އޮންލައިން ވިޔަފާރިއާ އެކު ވީބީގެ ވެބްސައިޓެއް

ވީބީ މާޓުން އޮންލައިން ވިޔަފާރި ކުރުމަށް ހާއްސަ ވެބްސައިޓެއް ތައާރަފުކޮށްފި އެވެ.

މި ވެބްސައިޓު https://vbmartonline.com މެދުވެރިކޮށް ވީބީގެ ފިހާރަތަކުން ލިބެން ހުންނަ ހުރިހާ މުދަލެއް ލިބެންް ހުންނާނެ އެވެ. އެހެންކަމުން މި ވެބްސައިޓުގެ ސަބަބުން އެ ކުންފުނީގެ ކަސްޓަމަރުންނަަށް ވިޔަފާރި ކުރުމުގައި އިތުރު ލުއިތަކެއް ލިބިގެންދާނެ ކަމަށް ވީބީން ބުންޏެވެ.

ވީބީން ބުނީ މި ވެބްސައިޓަކީ އެ ކުންފުނީގެ ކަސްޓަމަރުންގެ އެދުމުގެ މަތިން ގިނަ ދުވަހުގެ މަސައްކަތަށް ފަހު ތައާރަފު ކުރި ވެބްސައިޓެއް ކަމަށެވެ.

"ވެބްސައިޓު ހުޅުވާލުމާ އެކު ފެންނާނީ ހަމަ ފިހާރައިގެ އެތެރެ. ކުރިން ވައިބާއިން ތަކެތި ގަންނައިރު އެ ތަކެތި ނުފެނި އުނދަގޫތަކެއް ދިމާވި ނަމަވެސް މިހާރު މިއޮތީ އެކަމަށް ހައްލެއް ލިބިފައި،" ވީބީން ބުންޏެވެ.

އޮންލައިންކޮށް ވިޔަފާރި ކުރާ ކަސްޓަމަރުންނަށް ފަސޭހައިން ބޭނުން ކުރެވޭގޮތަށް ޑިޒައިން ކޮށްފައިވާ މި ވެބްސައިޓުން ފިހާރައިން ލިބެން ހުރި ތަކެއްޗާއި ހުސްވެފައި ހުރި ތަކެތި އެނގެން ހުންނާނެ އެވެ. އަދި "ޝޮޕިން ކާޓަށް" ލާ ތަކެތީގެ ޖުމްލަ އަގު ވެސް އެނގެން ހުންނާނެ އެވެ.

މި ވެބްސައިޓު މެދުވެރިކޮށް ވިޔަފާރި ކުރާ ކަސްޓަމަރުންނަށް ބީއެމްއެލް ގޭޓްވޭ މެދުވެރިކޮށް ފައިސާ ދެއްކޭނެވެ. އަދި ވެބްސައިޓުން ގަންނަ ހުރިހާ މުދަލެއް އެ ފިހާރައިން ހިލޭ ޑެލިވާ ކޮށްދޭނެ އެވެ.

ވީބީން އަންނަނީ އެ ކުންފުނީގެ ކަސްޓަމަރުންނަށް އިތުރު ލުއިތަކެއް ހޯދައިދިނުމަށް މޯބައިލް އެޕްލިކޭޝަނެއް ތައާރަފު ކުރުމަށް ވެސް މަސައްކަތް ކުރަމުންނެވެ. މި އެޕްލިކޭޝަން މި އަހަރު ތެރޭގައި ތައާރަފު ކުރެވޭނެ ކަމަށް އެ ކުންފުނިން ބުންޏެވެ.