ހޯރަފުށީގައި ފުޅީގައި ފެން ބަންދުކުރާ ޕްލާންޓެއް ހަދަނީ

ހއ. ހޯރަފުށީގައި ފެން ބަންދުކުރާ ޕްލާންޓެއް ބަހައްޓަން ފެނަކަ ކޯޕަރޭޝަނާއި ހޯރަފުށި ކައުންސިލުން އެއްބަސްވެއްޖެ އެވެ.

މިއަދު ބޭއްވި ރަސްމިއްޔާތެއްގައި މި އެއްބަސްވުމުގައި ފެނަކައިގެ ފަރާތުން ސޮއި ކުރެއްވީ އެ ކުންފުނީގެ މެނޭޖިން ޑިރެކްޓަރު އަހުމަދު ސައީދު މުހައްމަދެވެ. އަދި ހޯރަފުށި ކައުންސިލްގެ ފަރާތުން ސޮއި ކުރެއްވީ ކައުންސިލްގެ ރައީސް މުހައްމަދު ވަހީދެވެ.

ފެނަކައިން ބުނީ މި ޕްލާންޓަކީ އެ ރަށުގެ ކައުންސިލްގެ ހިއްސާ އޮންނަގޮތަށް ހަދާ ޕްލާންޓެއް ކަމަށެވެ. މި ޕްލާންޓުން ބޯފެން އުފައްދައި ދުވާލެއްގެ މައްޗަށް 10،000-12،000 ފުޅީގެ ފެން ބަންދު ކުރެވޭނެ ކަމަށް ވެސް އެ ކުންފުނިން ބުންޏެވެ.

މި ޕްލާންޓު ގާއިމް ކުރުމުގެ އަމަލީ މަސައްކަތް މި މަހުގެ 10 ވަނަ ދުވަހު ފަށާނެ ކަމަށް ވެސް ފެނަކައިން ބުންޏެވެ.

އެ ކުންފުނިން ވަނީ މި ޕްލާންޓުގެ ޒަރީއާއިން ހޯރަފުށީގެ ގެތަކަށް ފެން ފޯރުކޮށްދިނުމަށް ޑިސްޕެންސާ ހަވާލުކުރުމަށް ވެސް ނިންމައިފަ އެވެ.