މީޑިއާތަކުން އަބަދު ކޮވިޑް-19ގެ ވާހަކަ ދައްކާތީ ޑރ. އާރިފް ކަންބޮޑުވެއްޖެ

ޓީވީތަކުންނާއި އެހެނިހެން މީޑިއާތަކުން ކޮވިޑް-19ގެ ވާހަކަ އަބަދު ދައްކާތީ ނަފްސާނީ ބަލީގެ ހާއްސަ ޑރ. އާރިފް މުހައްމަދު މިއަދު ކަންބޮޑުވުން ފާޅުކުރައްވައިފި އެވެ.

ނޭޝަނަލް އިމަޖެންސީ އޮޕަރޭޝަން ސެންޓަރު (އެންއީއޯސީ) ން ބޭއްވި މީޑިއާ ބްރީފިންގައި ޑރ. އާރިފް ވިދާޅުވީ ޓީވީތަކާއި މީޑިއާތަކުން މިހާރު އަބަދު ވެސް އިވެނީ ކޮވިޑޮ-19ގެ ވާހަކަތައް ކަމަށެވެ. އޭގެ ތެރޭގައި ކޮވިޑް-19 ގެ ކޭސްތައް އިތުރުވާ ވާހަކަ އާއި އެ ބަލީގެ އެހެން މައުލޫމާތުތައް ހިމެނެ އެވެ.

ޑރ. އާރިފް ވިދާޅުވީ އެފަދަ ހާސްވާ ކަހަލަ ވާހަތައް އަބަދު އިވުމަކީ ރަނގަޅު ކަމެއް ނޫން ކަމަށާއި މައުލޫމާތުތައް ދޭއިރު ވެސް އެ ކަންކަމަށް ވިސްނަން ވާނެ ކަމަށެވެ. އެގޮތުން، ކޮވިޑް-19ގެ މައުލޫމާތުތައް ކޮންމެހެން ޓެލެތޯނެއްގެ ގޮތުގައި ގެންދިއުން މުހިންމު ނޫން ކަމަށާއި ކޮންމެހެން ދޭން ޖެހޭ މައުލޫމާތުތައް ފޯރުކޮށްދިނުމުން ވެސް ފުދޭނެ ކަމަށް އޭނާ ވިދާޅުވި އެވެ.

ޓެލެތޯނެއްގެ ގޮތުގައި ކުރިއަށް ގެންދަން ބޭނުންވިޔަސް ތަންކޮޅެއް ބޮޑަށް ނަފްސާނީ ދުޅަހެޔޮ ކަމަށް ވިސްނައި "ޕޮޒިޓިވް ސައިޑް" މީހުންނަށް ދެއްކުން މުހިންމު ކަމަަށް ވިދާޅުވި އެވެ. ޚާއްސަކޮށް ކޮވިޑް-19 އާ ގުޅިގެން ވެސް ހިތްވަރު ލިބޭ ފަދަ މައުލޫމާތުތައް ދިނުމަށް ޑރ. އާރިފް ބާރު އެޅުއްވި އެވެ.

އޭނާ ވިދާޅުވި ގޮތުގައި، މިކަމުގެ މައުލޫމާތުތައް ހޯދުމަށް އާންމުން ހޭދަކުރާ ވަގުތު ކޮންޓްރޯލް ކުރުން ވެސް ވަރަށް ބޭނުންތެރި އެވެ. އެގޮތުން، މުޅި ދުވަސް އެއްކޮށް ސޯޝަލް މީޑިއާ އާއި އެ ނޫން ވެސް ގޮތްގޮތަށް މާ ގިނައިން ކޮވިޑް-19 ގެ މައުލޫމާތު ހޯދައި، ގޮތް ނޭނގޭ ހަގީގަތެއް ނެތް ވާހަކަތައް އަޑު އަހައި އެކަމުގެ ތެރޭގައި އެހާ ބޮޑަށް ނޫޅުމަށް އިލްތިމާސް ކުރެއްވި އެވެ.

ޑރ. އާރިފް ވިދާޅުވީ ނަފްސާނީ ދުޅަހެޔޮކަމަށް މަސައްކަތް ކުރާ މޯލްޑިވްސް ރެޑް ކްރެސެންޓާއި އެ ނޫން ވެސް ފަރާތްތަކުން ގުޅިގެން އާންމުންނަށް މިކަމުގައި އެހީތެރިކަން ފޯރުކޮށްދިނުމަށް ޓީވީތަކާއި މީޑިއާތަކާ އެކު ކުރެވޭނެ ކަންކަން އެބަހުރި ކަމަށެވެ. އަދި ކުރިއަށް އޮތް ތަނުގައި އެފަދަ ކަންކަމާ މެދު މަޝްވަރާތައް ވެސް ކުރާނެ ކަމަށް ވިދާޅުވި އެވެ.

ކޮވިޑް-19 ރާއްޖެ އަށް ފެތުރިފައިވާ މިވަގުތު، ކުރީ ސަފުގައި މަސައްކަތްކުރާ މީހުންނާއި ހާއްސަކޮށް މައުލޫމާތުތައް ފޯރުކޮށްދިނުމަށް މީޑިއާތަކުގައި ހަރަކާތްތެރިވާ މީހުން ވެސް އެ ކަންކަމަށް ސަމާލުވެ އަމިއްލަ ނަފްސާނީ ދުޅަހެޔޮ ކަމަށް ބެލުމަށް ވެސް ޑރ. އާރިފް އެދިވަޑައިގަތެވެ.