ދޮގު ޚަބަރު ފަތުރާތީ ޚިދުމަތް ދޭން ދަތިވޭ: ވީބީ

ވީބީ މާޓުގެ މުވައްޒަފެއް ކޮވިޑް-19 އަށް ޕޮޒިޓިވް ވެއްޖެ ކަމަށް ބުނެ ރާއްޖޭގެ ބައެއް މީޑިއާތަކުގައި އްކަމުން އަންނަ ހަގީގަތާ ހިލާފު ވާހަކަތަކާ ގުޅިގެން ޚިދުމަތް ދިނުމުގައި ދަތިތަކާ ދިމާވާ ކަމަށް ވީބީ މާޓުން ބުނެފި އެވެ.

ކޮވިޑް-19 އަށް އިތުރު ހަތް ބިދޭސީއަކު މިއަދު ޕޮޒިޓިވްވެފައިވާއިރު މީގެ ތެރޭގައި އިހުސާން ފިހާރައިގައި މަސައްކަތް ކުރާ ބިދޭސީންތަކަކާއި ބީއެޗްއެމްގައި މަސައްކަތް ކުރާ ބިދޭސީއެއް ހިމެނޭ ކަމަށް މިއަދުގެ ނޫސްވެރިންގެ ބައްދަލުވުމުގައި އެޗްޕީއޭ އިން ވަނީ ބުނެފަ އެވެ. ނަމަވެސް މީގެ ތެރޭގައި ވީބީގެ މުވައްޒަފެއް ހިމެނޭ ކަމަށް ބުނެ ބައެއް މީޑިއާތަކުގައި ޚަބަރު ފެތުރުމުގެ ސަބަބުން ވީބީ އަށް ގިނަ ބައެއްގެ ފާޑު ކިޔުން ވަނީ އަމާޒުވެފަ އެވެ.

ވީބީގެ ފިހާރަތައް ހިންގަމުން އަންނަ ވީބީ ބްރަދާސްގެ މެނޭޖިން ޑިރެކްޓަރު ހަސަން ޝިޔާމް ވިދާޅުވީ މި ދަނޑިވަޅު އެ ފިހާރަ އިން ދެމުން އަންނަ ޚިދުމަތަކީ އާއްމުންނަށް މުހިންމު ޚިދުމަތަކަށް ވާއިރު ދޮގު ޚަބަރު ފެތުރުމުގެ ސަބަބުން އެ ޚިދުމަތް ފޯރުކޮށްދިނުމުގައި ހުރަސްތަކާ ދިމާވާ ކަމަށެވެ.

"ބައެއް ފިހާރަތަކުން ޕޮޒިޓިވް ކޭސްއެއް ފެންނައިރު އަޅުގަނޑުމެންނަށް ޑެލިވަރީ ކުރުމުގައި ބާރު އެބަ ބޮޑުވޭ. މިކަހަލަ ވަގުތެެއްގައި ދޮގު ޚަބަރު ފަތުރައިގެން އާއްމުންނަށް ވެސް އެ ދެވެނީ ގެއްލުމެއް. މީގެ ސަބަބުން އާއްމުންގެ މެދުގައި ބިރުވެރިކަން އުފެދޭނީ،" ހަސަން ވިދާޅުވި އެވެ.

ވީބީގެ އިތުރުން ބައެއް އެހެން ފިހާރަތުގެ ޑެލިވަރީ މީހުން ވެސް ޕޮޒިޓިވްވެފައިވާ ކަމަށް ބުނެ ދޮގު ޚަބަރުތައް ސޯޝަލް މީޑިއާގައި ވަނީ ފަތުރައިފަ އެވެ. އެ ފިހާރަތަކުން މި ވާހަކަތައް ދޮގު ކޮށްފައިވާއިރު އެއްވެސް ފިހާރައަކުން ޕޮޒިޓިވް ކޭސްއެއް ފެނިއްޖެ ނަމަ އާއްމުންނަށް އެކަން އަންގާނެ ކަމަށް އެ ފިހާރަތަކުން އަންނަނީ ބުނަމުންނެވެ.

މިހާތަނަށް މާލެއިން ކޮވިޑް-19 އަށް ޕޮޒިޓިވްވި ބިދޭސީންގެ ތެރޭގައި ހިމެނެނީ ލިލީ ސްޓޯރާއި އިހުސާން ފިހާރަ އަދި ބީއެޗްއެމްގެ ބައެއް މުވައްޒަފުންނެވެ.

މުޅި މާލެ ސަރަހައްދު 14 ދުވަހަށް ބަންދުކޮށްފައިވާއިރު ޑެލިވަރީގެ ހިދުމަތް ހޯދުމަށް ކަމާ ބެހޭ ފަރާތްތަކުން އަންނަނީ ބާރު އަޅަމުންނެވެ. އަދި މި ޚިދުމަތް ހޯދުމުގައި ވެސް ރައްކާތެރިކަން ކަށަވަރުކޮށް އަޅަން ޖެހޭ ފިޔަވަޅުތައް އެޅުމަށް އެޗްޕީއޭ އިން ވަނީ އިލްތިމާސް ކޮށްފަ އެވެ.