ކުށުގެ ވެށިން ނޫސްވެރިއަކު ނެގި ފޮޓޯއެއް ޑިލީޓް ކުރުވި މައްސަލަ ބަލަނީ!

މާލޭގެ މަގުމަތިން ރޭގައި މީހަކު ހައްޔަރުކުރާ މަންޒަރުގެ ފޮޓޯ ނެގި ނޫސްވެރިއެއްގެ ފޯނުން ފުލުހުން އެ ފޮޓޯ ޑިލީޓް ކުރުވި މައްސަލައެއް ފުލުހުން ބަލަން ފަށައިފި އެވެ.

އެ މައްސަލާގައި ސޯޝަލް މީޑިއާގައި ކަންބޮޑުވުން ފާޅުކުރި ނޫސްވެރިއަކު ބުނީ ރޭ 8:26 ހާއިރު މާލޭގެ މަގުމަތީގައި މީހަކު ހައްޔަރު ކޮށްގެން އުޅޭތީ އެ ތަނުގެ ފޮޓޯ ނަގަން ދިޔައީ ޕްރެސް ކާޑު ވެސް ހިފައިގެން ކަމަށެވެ.

އެކަމަކު، އެ މަންޒަރުގެ ފޮޓޯ ނެގުމާ އެކު، ފުލުހަކު ވަނީ އެ ފޮޓޯ ފޮހެލަން އަންގާފައި ކަމަށާއި ޕްރެސް ކާޑު ދެއްކުމުން ވެސް "ގަދަ ދައްކާލީ" ފޮޓޯ ޑިލީޓް ކުރުވަން ކަމަށް "އަސްލު ޓީވީ" ގެ ނޫސްވެރިޔާ ޝާމާ ޝުއައިބު ބުންޏެވެ.

"އެންމެ ފަހުން ހައްޔަރުކުރާ ހިސާބަށް ދިޔައީމާ މި ޖެހުނީ ޑިލީޓް ކުރަން. މިއީ ކޮން އުސޫލެއް، ކޮން ހަމައެއް ކަމެއް ބުނެ ނުދެވުނު އެ އޮފިސަރަކަށް،" އެ ނޫސްވެރިޔާ ކަންބޮޑުވުން ފާޅުކޮށް ލިޔެފައިވެ އެވެ.

އެކަމާ ގުޅިގެން އޭނާ ވަނީ ނޫސްވެރިންނަކީ މިނިވަންކަމާ އެކު ނޫސްވެރިކަން ކުރެވޭނެ ބައެއް ކަމަށް ބުނާ ބުނުން ގަބޫލު ނުކުރެވޭ ކަމަށް ބުނެފަ އެވެ. ނޫސްވެރިއެއްގެ ޒިންމާ އަދާކުރުމުން ހުއްޓުވައި ފޯނު ބެލީ ކޮން އަމުރެއް އޮވެގެންތޯ އޭނާ ސުވާލު އުފެއްދި އެވެ.

ނޫސްވެރިންގެ ކަންބޮޑުވުންތަކާ ގުޅިގެން ފުލުހުންގެ ތަރުޖަމާނު އަހުމަދު ޝިފާން ރޭ ވިދާޅުވީ ކުށުގެ ވެށީގައި ފުލުހުން ހަރަކާތްތެރިވަމުންދާއިރު އެ ތަނެއްގައި ފުލުހުން ކުރަމުންދާ މަސައްކަތަކީ އެ ހާލަތުގައި ހުރިހާ އެންމެން ވެސް އެންމެ އިސްކަންދޭން ވާނެ ކަންތައް ކަމަށެވެ. ކޮންމެ ހާލަތެއްގައި ނޫސްވެރިންނަށް ކަނޑައެޅޭ ހިސާބެއްގައި ތިބެ މަންޒަރާއި މައުލޫމާތު ރައްޔިތުންނާ ހަމައަށް ގެނެސް ދެވެން އޮތް އެންމެ ފުޅާ ފުރުސަތެއް ފުލުހުން ވެސް ދޭން ވާނެ ކަމަށް ޝިފާން ވިދާޅުވި އެވެ.

އޭނާ ވިދާޅުވީ، "އަސްލު ޓީވީ" ގެ ނޫސްވެރިޔާ ހުށަހެޅީ ފުލުހެއްގެ ނުވަތަ ފުލުހުންތަކެއް އަމަލުކޮށްފައިވާ ގޮތާ ގުޅޭ ޝަކުވާއެއް ކަމަށް ގަބޫލު ކުރެވޭތީ، އެކަން އިތުރަށް ބެލުމަށް ފުލުހުންގެ ޕްރޮފެޝަނަލް ސްޓެންޑާޑްސް ކޮމާންޑާ ހިއްސާ ކުރައްވާނެ ކަމަށެވެ.

ފުލުހުންގެ ބެލުމުގެ ރޭ ގެންދިޔައީ ގދ. ގައްދޫ، މުހައްމަދު އަޒްހާމް ސައީދެވެ. އެއީ ބަނގުރަލުގެ ވިޔަފާރި ކުރާ ކަމަށް ފުލުހުންގެ އިންޓެލިޖެންސަށް ލިބުނު މައުލޫމާތަކާ ގުޅިގެން ހިންގި އޮޕަރޭޝަނެއްގެ ތެރެއިން މަޖީދީ މަގުން ހުއްޓުވައި ބަލައި ފާސްކޮށް، ހައްޔަރުކުރި މީހެކެވެ.