މެރިން އެކްސްޕޯގެ މެއިން ސްޕޮންސަރަކަށް މިފަހަރު އަލްޝާލީ

މި މަހު ބާއްވާ މޯލްޑިވްސް މެރިން އެކްސްޕޯގެ މެއިން ސްޕޮންސަރަކަށް އަލްޝާލީ މެރިން ހަމަޖައްސައިފި އެވެ.

ރާއްޖޭގައި ބާއްވާ، ކަނޑުގެ އުޅަނދުފަހަރުގެ އެންމެ ބޮޑު އެކްސްޕޯ، "މޯލްޑިވްސް މެރިން އެކްސްޕޯ" މި އަހަރުގެ އެޑިޝަން ބާއްވާނީ މި މަހުގެ 20-22 އަށެވެ.

ރާއްޖޭގެ ކަނޑުގެ އުޅަނދުފަހަރު ވިއްކުމުގައި މަޝްހޫރު ކުންފުނި، އަލް ޝާލީ ވަނީ ވޭތިވެދިޔަ އަހަރުތަކުގައި ވެސް މެރިން އެކްސްޕޯގެ ޕާޓްނަރެއްގެ ގޮތުގައި ބައިވެރިވެފަ އެވެ. އަދި މި އެކްސްޕޯގެ ތެރެއިން ކަނޑުގެ ދަތުރުފަތުރު ކުރުމުގައި ގެންގުޅޭ އާ އުފެއްދުންތައް ވެސް ދައްކާލައިފައިވެ އެވެ. އެގޮތުން މަސްވެރިކަން ކުރުމަށް ހާއްސަ ލޯންޗެއް މިދިޔަ އަހަރު އެ ކުންފުނިން މި އެކްސްޕޯގައި ދައްކާލައިފައި ވެ އެވެ.

މި އެކްޒިބިޝަންގައި މައިގަނޑު ތިން ކަމެއް ކުރިއަށް ގެންދާނެ އެވެ. އޭގެތެރޭގައި އޮޑިޓޯރިއަމް ހަރަކާތާއި ނެޓްވޯކް ޒޯންގެ އިތުރުން އެކްސްޕޯ ހޯލްގެ ނަމުގައި ބާއްވާ ހަރަކާތެއް ހިމެނެ އެވެ.

ނޭޝަނަލް ބޯޓިން އެސޯސިއޭޝަނުން މި އެކްސްޕޯ ކުރިއަށް ގެންދާތާ މިހާރު ހަ އަހަރުވެފައިވާއިރު، މިއީ ބޯޓުތަކާއި ކަނޑުގެ އުޅަނދުފަހަރު، ބައިނަލްއަގްވާމީ ޕްލެޓްފޯމެއްގައި ދައްކައިލުމަށް ލިބޭ ފުރުސަތެކެވެ. އެގޮތުން، އުޅަނދުފަހަރު ބަންނަ މީހުންނާއި ސަޕްލަޔަރުންނާއި ހިދުމަތް ފޯރުކޮށްދޭ މީހުންގެ އިތުރުން ބޮޑެތި ކުންފުނިތަކުންނާއި ވިޔަފާރިވެރިންނާ ގުޅުން ބަދަހި ކުރުމަށް މި އެކްސްޕޯގެ ތެރެއިން ފުރުސަތު ލިބޭނެ އެވެ.