ކޮވިޑް-19: ރާއްޖޭގައި އިމަޖެންސީ ސެންޓަރެއް ގާއިމްކޮށްފި

އެކި ގައުމުތަކުގައި ކޮވިޑް-19 ހަލުވިކަމާ އެކު ފެތުރެމުންދާތީ އެކަމުން ސަލާމަތްވެ ތިބުމަށް ކުރަންޖެހޭ މަސައްކަތްތަކަށް ރާއްޖޭގައި އިމަޖެންސީ އޮޕަރޭޝަންސް ސެންޓަރެއް ގާއިމްކޮށްފި އެވެ.

ސަރުކާރުން މިއަދު ބުނީ ރައީސް އިބްރާހިމް މުހައްމަދު ސޯލިހުގެ އިރުޝާދުގެ ދަށުން ހެލްތު ޕްރޮޓެކްޝަން އިމަޖެންސީ (އެޗްޕީއޭ) އާއި ނޭޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) ގުޅިގެން އިމަޖެންސީ އޮޕަރޭޝަން ސެންޓަރެއް ގާއިމް ކޮށްފައިވާ ކަމަށެވެ.

"މި މަސައްކަތުގައި ދިވެހި ރާއްޖެ އޮތް ހާލަތު ބަލައި މި މުއައްސަސާތަކަށް ގާނޫނުން މަތިކުރާ ޒިންމާ އަދާކުރުމުގައި ދަނީ ހާއްސަ ފިޔަވަޅުތަކެއް އަޅަމުން،" ބަޔާނުގައި ބުނެފައިވެ އެވެ.

އެޗްޕީއޭ އާއި އެންޑީއެމްއޭގެ އިތުރުން ހެލްތް މިނިސްޓްރީ ގުޅިގެން ގައުމީ ފެންވަރެއްގައި މަސައްކަތްތަކެއް ކުރުމަށް ނިންމާފައިވާ ކަމަށް ބަޔާނުގައި ވެ އެވެ.

ސަރުކާރުން މިހާރު ނިންމާފައި ވަނީ މާލޭގައި ޓްރެވަލް ކްލިނިކެއް ގާއިމް ކުރުމަށެވެ. އެ ކްލިނިކުގެ ބޭނުމަކީ ރާއްޖޭން ބޭރަށް ދަތުރުކޮށްފައި އަންނަ މީހުން ކޮވިޑް-19 އަށް ޓެސްޓް ކުރުމެވެ.

އަދި މިދުވަސްވަރު ފެތުރެމުންދާ އެހެން ރޯގާ ތަކަށް ހާއްސަ ކޮށްގެން ފުލޫ ކްލިނިކެއް ސެނަހިޔާގައި ވަރަށް އަވަހަށް ހުޅުވާނެ ކަމަށް ވެސް އެންޑީއެމްއޭ އިން ބުންޏެވެ.

ކޮވިޑް-19 އަށް ހާއްސަކޮށްގެން މާލޭގައި ޑްރިލްއެއް މިއަދު ބޭއްވުމަށް ވަނީ ނިންމައިފަ އެވެ. އެ ޑްރިލް ބާއްވަނީ މީހުން ދިރިއުޅޭ ތަނެއްގައި ހުރި މީހަކު ކޮވިޑް-19 އަށް ޕޮޒިޓިވް ވުމުން އަމަލު ކުރާނެ ގޮތަށް ފަރިތަ ކުރުމަށެވެ.

ކޮވިޑް-19 މިހާތަނަށް 88،000 އަށް ވުރެ ގިނަ މީހުންނަށް ޖެހި 3،000 އަށް ވުރެ ގިނަ މީހުން ވަނީ މަރުވެފަ އެވެ. ރާއްޖެ އިން މިހާތަނަށް އެ ވައިރަސް ފެނިފައި ނުވިޔަސް، ރައްކާތެރިކަމުގެ ވަރަށް ގިނަ ފިޔަވަޅުތައް ވަނީ އަޅައިފަ އެވެ. އަދި ކޮވިޓް-19 ފެނުނު ޗައިނާ އިން މީހުން އައުން ވަނީ މަނާކޮށްފަ އެވެ. މީގެ އިތުރުން އީރާނުންނާއި ސައުތު ކޮރެއާގެ ދެ ސަރަހައްދަކުން ވެސް ރާއްޖެ އަށް މީހުން މިހާރު މަނަލެވެ. އަދި ކްރޫޒްލައިނާތައް ރާއްޖެ އައުން ވެސް މިހާރު ވަނީ މެދުކަނޑާލައިފަ އެވެ.