ކޮމާޝަލް ލޯ ގެ މާސްޓާސް ޑިގްރީއެއް ވިލާ ކޮލެޖުން ތައާރަފުކޮށްފި

އިނގިރޭސި ވިލާތުގެ ޔުނިވާސިޓީ އޮފް ދި ވެސްޓް އޮފް އިންގްލަންޑް (ޔޫވީ) ގެ ކޮމާޝަލް ލޯ (އެލްއެލްއެމް) ގެ މާސްޓާސް ޑިގްރީއެއް ވިލާ ކޮލެޖުން މިއަދު ތައާރަފު ކޮށްފި އެވެ.

އެ ކޮލެޖުގައި ބޭއްވި ރަސްމިއްޔާތެއްގައި މި ކޯސް ތައާރަފު ކޮށްދެއްވީ އުއްތަމަ ފަނޑިޔާރު މުއުތަސިމް އަދުނާނެވެ. މި ކޯހުގެ ކިޔެވުން ފަށާނީ އަންނަ އަހަރުގެ ޖެނުއަރީ މަހު އެވެ.

އަންނަ އަހަރުގެ ޖެނުއަރީ މަހު ފަށާ ކޯސް ތައާރަފު ކޮށްދެއްވުމަށް ފަހު، އުއްތަމަ ފަނޑިޔާރު ވިދާޅުވީ ގާނޫނީ ދާއިރާގައި މަސައްކަތް ކުރައްވަން ވާނީ އަދުލު އިންސާފު ގާއިމު ކުރުމުގެ ނިޔަތުގައި ކަމަށެވެ.

"ގާނޫނީ ދާއިރާގައި މަސައްކަތްކުރާ ބޭފުޅުން، މަސައްކަތް ކުރައްވަން ވާނީ ހީވާގި ކަމާ އެކު ކެރިގެން، އަދުލު އިންސާފުކޮށް އަދި އޮޅުންތަކެއް ނެތި،" މުއުތަސިމް ވިދާޅުވި އެވެ.

މި ކޯސް ތައާރަފްކުރަން ނިންމީ، ގާނޫނީ ދާއިރާގައި މަސައްކަތްކުރާ މީހުންނާއި އެ ދާއިރާގައި ކިޔަވާ ދަރިއަވަރުންނަށް އަމާޒުކޮށްގެން ވިލާ ކޮލެޖުން މިދިޔަ އަހަރު ކުރިއަށް ގެންދިޔަ ސާވޭއެއްގެ ނަތީޖާ އަށް ބަލާފައި ކަމަށް އެ ކޮލެޖުން ބުންޏެވެ. އެ ސާވޭގައި ބައިވެރިވި 90 ޕަސެންޓަށް ވުރެ ގިނަ މީހުން ބުނީ މި ދާއިރާއާ ގުޅޭ ގޮތުން އިތުރަށް ތައުލީމު ހާސިލްކުރަން ބޭނުންވާ ކަމަށާއި ކިޔަވަން ބޭނުންވަނީ ރާއްޖެއިން ކަމަށެވެ. ބޭރުގެ ގައުމެއްގެ ޔުނިވާސިޓީއަކުން ކިޔަވައިދޭ ވިޔަފާރިއާ ގުޅުން ހުރި ކޯހެއް ގިނަ މީހުން އިހްތިޔާރު ކުރި ކަމަށް ވިލާ ކޮލެޖުން ބުނެ އެވެ.

ގާނޫނީ ދާއިރާ އިން ނުވަތަ މި ކޯހާ ގުޅޭ އެހެން ދާއިރާއަކުން ވެސް ޑިގްރީއެއް ހާސިލްކޮށްފައިވާ ކޮންމެ މީހަކަށް މި ކޯހަށް ހުށަހެޅޭނެ އެވެ.

މި ކޯސް ފަރުމާކޮށްފައި ވަނީ ދިރާސާ ކުރުމަށް ހާއްސަ އިސްކަމެއް ދީގެނެވެ. ތިން ސެމިސްޓާއަކަށް ބަހާލައިގެން ކޯހުގެ ކިޔަވުން ކުރިއަށް ގެންދާ އިރު، ފަހު ސެމިސްޓާ ހާއްސަ ކޮށްފައި ވާނީ ދަރިވަރުންގެ ޑިޒަޓޭޝަން ފުރިހަމަކުރަން ކަމަށް ވިލާ ކޮލެޖުން ބުންޏެވެ. އަހަރެއްގެ ތެރޭގައި މި ކޯސް ފުރިހަމަކުރެވޭނެ އެވެ.

މި ކޯހަށް ކުރިމަތިލުމުގެ ފުރުސަތު މިހާރު ވަނީ ހުޅުވާލައިފަ އެވެ. ކޯހަށް ހުށަހެޅުމުގެ އެންމެ ފަހު ތާރީހަކީ އަންނަ މަހުގެ 19 ވަނަ ދުވަހެވެ.

އެކި ދާއިރާތަކުން ސެޓްފިކެޓް ލެވެލް ކޯސްތަކުން ފެށިގެން މާސްޓާސް ޑިގްރީ ކޯސްތަކާ ހަމައަށް 109 ކޯހެއް ވިލާ ކޮލެޖުން މިހާރު އަންނަނީ ކިޔަވައި ދެމުންނެވެ.