މަތީ ވަނަަތައް ހާސިލްކުރި ދަރިވަރުންނަށް ވިލާ ކޮލެޖުން އެވޯޑް ދީފި

ވިލާ ކޮލެޖުން ގްރެޖުއޭޓުވި އެންމެ މޮޅު ދަރިވަރުންނަށް ސްޓޫޑަންޓް އެޗީވްމަންޓް އެވޯޑް ދީފި އެވެ.

ދަރުބާރުގޭގައި ރޭ ބޭއްވި މި ހަފްލާގައި އެ ކޮލެޖުން ވަނީ ވިލާ ކޮލެޖުގެ ބުކް ޕްރައިޒް އާއި ޑީންސް އެވޯޑް ހާސިލްކުރި 110 ގްރެޖުއޭޓުންނާއި އޭސީސީއޭ ނޭޝަނަލް ރެޒިޑެންޓް ޕްރައިޒް ހާސިލްކުރި 12 ގްރެޖުއޭޓުންނާއި އިންޑަސްޓްރީ ޕްރައިޒް ހާސިލްކުރި 51 ގްރެޗުއޭޓުންނާއި އެ ކޮލެޖުގެ އެންމެ ޝަރަފުވެރި އެވޯޑް ކަމަށްވާ ގާސިމް އިބްރާހިމް އެވޯޑް ފޯ އެކްސެލަންސް ހާސިލްކުރި 23 ގްރެޖުއޭޓުންނަށް ވެސް ވަނީ އެވޯޑް ދީފަ އެވެ.

މި ރަސްމިއްޔާތުގައި ވިލާ ކޮލެޖުގެ ވައިސް ރެކްޓާ ޑރ. އަލީ ނަޖީބު ވިދާޅުވީ އެވޯޑް ހާސިލްކުރި ދަރިވަރުންގެ ތެރޭގައި ޔުނިވާސިޓީ އޮފް ވެސްޓް އިންގްލެންޑާއި ވިލާ ކޮލެޖް ގުޅިގެން ހިންގާ ޕްރޮގްރާމްތަކުގައި ކިޔެވި ގިނަ އަދަދެއްގެ ދަރިވަރުން ހިމެނޭ ކަމަށެވެ. އަދި އެ ކަމަކީ ވިލާ ކޮލެޖުން ކިޔަވާ ދަރިވަރުންނަށް ބޭރުގެ ޔުނިވާސިޓީތަކުގެ ދަރިވަރުންނާ އެއް ހަމައެއްގައި ފައިހަމަކުރެވޭ ކަމުގެ ހެއްކެއްގެ ގޮތުގައި އޭނާ ސިފަ ކުރެއްވި އެވެ.

ޑރ. ނަޖީބު ވިދާޅުވީ ވިލާ ކޮލެޖުން ކިޔަވާ ނިންމާ ދަރިވަރުންނަކީ ވަޒީފާގެ މައިދާނަށް ތައްޔާރު، އަދި ވަޒީފާގެ މައިދާނުގައި ކާމިޔާބު ދަރިވަރުންތަކެއް ކަމަށެވެ.

"އަޅުގަނޑުމެންގެ އެންމެ ފަހުގެ ސާވޭއިން ދައްކާ ގޮތުގައި މި ކޮލެޖުން ކިޔަވާ ނިންމާފައިވާ 90 އިންސައްތަ ގްރެޖުއޭޓުން ވަޒީފާ އަދާކުރޭ. އަދި މި ކޮލެޖުން ގްރެޖުއޭޓުވާ 80 ޕަސެންޓް ދަރިވަރުންނަކީ ކިޔެވުން ފުރިހަމަ ކުރިތާ އަހަރެއްހާ ދުވަހުގެ ތެރޭގައި ވަޒީފާ ލިބިފައި ތިބި ދަރިވަރުން. މި ސާވޭއިން ދައްކަނީ މި ކޮލެޖުން ކިޔެވި 35 އިންސަައްތަ ދަރިވަރުންނަށް މަގާމުގެ ކުރިއެރުން ވެސް ލިބިފައިވާ ކަމަށް އަދި 30 އިންސައްތައަށް ވަޒީފާގެ ކުރިއެރުން ލިބޭނެ ކަމުގެ ފެހި ސިގްނަލް ވެސް ވަނީ ލިބިފަ." އޭނާ ވިދާޅުވި އެވެ.

ނަޖީބު ވިދާޅުވީ އެ ކޮލެޖުން ޕްރޮގުރާމްތައް ޑިޒައިން ކުރަނީ އިންޑަސްޓްރީ ޕާޓްނަރުންނާއި މަޝްވަރާކޮށް ވަޒީފާގެ މައިދާނަށް ބޭނުންވާ ހުނަރުތައް ދެނެގަތުމަށް ފަހު ކަމަށެވެ. އަދި އެ އެވޯޑު ހަފްލާ އަކީ އިންޑަސްޓްރީ ޕާޓްނަރުންނަށް އެ ކޮލެޖުގެ އެންމެ މޮޅު ދަރިވަރުންނާ ބައްދަލުވުމަށް ލިބޭނެ ފުރުސަތެއް ކަމަށާއި އެ ހަފްލާ ބޭއްވުމަށް އިންޑަސްޓްރީ ޕާޓްނަރުން ދެއްވާ ސަޕޯޓް އޭނާ ފާހަގަ ކުރެއްވި އެވެ.

"ސްޓޫޑެންޓް އެޗީވްމަންޓް އެވޯޑް ނައިޓް”އަކީ ވިލާ ކޮލެޖާ ގާތް ގުޅުމެއް ބާއްވަމުންދާ އިންޑަސްޓްރީތަކާއި އެ އިންޑަސްޓްރީތަކާ ގުޅޭ ދާއިރާތަކުން މަތީ ވަނަތައް ހާސިލްކުރާ ދަރިވަރުންގެ ކާމިޔާބީ ފާހަގަ ކުރުމަށް 2021 ވަނަ އަހަރުން ފެށިގެން ބާއްވަމުންދާ ހަފްލާއެކެވެ.