ޑިސްއިންފެކްޓު ކުރުމަށް ފަހު ވީބީގެ ފިހާރަތައް އަލުން ހުޅުވައިފި

ވީބީގެ ހުރިހާ ފިހާރަތަކެއް ޑިސްއިންފެކްޓް ކުރުމަށް ފަހު މިއަދު އަލުން ހުޅުވައިފި އެވެ.

ވީބީގެ ފިހާރަތައް މިދިޔަ ހުކުރު ދުވަހު ބަންދު ކުރީ އެ ތަނުގެ ބައެއް މުވައްޒަފުން ކޮވިޑް-19އަށް ޕޮޒިޓިވް ވުމާ ގުޅިގެންނެވެ. ވީބީގައި މަސައްކަތް ކުރާ އަށް މީހަކު ޕޮޒިޓިވް ވެފައި ވެ އެވެ. މީގެ ތެރޭގައި ހިމެނެނީ ވީބީ ބާޒާރު ފިހާރައިގެ ބިދޭސީއަކާއި ގަލޮޅު ފިހާރައިގައި މަސައްކަތްކުރާ ތިން ބިދޭސީ އަކާއި މާފަންނު ފިހާރައިގެ ހަތަރު މީހެކެވެ.

މިދިޔަ ތިން ދުވަހު ފިހާރަތައް ބަންދު ކުރުމަށް ފަހު އަލުން ހުޅުވިއިރު، ހުރިހާ ފިހާރައެއްގައި ވެސް ހިދުމަތް ދޭނީ އާ ޓީމަކުން ކަމަށް ވީބީން ބުންޏެވެ. މިއާ އެކު، އެ ކުންފުނީގެ ޑެލިވަރީގެ ހިދުމަތް ވެސް އަލުން ފަށާނެ އެވެ.

ކޮވިޑް-19 ފެނުމާއެކު ވީބީގެ ފިހާރަތައް ބަންދު ކޮށްފައިވާއިރު ބައެއް މީހުން ކޮށްފައި ހުރި އޯޑަރުތައް ވެސް ހުރީ ޑެލިވާ ނުކުރެވި ކަމަށް ވީބީން ވަނީ ބުނެފަ އެވެ. ނަމަވެސް މިއަދުން ފެށިގެން އެ އޯޑރުތައް ވެސް ޑެލިވަރީ ކުރުމުގެ މަސައްކަތް ކުރިއަށް ގެންދާނެ ކަމަށް އެ ކުންފުނިން ބުންޏެވެ.

"ފިހާރަތައް އަލުން ހުޅުވުމަށް މިދިޔަ ތިން ދުވަހު އަޅުގަނޑުމެން ވާނީ ވަރަށް ބުރަކޮށް މަސައްކަތް ކޮށްފައި،" ވީބީގެ އިސް އޮފިޝަލަކު ވިދާޅުވި އެވެ.

ވީބީ އަކީ، ކޮވިޑް-19 ފެތުރެން ފެށުމާ އެކު، ރައްކާތެރިކަމުގެ ފިޔަވަޅު އެންމެ ރަނގަޅަށް އަޅައިގެން ކަސްޓަމަރުންނަށް ހިދުމަތް ދެމުން އަންނަ އެއް ތަނެވެ. އެ ފިހާރައަށް ފަހަރަކު ދެ ކަސްޓަމަރުންނަށް ވަދެވޭއިރު ކޮންމެ ކަސްޓަމަރެއް ވަނުމުގެ ކުިރން ހުން ޗެކު ކުރެ އެވެ. ކަސްޓަމަރުންގެ އަތް ސެނިޓައިޒް ކުރާއިރު މުދަލުގައި އަތް ލުމަކީ ވެސް މަނާކަމެކެވެ. އެ ކަސްޓަމަރުން ބޭނުންވާ ތަކެތި ނަގައިދޭނީ މާސްކް އަޅައިގެން އަތަށް އަންގި ލައްވައިގެން ހަރަކާތެރިވާ މުވައްޒަފުންނެވެ.

މިދިޔަ މަހުގެ 15 ގައި މާލެ އިން ކޮވިޑް-19 ގެ މީހަކު ފުރަތަމަ ފަހަރަށް ފެނުމުން ވެސް ވީބީގެ ފިހާރަތައް ބަންދު ކުރުމަށް ފަހު، އަލުން ހުޅުވީ ޑިސްއިންފެކްޓްކޮށް، ރައްކާތެރިކަމުގެ ވަރުގަދަ ފިޔަވަޅުތަކާ އެކު އެވެ.