ޕޮލިސް ޓްރެއިނިންގައި އުޅެނިކޮށް ހާލުދެރަވި މީހާ ނިޔާވެއްޖެ

ދ. ވާނީގައި ފުލުހުންގެ ތަމްރީނުގައި އުޅެނިކޮށް ހާލު ދެރަވުމުގެ ސަބަބުން ފަރުވާ ދެމުން ދިޔަ މީހާ މިއަދު ނިޔާވެއްޖެ އެވެ.

ފުލުހުން ބުނީ 40 ވަނަ ޕޮލިސް އިނީޝިއަލް ޓްރެއިނިން ކޯހުގައި ތަމްރީނު ފުރިހަމަ ކުރަމުން ދިޔަ ޕޮލިސް ކޮންސްޓަބްލް ހުސައިން ގާއިސް، 34، ނިޔާވީ އައިޖީއެމްގައި ފަރުވާދެމުން ދަނިކޮށް މިއަދު ހަވީރުގެ ވަގުތެއްގައި ކަމަށެވެ.

އެނގިފައިވާ ގޮތުގައި ހުސައިން ގާއިސްގެ ހަރަކާތް ހުއްޓިފައި އޮތްކަން ފާހަގަވީ ފަތިހު އޭނާ ނުތެދުވެގެން ބެލި އިރު އެވެ. އެ ރޭ ނިދަން ދިޔައިރު ވެސް އޭނާގެ ފަރާތުން ސިއްހީ އާދަޔާ ހިލާފު ކަމެއް ފާހަގަނުވާ ކަމަށްވެ އެވެ.

އޭނާގެ ހަރަކާތް ހުއްޓި ހާލު ދެރަވުމުން ފުރަތަމަ ގެންދިޔައީ ދ. ކުޑަހުވަދޫގައި ހުންނަ އަތޮޅު ހޮސްޕިޓަލެވެ. އަދި އިތުރު ފަރުވާ ދިނުމަށް އެ ދުވަހުގެ މެންދުރުގެ ވަގުތެއްގައި އައިޖީއެމްއެޗަށް ގެނަ އެވެ.

ނިޔާވި އިރު އޭނާއަށް ފަރުވާ ދެމުން ދިޔައީ ވެންޓިލޭޓަރުގަ އެވެ.