ފްލޮއިޑް މަރުވީ ކަރު ފިއްތާލުމުން ސިކުނޑި އަށް އޮކްސިޖަން ނުލިބުމުން: އޮޓޮޕްސީ ރިޕޯޓް

މިނިއާޕޮލިސް (ޖޫން 2) - ފުލުހުން ހައްޔަރު ކުރަން އުޅުމުގެ ތެރޭގައި އެމެރިކާގެ ކަޅު ނަސްލުގެ މީހެއް ކަމަށްވާ ޖޯޖް ފްލޮއިޑް މަރުވީ ފުލުސް މީހާ އޭނާގެ ކަރަށް ކަކުލުން އަރައި ފިއްތައިގެން ހުރުމުން ސިކުނޑި އަށް އޮކްސިޖަން ނުލިބި، ނޭވާ ހާސްވެގެން ކަމަށް މިނިވަން ފަރާތަކުން ހެދި އޮޓޮޕްސީގެ ރިޕޯޓުން ދައްކައިފި އެވެ.

ފްލޮއިޑުގެ އާއިލާ ތަމްސީލް ކުރާ ވަކީލުން ނެރުނު ބަޔާނެއްގައި ބުނެފައި ވަނީ ދުނިޔެ އަށް މަޝްހޫރު މެޑިކަލް އެގްޒަމިނަރުން ކަމަށްވާ ޑރ. މައިކަލް ބާޑެން އާއި ޑރ. އެލީސިއާ ވިލްސަންގެ ރިޕޯޓުން ދައްކާ ގޮތުގައި ފްލޮއިޑް، 46، މަރުވީ އެހެން ބަޔަކު ހިންގި އަމަލެއްގެ ސަބަބުން ކަމަށެވެ. އަދި އެ އަމަލުގެ ސަބަބުން މަރުވާން ދިމާވި މައިގަނޑު ސަބަބަކީ ބުރަކައްޓަށާއި ކަރަށް ބާރަށް ފިއްތުމުން ސިކުނޑި އަށް ލޭ ދިއުން ހުއްޓުވުމުން ކަމަށެވެ. ސިކުނޑި އަށް ލޭ ފޯރުން ހުއްޓުނީ ފިއްތައިގެން ހުރިލެއް ބާރުވުމުން ފްލޮއިޑުގެ ކަނާތް ފަރާތު ކެރޮޓިޑް އާޓަރީ ބްލޮކްވުމުން ކަމަށް ބުނެފައިވެ އެވެ.

ފްލޮއިޑުގެ ޑަޔަފްރަމްގެ މަސައްކަތް ހުއްޓުނީ އޭނާގެ ބުރަކައްޓަށް އޮތް ވެެއިޓާ އެކު ބިޑިއަޅުވާފައި އޮތް ގޮތުން ކަމަށް އެގްޒިމިނަރުން ފާހަގަކޮށްފައިވާ ކަމަށް ވަކީލުން ބުނެ އެވެ.

"މި ހުރިހާ ހެކިތަކާ އެކު ޑޮކްޓަރުން ގަބޫލް ކުރަނީ ފްލޮއިޑް މަރުވެފައި ވަނީ ހޮސްޕިޓަލަށް ގެންދަން ނެގުމުގެ ކުރިން އޭނާ އޮތް ތަނުގައި ކަމަށް،" ވަކީލުން ބުނެފައިވެ އެވެ.

ބާޑެން ވިދާޅުވީ ފްލޮއިޑުގެ އެހެން ސިއްހީ މައްސަލައެއް ހުރިކަން ފާހަގަ ނުވާ ކަމަށެވެ.

ހެނެޕިން ކައުންޓީ މެޑިކަލް އެގްޒަމިނާ ވެސް ވިދާޅުވެފައި ވަނީ ފްލޮއިޑް މަރުވީ ފުލުސް މީހާ ކަރަށް ފިއްތައިގެން ހުރުމުގެ ސަބަބުން ކަމަށެވެ.

ޕްރޮސެކިއުޓަރުންގެ ރިޕޯޓުގައި ފާހަގަކޮށްފައިވާ ގޮތުގައި ފްލޮއިޑުގެ ކަރަށް ފުލުސް އޮފިސަރު ޑެރެކް ޗައުވިން ކަކުލުން އަރައިގެން، އަށް މިނިޓް 46 ސިކުންތު ވަންދެން ހުއްޓެވެ. އޭގެ ތެރޭން ގާތްގަނޑަކަށް ހަ މިނިޓްވީ އިރު ފްލޮއިޑުގެ ހަބަރު ވަނީ ހުސްވެފަ އެވެ.