ޔޫޓިއުބުން ކުޑަކުދިންނަށް ބްލޮކްކުރާ ވީޑިއޯތައް ދެން އިތުރުވާނެ

އުމުރާ ނުގުޅޭ ކޮންޓެންޓްތައް ޔޫޓިއުބުން މާ ފަސޭހައިން ފެންނާތީ އަމާޒުވެފައިވާ ފާޑުކިޔުންތަކާ ހެދި އެކަން ހަރުދަނާކޮށް، އުމުރާ ނުގުޅޭ ކޮންޓެންޓް އަމިއްލަ އަށް ދެނެގަނެ އުމުރުން 18 ނުވާ ކުދިންނަށް އެފަދަ ވީޑިއޯ ނުބެލޭ ގޮތަށް ޔޫޓިއުބުން އާ ޓެކްނޮލޮޖީއެއް ބޭނުންކުރަން ނިންމައިފި އެވެ.

ކުޑަކުދިންނާ ނުގުޅޭ ކޮންޓެންޓް ބްލޮކްކުރުމަށް ޔޫޓިއުބުން މިހާރު އަމަލުކުރަނީ ޖީމެއިލުން ޔޫޓިއުބަށް ލޮގިން ވުމުން، އެ އީމެއިލްގައި ބުނާ އުމުރަކަށް ބަލައިގެންނެވެ.

ގޫގުލްގެ ދަށުން ހިންގާ ޔޫޓިއުބުން ބުނި ގޮތުގައި އަލަށް ގެންނަ އެންމެ މުހިއްމު އެއް ބަދަލަކީ އުމުރާ ނުގުޅޭ ވީޑިއޯތައް ބެލުމުގެ ފުރުސަތު ހަނިކޮށް، އުމުރާ ގުޅޭ ގޮތަށް އެ ބޭނުންކުރާ މީހުންނަށް ކޮންޓެންޓް ކަށަވަރުކުރުމެވެ. މި ބަދަލު ގެންނަނީ އާޓިފިޝަލް އިންޓެލިޖެންސް (އޭއައި) ގެ ޓެކްނޮލޮޖީ ބޭނުންކޮށްގެން ޔޫޓިއުބްގެ ރައްކާތެރިކޮށް ވަރުގަދަކުރަން ކުރާ މަސައްކަތުގެ ތެރެއިންނެވެ.

މިކަމާ ގުޅޭ ގޮތުން ޔޫޓިއުބުން ބުނީ އާ ޓެކްނޮލޮޖީގެ އެހީގައި، އެ މީހެއްގެ އުމުރާ ނުގުޅޭ ކޮންޓެންޓަށް ބެލޭ ނަމަ އެކަން ވަގުތުން ހުއްޓުވައި، ދެން އަޅަންޖެހޭ ފިޔަވަޅު އަޅައިދޭނެ ކަމަށެވެ.

ޔޫޓިއުބުން ބުނި ގޮތުގައި އަލަށް އަޅާ ރައްކާތެރިކަމުގެ ފިޔަވަޅުތަކަކީ ޔޫޓިއުބް ބޭނުން ކުރާ 18 އަހަރުން ދަށުގެ ކުޑަކުދިންނާ ގުޅޭ ގޮތުން ބެލެނިވެރިންނާއި ކުޑަކުދިންގެ ހައްގުތަކަށް މަސައްކަތްކުރާ ފަރާތްތަކުން ފާޅުކޮށްފައިވާ ކަންބޮޑުވުންތަކަށް ރިއާޔަތްކޮށް ގެންނަ ބަދަލުތަކެކެވެ.

"އަދި އަހަރެމެން މިކަން ކުރަނީ ކަމާ ގުޅުން ހުރި ދާއިރާގެ ތަޖުރިބާކާރުންގެ ލަފަ އާއި މަޝްވަރާ ވެސް ހޯދައިގެން،" ޔޫޓިއުބުން ބުންޏެވެ. "އަހަރެމެންގެ ޓްރަސްޓް އެންޑް ޕޮލިސީ ޓީމް އަބަދު ވެސް ކަށަވަރުކޮށް ދޭން ބޭނުންވޭ ކަމަކީ ޔޫޓިއުބަކީ ބޭނުންކުރާ މީހުންނަށް ރައްކާތެރި އެއްޗެއްކަން."

ޔޫޓިއުބުން ބުނީ މިފަދަ ފިޔަވަޅުތަކެއް އަޅަނީ އެކި ކަހަލަ ކޮންޓެންޓްތައް އުފައްދައި އެ ޕްލެޓްފޯމް މެދުވެރިކޮށް އާމްދަނީ ހޯދާ މީހުންނަށް ދަތިކުރުމުގެ ގޮތުން ނޫން ކަމަށެވެ. އަދި މިކަމާ ކޮންޓެންޓް ކްރިއޭޓަރުންގެ މެދުގައި ކަންބޮޑުވުމެއް އޮތް ނަމަ އެކަންކަމަށް ވެސް ރިއާޔަތްކުރާނެ ކަމަށް ބުންޏެވެ.

"އެކަމަކު އަހަރެމެން ދޭން ބޭނުންވާ ޔަގީންކަމަކީ ޔޫޓިއުބްގެ ޕޮލިސީތަކާއި ޔޫޓިއުބް ޕާޓްނާ ޕްރޮގްރާމްގެ ބޭނުން އެންމެ އެދެވޭ ގޮތަށް ބޭނުންކުރާ ނަމަ މި ގެންނަ އޭޖް-ރެސްޓްރިކްޝަނުގެ ސަބަބުން އެއްވެސް ބަޔަކަށް ގެއްލުމެއް ނުވާނެކަން." ޔޫޓިއުބުން ބުންޏެވެ.