އިގްތިސާދީ ޕެކޭޖް ހޯދުމަށް ފަހު މުވައްޒަފުންނާ މެދު އަމަލުކުރާ ގޮތް ބަލައި، ޖޫރިމަނާ ކުރަން ހުށަހަޅައިފި

ކޮވިޑް-19 އާ ގުޅިގެން ސަރުކާރުން ދޫކުރާ އިގްތިސާދީ ޕެކޭޖް އެއްފަހަރާ ދޫނުކުރުމަށާއި މުވައްޒަފުންނާ މެދު ގޯސްކޮށް އަމަލުކުރާ ނަމަ ޖޫރިމަނާ ކުރަން ރައްޔިތުންގެ މަޖިލީހުގެ އިޖުތިމާއީ ކޮމެޓީން ހުށަހަޅައިފި އެވެ.

ކޮވިޑް-19 އާ ގުޅިގެން ވިޔަފާރިތަކަށް އެހީވުމަށް ސަރުކާރުން ވަނީ 2.5 ބިލިއަން ރުފިޔާގެ އިގްތިސާދީ ޕެކޭޖެއް އިއުލާންކޮށްފަ އެވެ. އަދި ބޭންކްތަކުން ދޫކޮށްފައިވާ ލޯނުތައް އަނބުރާ ދެއްކުން ވެސް ހަ މަހަށް ފަސްކޮށްދޭން ވަނީ ނިންމައިފަ އެވެ.

ކޮވިޑް-19 އާ ގުޅިގެން ސަރުކާރުން އަޅާ ފިޔަވަޅުތަކާ ބެހޭގޮތުން މަޖިލީހުގެ އިޖުތިމާއީ ކޮމިޓީން ތައްޔާރުކޮށް، މަޖިލީހަށް ހުށަހެޅި ރިޕޯޓުގައި ވަނީ އިގްތިސާދީ ޕެކޭޖް ދިނުމަށް ފަހު، އެ ފަރާތަކުން އަމަލު ކުރަމުންދާ ގޮތް ޖޮބް ސެންޓަރުން ބަލަމުން ގެންދިއުމަށެވެ. އަދި އެ ޕެކޭޖް އެއްފަހަރާ ދޫނުކުރުމަށާއި މުވައްޒަފުންނާ މެދު އިހާނެތިކޮށް އަމަލުކުރާ ނަމަ، އޭގެ ވަކި ޕަސެންޓެއް ޖޫރިމަނާ ގޮތުގައި ނެގުމަށް ވެސް އެ ކޮމިޓީން ހުށަހަޅާފައިވެ އެވެ.

މީގެ އިތުރުން، އަމިއްލަ ފަރާތްތަކަށާއި ސަރުކާރަށް ކުއްޔަށް ދޫކޮށްފައިވާ ތަންތަނުގެ ކުލި ކުޑަވާނެ ގޮތަކަށް އިގްތިސާދީ ޕެކޭޖްގެ ދަށުން ލުއި ދިނުމަށާއި ކުލި ނުދެއްކިގެން މީހުުން މަގުމަތިިވިޔަ ނުދިނުމަށްޓަކައި ސަރުކާރާއި ކައުންސިލްތަކުން ފިޔަވަޅު އެޅުމަށް ވެސް އެ ކޮމިޓީން ހުށަހެޅި އެވެ.

އިޖުތިމާއީ ކޮމިޓީގެ އެއް ހުށަހެޅުމަކީ، މާލެ އާއި އަތޮޅުތެރެ ތަފާތު ކުރުމެއް ނެތި ސްކޫލް ކުދިންނަށް ޚާއްސަ އިންޓަނެޓް ޕެކޭޖްތަކެއް ތައާރަފް ކުރުމާއި ސްކޫލްތައް ބަންދު ވިޔަސް، ތައުލީމު މެދުކެނޑިޔަ ނުދިނުމަށްޓަކައި އޮންލައިން ކްލާސްތައް ކުރިއަށް ގެންދިއުމެވެ.

މުވައްޒަފުންނާ މެދު ގޯސްކޮށް އަމަލު ކުރާ ފަރާތްތައް ޖޫރިމަނާ ކުރަން ކޮޮމިޓީން ހުށަހެޅިއިރު، ކޮވިޑް-19އާ ގުޅިގެން އިގްތިސާދަށް ކުރިމަތިވި ގޮންޖެހުންތަކުގެ ސަބަބުން ގިނަ ބައެއްގެ ވަޒީފާ ގެއްލި، އެތައް ބަޔަކަށް ވަނީ ދިގު މުއްދަތަށް މުސާރަ އާއި އިނާޔަތްތައް ނުލިބޭ ގޮތަށް ޗުއްޓީއަށް ދާން ޖެހިފަ އެވެ.