ކަޅު ނަސްލުގެ މީހާ މަރާލި ފުލުހަށް ދައުވާކޮށްފި

މިނިއާޕޮލިސް (މެއި 30) - އަތުގައި އެއްވެސް ހަތިޔާރެއް ނެތް އެމެރިކާގެ ކަޅު ނަސްލުގެ މީހަކު ހައްޔަރު ކުރަން އުޅުމުގެ ތެރޭގައި އޭނާ މަރާލި ކަމުގެ ކުށުގައި ހައްޔަރުކޮށްފައިވާ ދޮން ނަސްލުގެ ފުލުސް މީހާގެ މައްޗަށް މީހަކު މެރުމުގެ ދައުވާކޮށްފި އެވެ.

ކަޅު ނަސްލުމުގެ 46 އަހަރުގެ ޖޯޖް ފްލޮއިޑް މިދިޔަ ހޯމަ ދުވަހު ހައްޔަރު ކުރަން އުޅުމުގެ ތެރޭގައި ފުލުސް މީހާ ޑެރެކް ޗައުވިން ވަނީ ފްލޮއިޑް ވައްޓާލައި ބާއްވައިގެން ކަކުލުން ކަރަށް އަރައިފަ އެވެ. އެ ހާދިސާގެ ވީޑިއޯ ފުޓޭޖް ވަނީ އާއްމުވެފަ އެވެ. އޭރު ފްލޮއިޑް ދިޔައީ އޭނާ ހާސްވެގެން މަރުވަނީ ކަމަށް ގޮވަމުންނެވެ. ފޭކް ނޫޓްތަކެއް ގެންގުޅޭ ކަމަށް ތުހުމަތުކޮށް ފްލޮއިޑް ހައްޔަރުކުރަން އުޅުމުގެ ތެރޭގައި އޭނާ މަރާލުމާ ގުޅިގެން އިތުރު ތިން ފުލުހަކު ވެސް ވަނީ ވަޒީފާ އިން ވަކިކޮށްފަ އެވެ.

އެމެރިކާގައި ކަޅު މީހުންނާ މެދު ދޮން ފުލުހުން އަމަލްކުރާ ނާއިންސާފު ގޮތްތަކާ މެދު ރުޅިވެރިކަން އިތުރުވެ މިނިއާޕޮލިސް ސިޓީގައި ވަނީ ވޭތުވެދިޔަ ދެ ތިން ދުވަހު ހަމަނުޖެހުން ހިންގާ ފުލުސް ސްޓޭޝަނެއްގައި އަލިފާން ވެސް ޖަހައިފަ އެވެ. އެ ހަމަނުޖެހުންތައް މިހާރު ވަނީ އެހެން ސިޓީތަކަށް ވެސް ފެތުރިފަ އެވެ.

ހެނެޕިން ކައުންޓީގެ ޕްރޮސެކިއުޓާ މައިކް ފްރީމަން ވިދާޅުވީ ފުލުސް މީހާ ޗައުވިންގެ މައްޗަށް ދައުވާކޮށްފައި ވަނީ މީހަކު މެރުމުގެ ތާޑް ޑިގްރީ ކުށެއްގެ ގޮތުގައި ކަމަށެވެ. އަދި އަނެއް ތިން ފުލުހުންގެ ތަހުގީގު ހިންގަމުންދާ ކަމަށް ވެސް އޭނާ ވިދާޅުވި އެވެ.

ފުލުސް މީހާގެ މައްޗަށް ދައުވާ ކުރުމުން ފްލޮއިޑުގެ އާއިލާ އާއި އެ މީހުންގެ ވަކީލް ބެންޖަމިން ކްރަމްޕް މަރުހަބާ ވިދާޅުވި ނަމަވެސް، އާއިލާގެ ބަޔާނުގައި ބުނެފައި ވަނީ ޗައުވިންގެ މައްޗަށް ކުރަން ޖެހޭނީ ފަސްޓް-ޑިގްރީ މާޑާގެ ދައުވާއެއް ކަމަށެވެ.

"މި މަރާ ގުޅިގެން އެމެރިކާގެ ކަޅު ނަސްލުގެ މީހުންގެ ހިތްތަކުގައި އަޅާ ވޭން އަދި ކަޅު ނަސްލުގެ މީހުންނާ މެދު ކަންތައް ކުރާ ގޮތާ މެދު ކެތް ނުކުރެވިގެން އެ ޝުއޫރުތައް މިހާރު އެ ދަނީ މުޅި އެމެރިކާގެ އެކި ހިސާބުތަކުން މަގުތަކަށް ބަންޑުންވަމުން،" ފްލޮއިޑުގެ އާއިލާ އިން ނެރުނު ބަޔާނުގައި ބުނެފައިވެ އެވެ.

ކޯޓަށް ހުށަހަޅާފައިވާ ލިޔުންތަކުގައިވާ ގޮތުން ފްލޮއިޑުގެ ކަރަށް ފުލުސް މީހާ ކަކުލުން އަރައިގެން އަށް މިނިޓް 46 ސިކުންތު ވަންދެން ހުއްޓެވެ. ކައުންޓީގެ މެޑިކަލް އެގްޒަމައިނާގެ ފުލް ރިޕޯޓް އަދި އާއްމެއް ނުކުރެ އެވެ.

ފުލުސް މީހާ އަށް ދައުވާ އުފުލިތާ ކުޑައިރުކޮޅެއްގެ ތެރޭގައި އެމެރިކާގެ އެޓާނީ ޖެނެރަލް ވިލިއަމް ބާ ވިދާޅުވެފައި ވަނީ ފެޑެރަލް މަދަނީ ހައްގުގެ އެއްވެސް ގާނޫނަކާ ޚިލާފުވެފައިވޭތޯ ބަލަން ޖަސްޓިސް ޑިޕާޓްމަންޓާއި އެފްބީއައި އިން މިނިވަން ވަކި ތަހުގީގެއް ކުރާނެ ކަމަށެވެ.

މިނެސޮޓާގެ ގަވަރުނަރު ޓިމް ވޯލްޒް ވިދާޅުވީ ފުލުސް މީހާ ހައްޔަރު ކުރުމަކީ މައްސަލައިގައި އިންސާފަށް ވާސިލުވުމަށް އެޅި ރަނގަޅު ފުރަތަމަ ފިޔަވަޅު ކަމަށެވެ.