ފޭސްބުކްގެ މާކް ޒަކަބާގްގެ މިލްކިއްޔާތު 100 ބިލިއަން ޑޮލަރަށް

ފޭސްބުކް ވުޖޫދަށް ގެނެސްގެން ދުނިޔޭގެ އެންމެ މުއްސަނދި މީހުންގެ ލިސްޓުން ޖާގަ ހޯދި އެމެރިކާގެ މާކް ޒަކަބާގްގެ މިލްކިއްޔާތު ވެސް މިހާރު 100 ބިލިއަން ޑޮލަރަށް އަރާފައިވާ ކަމަށް ރިޕޯޓްތައް ބުނެފި އެވެ.

މީޑިއާތަކުން މި ވާހަކަ ދައްކާފައިވަނީ ފޭސްބުކްގެ ދަށުން ހިންގާ އިންސްޓަގްރާމަށް، ޗައިނާގެ ބައިޓްޑާންސްގެ ޓިކްޓޮކާ ދާދި އެއް ކަހަލަ ފީޗާއެއް ކަމަށްވާ "ރީލްސް" ގެނެސް 50 ގައުމަކަށް ތައާރަފުކުރުމާ އެކު، ފޭސްބުކްގެ ހިއްސާގެ އަގު ވެސް އުފުލުމުންނެވެ.

"ރީލްސް" އާ އެކު ފޭސްބުކްގެ ހިއްސާގެ އަގު ބުރާސްފަތި ދުވަހު ހަ ޕަސަންޓަށް ވުރެ މައްޗަށް އުފުލިފައިވެ އެވެ. އަނެއްކޮޅުން އެމެރިކާ ސަރުކާރުން އަންނަނީ އެމެރިކާގައި ޓިކްޓޮކް މަނާކުރުމަށް މަސައްކަތްކުރަމުންނެވެ.

މިއާ އެކު ޒަކަބާގްގެ އަމިއްލަ ތަނަވަސްކަމުގެ މިންވަރު 100 ބިލިއަން ޑޮލަރަށް އަރާފައިވާ އިރު އޭނާ މިހާރު ހިމެނެނީ ދުނިޔޭގެ އެންމެ ބޮޑު މަހުޖަނު އެމެޒޯންގެ ޖެފް ބެޒޯސް އާއި ދެވަނަ އަށް އެންމެ ބޮޑު މަހުޖަނު ބިލް ގޭޓްސްއާ އެކު "ސެންޓިބިލިއަނާ ކުލަބް" ގަ އެވެ.

ކޮވިޑް-19 ގެ ބަލިމަޑުކަމާ ދިމާކޮށް އެމެޒޯން ކަހަލަ ޓެކް ކުންފުނިތަކުގެ އާމްދަނީ މި އަހަރު ބޮޑުތަނުން އުފުލިފައިވާ އިރު، ބުލޫމްބާގުން ބުނާގޮތުން ފޭސްބުކްގެ ދަށުން ހިންގާ މުއާމަލާތްތަކުން ޒަކަބާގްގެ އާމްދަނީ އަށް މި އަހަރުގެ މިހާތަނަށް 22 ބިލިއަން ޑޮލަރު އިތުރުވެފައިވެ އެވެ. އުމުރުން 36 އަހަރުގެ ޒަކަބާގަކީ މިހާރު ވެސް ދުނިޔޭގެ އެންމެ މުއްސަނދި 10 މީހުންގެ ތެރެއިން އެކެކެވެ.

ފޯބްސް އިން އެންމެ ފަހުން އާންމުކޮށްފައިވާ ބިލިއަނަރުންގެ ލިސްޓް ދައްކާ ގޮތުން ޒަކަބާގް އޮތީ 7 ހަތް ވަނައިގަ އެވެ. އެކަމަކު 100 ބިލިއަން ޑޮލަރުގެ މިލްކިއްޔާތާ އެކު އޭނާ އަށް ގަދަ ތިނެކުން ޖާގަ ލިބޭނެ އެވެ.

ބެޒޯސްގެ، 56، ގެ މިލްކިއްޔާތަކީ މިހާރު 185.8 ބިލިއަން ޑޮލަރެވެ. ގޭޓްސް، 64، ގެ މިލްކިއްޔާތު 112.8 ބިލިއަން ޑޮލަރަށް އަރަ އެވެ.