އަހުސަންގެ މަރު: ދައުވާ ލިބޭ ދެ މީހުންނަށް އާ ވަކީލުން ހޯދަން އެންމެ ފަހުގެ ފުރުސަތު

މީގެ ނުވަ އަހަރު ކުރިން މާލޭގައި ތޫނު އެއްޗެހިން ހަމަލާދީ މަރައިލި އަހުސަން ބަޝީރުގެ މަރުގެ މައްސަލައިގެ އިސްތިއުނާފު ޝަރީއަތުގައި ދައުވާ ލިބޭ ދެ މީހުންނަށް އާ ވަކީލުން ހަމަޖައްސަން އެންމެ ފަހުގެ ފުރުސަތު ހައި ކޯޓުން މިއަދު ދީފި އެވެ.

މަޖީދީ މަގާއި އަލިކިލެގެފާނު މަގާ ގުޅޭ ސަރަހައްދުގައި އޭޕްރީލް، 2011 ގައި ތޫނު އެއްޗެހިން ހަމަލާދީ ސ. ހިތަދޫ ވަރުދީގޭ އަހުސަން މަރައިލި މައްސަލައިގައި ދައުވާ ލިބޭ ގ. ކޯޒީ އިބްރާހިމް ޝަހުމް އާދަމާއި މއ. ވީނަސްތަރި ހަސަން ޝިމާޒަށް ދައުލަތުން ކުރި ދައުވާ ސާބިތު ނުވާ ކަމަށް ކްރިމިނަލް ކޯޓުން 2014 ވަނަ އަހަރު ވަނީ ހުކުމްކޮށްފަ އެވެ.

އެ މައްސަލަ ދައުލަތުން ހައި ކޯޓުގައި އިސްތިއުނާފު ކުރުމުން މީގެ ކުރިން އަޑުއެހުންތަކެއް ކުރިއަށް ގެންދިއުމަށް ފަހު، މިއަދު އަޑުއެހުމުގައި ޝަހުމާއި ޝިމާޒްގެ ވަކީލުން ވަނީ އެ މައްސަލަ އިން ތަނާޒުލް ވެފަ އެވެ. އާ ވަކީލުން ހަމަޖައްސަން ބޭނުންވަނީ ކިހިނެތްތޯ ފަނޑިޔާރުން ސުވާލު ކުރެއްވުމުން ޝަހުމާއި ޝިމާޒް ވެސް ބުނީ ވަކީލަކު ހަމަޖައްސާނީ އަމިއްލަ އަށް ކަމަށެވެ. އެކަމަށް އެކަށީގެންވާ ވަގުތު ދޭން އެ ދެ މީހުން އެދުނެވެ.

ފަނޑިޔާރުންގެ ބެންޗުން ވިދާޅުވީ، ވަކީލުން މައްސަލަ ދޫކޮށްލިކަން ކުރިން ވެސް އަންގާފައިވާނެ ކަމަށާއި އެހެންވެ، އާ ވަކީލުން ހޯދަން ކުރީ ކޮން މަސައްކަތެއް ތޯ ބެންޗުން ސުވާލު ކުރެއްވި އެވެ. އެހެން މައްސަލަައެއްގައި ޖަލުގައި ހުރި ޝަހުމް ބުނީ އޭނާ އަށް ވަކީލަކު ހޯދަން އާއިލާ އިން މަސައްކަތް ކުރަމުންދާ ކަމަށެވެ. ބަންދުން މިނިވަން ވެފައި ހުރި ޝިމާޒް ބުނީ ވަކީލަކާ ވާހަކަ ދައްކަމުންދާ ކަމަށާއި އަދި މުޅިން ހަމަނުޖެހޭ ކަމަށެވެ.

ދައުލަތުގެ ޚަރަދުގައި ވަކީލަކު ހަމަޖެއްސުމުގެ ފުރުސަތު އެ ބާވަތުގެ މައްސަލަތަކުގައި އޮންނާތީ، އެ ފުރުސަތު ބޭނުންވޭތޯ ބެންޗުން ސުވާލު ކުރެއްވުމުން ޝަހުމާއި ޝިމާޒް ވެސް ބުނީ އެ ފުރުސަތު ބޭނުން ނުވާ ކަމަށެވެ. ކުރިއެކޭ އެއްގޮތަށް، އަމިއްލަ އަށް ވަކީލަކު ހަމަޖައްސާނެ ކަމަށް އެ ދެ މީހުން ބުންޏެވެ.

ފަނޑިޔާރުން ވިދާޅުވީ، ވަކީލުން ހަމަޖައްސަން އަބަދުވެސް ފުރުސަތު އޮންނާނެ ކަމަށާއި އެ މައްސަލައިގައި އެ އެކަށީގެންވާ މުއްދަތެއް ކުރިން ދީފައިވާ ކަމަށެވެ. އެ މައްސަލަ ހައި ކޯޓުގައި އޮންނަތާ ހަތަރު އަހަރު ވެފައިވާ ކަން ފާހަގަ ކުރައްވައި، ފަނޑިޔާރުން ވިދާޅުވީ ޝަހުމާއި ޝިމާޒަށް އާ ވަކީލުން ހަމަޖައްސަން އިތުރަށް ދެވޭނީ 10 ދުވަހުގެ މުއްދަތެއް ކަމަށެވެ. އެ މުއްދަތުގައި ވަކީލުން ހަމަނުޖައްސައިފި ނަމަ އެ ދެ މީހުން އަމިއްލައަށް ޖަވާބުދާރީވާން ޖެހޭނެ ކަމަށް ބެންޗުން ވިދާޅުވި އެވެ.

ފަނޑިޔާރުން ވިދާޅުވީ ދެން އޮންނަ އަޑުއެހުން 10 ދުވަސް ފަހުން ތާވަލް ކުރާނެ ކަމަށާއި އެހާތަނަށް ވަކީލުން ހަމަނުޖެހުނަސް، ޝަރީއަތް ކުރިއަށް ގެންދަވާނެ ކަމަށެވެ.

އެ މައްސަލަ ބައްލަވަނީ ފަނޑިޔާރު މުހައްމަދު ނިޔާޒާއި ފަނޑިޔާރު ޝުއައިބު ހުސައިން ޒަކަރިއްޔާގެ އިތުރުން ފަނޑިޔާރު ހުސައިން ޝަހީދެވެ. ރިޔާސަތު ބަލަހައްޓަވަނީ ފަނޑިޔާރު ނިޔާޒެވެ.

ޝަހުމް މިހާރު ޖަލުގައި ހުރީ 2010 ވަނަ އަހަރު ސޯޝަލް ސެންޓަރު ކައިރީގައި އޮތް ފުޓްބޯޅަ ދަނޑެއްގައި ހިންގި މާރާމާރީއެއްގައި މ. ބިއުޓީފްލާވާ މުހައްމަދު ހުސައިން މަރުވި މައްސަލައިގައި ޓެރަރިޒަމްގެ ކުށް ސާބިތުވެގެން އުމުރު ދުވަހުގެ ޖަލު ހުކުމެއް ތަންފީޒު ކުރުމަށެވެ.