ލޮކްޑައުންގައި ވިބީގެ ޑެލިވަރީ ހިދުމަތް ފުޅާކޮށްފި

ލޮކްޑައުންގެ ހާލަތުގައި ޑެލިވަރީގެ ހިދުމަތްތައް އިތުރަށް ފުޅާކޮށްފައިވާ ކަމަށް ވީބީ މާޓުން މިއަދު ބުނެފި އެވެ.

ވީބީން ބުނީ އިއްޔެ މާލެ ލޮކްޑައުންގެ ހާލަތަކަށް ކުއްލިއަކަށް ގެންދިއުމާ ގުޅިގެން ހިދުމަތް ދިނުމުގައި ވަރަށް ބާރު ބޮޑުވި ކަމަށެވެ. އެގޮތުން އެތައް ހާސް އޯޑަރެއް ލިބި، ޑެލިވަރީ ހިދުމަތް އެންމެ އެކަށީގެންވާ ގޮތެއްގައި ނުދެވުނު ކަމަށްޓަކައި ވީބީން ވަނީ ކަސްޓަމަރުންގެ އަރިހުން މާފަށް ވެސް އެދިފަ އެވެ.

މާލެ ލޮކްޑައުން ކުރީ މާލެ ސިޓީން ފުރަތަމަ ފަހަރަށް ކޮވިޑް-19 އަށް މީހަކު ޕޮޒިޓިވް ވުމުންނެވެ. މިހާތަނަށް މާލެއިން ތިން މީހަކު ވަނީ ޕޮޒިޓިވްވެފަ އެވެ.

ޑެލިވަރީގެ ހިދުމަތް އަވަސް ކުރުމަށްޓަކައި އިތުރު ޑެލިވަރީ ފާސް ހޯދައި ޑެލިވަރީ ޓީމު ބޮޑުކޮށްފައިވާ ކަމަށް ވީބީން ބުނެ އެވެ. މީގެ އިތުރުން މާލޭގެ ހަތަރު އަވަށް ހިމެނޭ ގޮތަށް ޒޯނުތަކަށް ބަހާލައި، އަވަށްތަކަށް ހާއްސަ ވައިބާ ނަންބަރުތަކެއް ވެސް ވަނީ ހަމަޖައްސައިފަ އެވެ. އަދި އެކަމާ ގުޅޭ މައުލޫމާތު ސޯޝަލް މީޑިއާ މެދުވެރިކޮށް އިއުލާނު ކުރާނެ ކަމަށް ވީބީން ބުނެ އެވެ.

މިދިޔަ ވަގުތުތަކުގައި ހިދުމަތް ނުދެވި ހުރި އޯޑަރުތައް އަލުން ފޮނުވައިދޭން ވީބީން އެދެ އެވެ. މީގެ އިތުރުން ޑެލިވަރީ ނުކުރެވޭ ކަމަށް ފުލުހުން ކަނޑައަޅާފައިވާ ވަގުތުތަކުގައި ޑެލިވަރީ ނުކުރި ނަމަވެސް އޯޑަރު ނަގަން ވީބީން ވަނީ ނިންމާފަ އެވެ.

ލޮކްޑައުންގެ ހާލަތުގައި ފުލުހުންގެ ހުއްދައާ އެކު ބޭރުގައި އުޅޭ މީހުންނަށް، ގަލޮޅު ވީބީ މާޓުން ތަކެތި ގަނެވޭނެ އެވެ. މިކަމާ ގުޅޭ އިތުރު މައުލޫމާތު ބޭނުން ނަމަ 3304444 ނުވަތަ 9633855 ގުޅައިގެން ހޯދޭނެ އެވެ.