ކޮވިޑް-19: ހާލުބޮޑުވާ މީހުންނަށް ފަރުވާދޭން ހުރީ ދަރުމަވަންތަ އެކަނި

ކޮވިިޑް-19 ޖެހޭ ބަލި މީހެއްގެ ހާލުބޮޑުވެގެން ފަރުވާދޭން ޖެހިއްޖެ ހާލަތެއްގައި ފަރުވާދޭން މިވަގުތު ހުރީ ދަަރުމަވަންތަ ހޮސްޕިޓަލް އެކަނި ކަމަށް ސަރުކާރުން މިރޭ ބުނެފި އެވެ.

ކޮވިޑްް-19 ކޮންޓްރޯލްކުރަން ރާއްޖޭން ކުރާ މަސައްކަތުގެ ތަރުޖަމާނު، ރައީސް އޮފީހުގެ އަންޑަ ސެކްރެޓަރީ މަބްރޫކް އަބްދުލް އަޒީޒު، ދަރުބާރުގޭގައި މިރޭ ބޭއްވި ޕްރެސްކޮންފަރެންސްގައި ބައިވެރިވެވަޑައިގެންނެވި އައިޖީއެމްއެޗްގެ އެތެރެހަށީގެ ބަލިތަކަށް ހާއްސަ ޑޮކްޓަރު މޫސާ މުރާދު ވިދާޅުވީ ދަރުމަވަންތަ ހޮސްޕިޓަލްގެ 11 ވަނަ ފަންގިފިލާ ހާއްސަކޮށްފައި ވަނީ ކޮވިޑް-19 ޖެހޭ މީހުންގެ ތެރެއިން ހާލުބޮޑުވާ މީހުންނަށް ފަރުވާ ކުރަން ކަމަށެވެ. އެތަނުގައި ހުރީ އެއްފަހަރާ 10 މީހަކަށް ފަރުވާ ދެވޭނެ އިންތިޒާމް ކަމަށް ވެސް އޭނާ ވިދާޅުވި އެވެ.

"މި[ބަލީގެ] ކޭސްތައް އިތުރުވަމުންދާ ކަމުގައި ވަންޏާ އެ ނިސްބަތުން އަޅުގަނޑުމެންނަށް ދެން ހުރި ރިސޯސްތައް ބޭނުންކުރަން ޖެހޭނީ. މިސާލަކަށް އައިޖީއެމްއެޗްގެ މެއިން އައިސީޔޫ ވެސް ހުސްކުރަން ޖެހިދާނެ މިސާލަަކަށް އިތުރު ކޭސަސް އަންނަ ކަމުގައި ވަންޏާ،" އޭނާ ވިދާޅުވި އެވެ.

މުރާދު ވިދާޅުވީ މިފަދަ ބައްޔެއް ޖެހޭ މީހުން ކުއްލިއަކަށް ގިނަވެގެންދާ ހާލަތުގައި ދުނިޔޭގެ ހުރިހާ ގައުމެއްގައި ވެސް އެކަން ގޮންޖެހުމަަކަށް ވެގެންދާ ކަމަށާއި އެފަދަ ހާލަތްތަކުގައި އަމަލުކުރާނެ އުސޫލުތައް ވެސް ކަނޑައަޅާފައިވާ ކަމަށެވެ.

"ކޮންމެ ގައުމެއްގައި ވެސް ޕްރޮސީޖާތަކެއް އެ ހަދަނީ މިސާލަކަށް އެކަހަލަ ސިޗުއޭޝަނަކަށް ގޮސްފިއްޔާ ކޮން ބަޔަކަށްތޯ އިސްކަން ދޭނީ ޓްރީޓްކުރުމުގައި، އެކަހަލަ އެސްއޯޕީތަކެއް ހުރޭ ހަމަ އެކަނި ކޮވިޑާ ގުޅިގެނެނެއް ނޫން،" މުރާދު ވިދާޅުވި އެވެ.

ހާލުބޮޑު މީހުންނަށް ފަރުވާކުރުމުގެ ގާބިލުކަމާ މެދު ނޫސްވެރިއަކު ކުރި ސުވާލަކަށް ޖަވާބު ދެއްވަމުން މަބްރޫކް ވިދާޅުވީ އައިސީޔޫގައި ފަރުވާ ދޭން ޖެހޭ މީހުންނަށް ފަރުވާ ކުރުމުގެ ގާބިލުކަން އިތުރުކުރަން ސަރުކާރުން މަަސައްކަތް ކުރަމުން އަންނަ ކަމަށެވެ.

ދަރުމަވަންތަ ހޮސްޕިޓަލްގެ 11 ވަނަ ފަންގިފިލާގައި އެއް ފަހަރާ ފަރުވާ ދެވެނީ 10 މީހުންނަށް ކަމަށް ވާއިރު، ރާއްޖޭގައި އެބަލީގެ އަށް މީހަކު މިވަގުތު ވެސް އެބަތިއްބެވެ. އަދި އޭގެ ތެރެއިން އެކަކަށް މިހާރު ވެސް ފަރުވާ ދެމުން އަންނަނީ އެތަނުގަ އެވެ.

ބިދޭސީ އެމީހާ ދަރުމަވަންތަ ހޮސްޕިޓަލަށް ބަދަލުކުރީ އޭނާގެ ފުއްޕާމޭގައި މައްސަލަތަކެއް ހުރުމާ އެކު އޭނާ އަކީ އުމުރުން 70 އަހަރު ވެފައިވާ މީހަކަށް ވާތީ، ހާލަތު ކައިރިން ބަލަން ޖެހޭތީ އެވެ.

ކޮވިޑްގެ ތަފާސް ހިސާބު

ޕޮޒިޓިވް:8

ޓެސްޓް ކުރި 86

ނެގެޓިވް: 76

ނަތީޖާ ނުލިބޭ: 2

ފަރުކޮޅުފުށި އައިސޮލޭޝަންގައި: 16

ވިލިވަރުގައި ކަރަންޓީނުކޮށްފައި: 13