ނޫސްވެރިންގެ މުޒާހަރާ އިން ހައްޔަރުކުރި ލީވާން ދޫކޮށްލައިފި

މީޑިއާ ކޮންޓްރޯލް ކުރުމާ ގުޅޭ ބިލާ ދެކޮޅަށް ރައްޔިތުންގެ މަޖިލިސް ސަރަހައްދުގައި މިއަދު ބޭއްވި މުޒާހަރާގެ ތެރެއިން ހައްޔަރުކުރި ދެ މީހުން މިރޭ ދޫކޮށްލައިފި އެވެ.

މަޖިލިސް ކުރާ ސަރަހައްދުގައި ބޭއްވި އެއްވުން ރޫޅާލުމުގެ ތެރޭގައި، ދައުލަތުގެ މުވައްޒަފުންގެ މަސައްކަތަށް ހުރަސްއެޅި މައްސަލައިގައި އަދަދުގެ ނޫސްވެރިޔާ، މީޑީއާ ކައުންސިލްގެ މެމްބަރު ލީވާން އަލީ ނަސީރުގެ އިތުރުން ޓެކްސީ ޑްރައިވަރު ޝާމިން ފުލުހުންގެ ބެލުމުގެ ދަށަށް ގެންދިޔަ އެވެ.

ނަމަވެސް، ފުލުހުންގެ ބަންދުގައި ދެ ތިން ގަޑިއިރު ބޭތިއްބުމަށްފަހު އެއްވެސް ޝަރުތެއް ނެތި ލީވާން އަދި ޝާމިން ވެސް ވަނީ ދޫކޮށްލައިފަ އެވެ.

މީޑިއާ ރެގިއުލޭޓްކުރުމުގެ ނަމުގައި ސަރުކާރުގެ ފަރާތުން ބިލު ހުށަހެޅުއްވީ ތުޅާދޫ ދާއިރާގެ އަމިއްލަ މެމްބަރު އަބްދުލް ހަންނާނު އަބޫބަކުރެވެ.

ނަމަވެސް، ނޫސްވެރިންނާއި މީޑިއާތަކުން ކަންބޮޑުވުން ފާޅުކުރަމުން ދަނިކޮށް ދައުރުން ބޭރުން ޖަލްސާއެއް ބާއްވައި އެ ބިލް ވަނީ ފާސްކޮށްފަ އެވެ.

އެކަމަކު ސަރުކާރުން ބުނެފައި ވަނީ ރައްޔިތުންގެ މަޖިލީހުގެ ކޮމިޓީން ބިލް ފާސްކޮށްފައި ވަނީ، ނޫސްވެރިން ބޭނުންވި އިސްލާހުތަކާ އެކުގައި ކަަމަށެވެ. މިނިވަންކަމާ އެކު ނޫސްވެރިކަން ކުރަން އެ ބިލުން ނޫސްވެރިންނާއި މީޑިއާތަކަށް ހުރަހެއް ކުރިމަތިނުވާނެ ކަމަށް ވެސް ސަރުކާރުން ވަނީ ބުނެފަ އެވެ. އެކަމަކު، ނޫސްވެރިންގެ ޖަމިއްޔާއިން ގޮވާލާފައިވަނީ އެ ބިލު އަނބުރާ ނެގުމަށެވެ.