އެމްއެމްޕީއާރްސީގެ މެނޭޖިން ޑިރެކްޓަރު ތޮއްޔިބު މުހައްމަދު ވިދާޅުވެއްޖެ އެވެ.

މިލިއަން ޓޫރިސްޓުން މާދަމާ ހަމަވާތީ އެކަމާ ގުޅޭ ގޮތުން އެމްއެމްޕީއާރްސީން ނެރުނު ބަޔާނެއްގައި ތޮއްޔިބް ވިދާޅުވީ އެއް މިލިއަން ޓޫރިސްޓުން ހަމަވިޔަސް އެހާ ހިސާބުން މަސައްކަތް ނިމުނީ ނޫން ކަމަށެވެ. ދުނިޔޭގެ އެންމެ މަގްބޫލު އެއް މަންޒިލްގެ ގޮތުގައި ރާއްޖެ ދެމެހެއްޓުމަށް ރާއްޖެ އިޝްތިހާރުކުމުގެ މަސައްކަތް އިތުރަށް ހަރުދަނާކުރަން ޖެހޭ ކަމަށް އޭނާ ވިދާޅުވި އެވެ.

"އަޅުގަނޑުމެން މި ކާމިޔާބީ ފާހަގަކުރާއިރު، އަޅުގަނޑުމެންގެ މަސައްކަތް މިހާ ހިސާބުން ނިމުނީކީ ނޫން. ދުނިޔޭގެ ލީޑިން ޑެސްޓިނޭޝަންގެ ގޮތުގައި ދެމިހުރުމަށް، މި ވާދަވެރި ޒަމާނުގައި މަންޒިލްގެ ލަނޑުދަނޑިތައް ހާސިލްކުރުމަށް އަޅުގަނޑުމެން ކުރަމުންދާ މަސައްކަތްތައް އިތުރަށް ހަރުދަނާކޮށް، ހިތްވަރާ އެކު ކުރިއަށް ދިއުމުގެ މަސައްކަތް ކުރަމުން ގެންދަންޖެހޭ،" އޭނާ ވިދާޅުވި އެވެ.

ސަރުކާރުގެ އަމާޒަކީ މިއަހަރު 1.6 މިލިއަން ޓޫރިސްޓުން ގެނައުމެވެ. މިހާރު އަންނަ ވަރަށް ޓޫރިސްޓުން އަންނަ ނަމަ، މި އަމާޒު ވަރަށް ފަސޭހައިން ހާސިލުވާނެ ކަމަށް ޓޫރިޒަމް މިނިސްޓަރު ޑރ. އަބްދުﷲ މައުސޫމް ވަނީ ވިދާޅުވެފަ އެވެ.

އެމްއެމްޕީއާރުސީން ވޭތުވެދިޔަ އަހަރު ދުނިޔޭގެ ފެންވަރުގައި ރާއްޖެ އިޝްތިހާރުކުރުމަށް ވަނީ 22 މާކެޓެއްގައި 260 ހަރަކާތެއް ހިންގައިފަ އެވެ. މި އަހަރު ވެސް އެ ކުންފުނިން އަންނަނީ ދުނިޔޭގެ އެކި ކަންކޮޅުތަކުގައި ގިނަ ހަރަކާތްތަކެއް ހިންގަމުންނެވެ.

ރާއްޖެ އަށް މިހާތަނަށް އެންމެ ގިނަ ޓޫރިސްޓުން އައިސްފައި ވަނީ 2019 ވަނަ އަހަރު އެވެ. އެ އަހަރު 1.7 މިލިއަން ޓޫރިސްޓުން ޒިޔާރަތްކުރި އެވެ. މި އަހަރުގެ މިހާތަނަށް ރާއްޖެއަށް ވަނީ 970،000 ޓޫރިސްޓުން އައިސްފަ އެވެ. މި މަހު އެވްރެޖްކޮށް ދުވާލަކު 4،500 ޓޫރިސްޓުން ރާއްޖެ އަށް އާދެ އެވެ.

މި އަހަރުގެ މިހާތަނަށް ރާއްޖެއަށް އެންމެ ގިނަ ޓޫރިސްޓުން އައީ އިންޑިއާއިންނެވެ. އެ ގައުމުން 137،000 ޓޫރިސްޓުން އައިސްފައިވެ އެވެ. ދެވަނަ އެންމެ ގިނައިން ޓޫރިސްޓުން އައި އިނގިރޭސި ވިލާތުގެ ޓޫރިސްޓުންގެ އަދަދަކީ 110،000 އެވެ. ތިން ވަނައަށް އެންމެ ގިނަ ޓޫރިސްޓުން އައީ ރަޝިޔާއިންނެވެ. އެ ގައުމުން 103،00 ޓޫރިސްޓުން ރާއްޖެ އައިސްފައިވެ އެވެ.