ފްލެޓުން ވެއްޓި، މަރުވި މީހާގެ ފޮޓޯ އާއި މަންޒަރު އާންމު ނުކުރަން ފުލުހުން އެެދިއްޖެ

ހުޅުމާލެ 2 ގައި ހުންނަ ސްޓެލްކޯގެ ފްލެޓެއްގެ މަތިން ވެއްޓި މަރުވެފައި އޮއްވައި މިއަދު ހަވީރު ފެނުނު މީހާގެ ފޮޓޯ އާއި އެ ހާދިސާގެ މަންޒަރުތައް އާންމު ނުކުރަން ފުލުހުން އިލްތިމާސް ކޮށްފި އެވެ.

"މީހާ ނިޔާވުމުން އާއިލާ އަށް ލިބިފައިވާ ހިތާމައިގެ މި ދަނޑިވަޅުގައި، އާއިލާގެ އިހުސާސްތަކަށް އިހުތިރާމުކޮށް، ނިޔާވި މީހާގެ ފޮޓޯ އާއި ހާދިސާގެ މަންޒަރުތައް މީސްމީޑިއާގެ ވަސީލަތްތަކަުގައި ދައުރު ނުކުރުމަށް މި ހިދުމަތުން އިލްތިމާސް ކުރަމެވެ،" ފުލުހުން މީޑިއާތަކާ ހިއްސާކުރި މެސެޖެއްގައި ވެ އެވެ.

ސްޓެލްކޯ ފްލެޓް އިމާރާތުގެ 12 ވަނަ ފްލޯގެ ބެލްކަނިން ވެއްޓި މަރުވެފައި އޮއްވައި ފެނުނީ ހ. ގިނިރާހިއާގޭ އިބްރާހިމް ޝަރީފު، 31، އެވެ.

އެނގިފައިވާ ގޮތުގައި އޭނާ އެ އިމާރާތުން ވެއްޓުނީ ރޭގެ ވަގުތެއްގަ އެވެ. އެކަމަކު، ޝަރީފުގެ ހަށިގަނޑު ފެނުނީ މިއަދު ވަރަށް ލަސްވި ފަހުން ހަވީރުގެ ވަގުތެއްގަ އެވެ.

ފުލުހުން ބުނީ، އޭނާ ވެއްޓިފައި އޮއްވައި ފެނުނީ ސްޓެލްކޯ ޓަވަރު ސީގެ ބިއްދޮށް ފަޅިން ކަމަށެވެ. ޝަރީފުގެ މަރުގެ މައްސަލަ ތަހުގީގު ކުރަމުން އަންނައިރު އިތުރު ތަފުސީލެއް ފުލުހުން އަދި ނުދެ އެވެ.