ސާއިދު އެއް ވަނަ ހޯދިއިރު، ޒުވާން ދުވުންތެރިން ވިދާލައިފި

ގައުމީ އެތުލެޓިކްސް މުބާރާތުގެ 100 މީޓަރު ދުވުމުން އެއް ވަނަ މަގާމް ރާއްޖޭގެ އެންމެ ބާރު ދުވުންތެރިޔާ ހަސަން ސާއިދު މިއަދު ފަސޭހަކަމާ އެކު ދިފާއުކުރިއިރު، ރާއްޖޭގެ އެންމެ ބާރު އެއް އަންހެން ދުވުންތެރިޔާ އަފާ އިސްމާއިލްގެ މައްޗަށް ކުރި ހޯދައި އަންހެނުންގެ 100 މީޓަރު ދުވުމުން އެއް ވަނަ ނަޝާ ނިޒާރު ހޯދައިފި އެވެ.

މި މުބާރާތުން މީގެ އަށެއްކަ އަހަރު ކުރިން ވިދާލި ސާއިދު، ބައިނަލްއަގްވާމީ މައިދާނުގައި ބޮޑެތި ކާމިޔާބީތައް ހޯދާފައިވާއިރު އޭނާ މިއަދުގެ ރޭސް ކާމިޔާބުކުރީ 11 ސިކުންތުން ދުވެގެންނެވެ. މި އިވެންޓުން ސާއިދު 10.33 ސިކުންތުން ދުވެ ގައުމީ ރެކޯޑް ހަދާފައިވީ ނަމަވެސް ބައިނަލްއަގްވާމީ މުބާރާތްތަކުގައި އޭނާ ވާދަކުރާ ދުވުންތެރިންނާ ބަލާއިރު، މިއަދު އޭނާއާ ވާދަކުރީ އެވްރެޖް ދުވުންތެރިންނަށް ވުމުން ޓައިމިން ދަށްވީ އެވެ.

ސާއިދުގެ ފަހަތުން މި އިވެންޓުން ދެ ވަނަ ހޯދީ ރާއްޖޭގެ ކުރީގެ އެއް ވަނަ ދުވުންތެރިޔާ އަޒްނީމް އަހުމަދު (އައްޒަ) ފަހަތަށް ޖައްސާލުމަށް ފަހު ތިނަދޫ ޒުވާނުންގެ ކްލަބުގެ އުއްމީދީ ދުވުންތެރިޔާ ސަރީސް އަހުމަދެވެ. އޭނާ 11.38 ސިކުންތުން ދުވިއިރު، ހީޓުގައި ސާއިދަށް އެންމެ ބޮޑަށް ޗެލެންޖެއް ދިނީ ވެސް ސަރީސެވެ. ސައުތު އޭޝިއަން ޖޫނިއާ ޗެމްޕިއަންޝިޕަށް ކޮލިފައިވާން އެސޯސިއޭޝަނުން ކަނޑައަޅާފައިވާ ވަގުތަށް އޭނާ ރޭސް ނިންމުމުން އޭނާ އަށް ވަނީ އެ މުބާރާތުގައި ރާއްޖެ ތަމްސީލްކުރުމުގެ ފުރުސަތު ލިބިފަ އެވެ.

ތިނަދޫ ޒުވާނުންގެ ކްލަބަށް ދުވި އައްޒަ ރޭސް ނިންމީ 11:45 ސިކުންތުންނެވެ. ރާއްޖޭން 2010 ވަނަ އަހަރުގެ ސައުތު އޭޝިއަން ގޭމްސްގެ ރިލޭ އިން ލޯ މެޑަލް ހޯދިއިރު ދުވި އަދި އޮލިމްޕިކްސްގެ ޕްރިލިމިނަރީ ބުރެއް ފަހަނައަޅައި ދިޔަ ފުރަތަމަ ދިވެހި އެތުލީޓުގެ ޝަރަފް ހޯދާފައިވާ އައްޒަ މިދިޔަ އަހަރު އަލުން ދުވަން ފެށީ ދުވުމާ އަހަރުތަކެއް ދުރުގައި ހުރުމަށް ފަހު އެވެ.

ކަސްޓަމްސް ރިކްރިއޭޝަން ކްލަބުގެ ނަޝާ އަންހެހުންގެ 100 މީޓަރުގެ ރޭސް ކާމިޔާބުކުރީ ފައިނަލުގައި 13:18 ސިކުންތުން ރޭސް ނިންމައިގެންނެވެ. މި އިވެންޓުން ރާއްޖޭގެ ގައުމީ ރެކޯޑް ހަދާފައިވާ ސަމްހާ އަހުމަދު މުބާރާތުގައި ވާދަނުކުރެ އެވެ. ނަޝާގެ ފަހަތުން ދެ ވަނަ ހޯދީ ރާއްޖޭގެ 200 މީޓަރު ދުވުމުން ރެކޯޑް އޮންނަ އަފާ އިސްމާއިލެވެ. އެންމެ ފަހުގެ އިންޑިއަން އޯޝަން އައިލެންޑް ގޭމްސް އާއި ސައުތު އޭޝިއަން ގޭމްސްގައި ދުވި، ކަސްޓަމްސްގެ އަފާ ރޭސް ނިންމީ 13:21 ސިކުންތުންނެވެ. ތިން ވަނަ ހޯދީ ރާއްޖޭގެ ކުރީގެ ޔޫތު ލެވެލްގެ އުއްމީދީ ދުވުންތެރިޔާ ޒިފިއަސް ސްޕޯޓްސް ކްލަބުގެ މިރުފަތު އަހުމަދެވެ. އޭނާގެ ޓައިމިން އަކީ 13:38 ސިކުންތެވެ.

މިއަދުގެ އެހެން އިވެންޓްތަކަށް ބަލާއިރު އަންހެނުންގެ ޑިސްކަސް އުކުމުން އެއް ވަނަ ހޯދީ ދިވެހި ސިފައިންގެ ކްލަބުގެ ޝިފްލާ އަބްދުއްލަތީފެވެ. ދެ ވަނަ އެ ކްލަބުގެ އައިޝަތު ރިޝްމާ ހޯދިއިރު ތިން ވަނަ އަކީ ރަނާސް މޯލްޑިވްސް ތަމްސީލްކުރި މަޝްހޫރު ބެޑްމިންޓަން ކުޅުންތެރިޔާ މައިސާ ފަތުހުﷲ އިސްމާއިލެވެ.

ފިރިހެނުންގެ ޝޮޓްޕުޓް އުކުމުން އެއް ވަނަ ހޯދީ ރާއްޖޭގެ އެންމެ ކާމިޔާބުކުރި ޝޮޓްޕުޓް އުކުންތެރިޔާ ސިފައިންގެ ކްލަބުގެ ހަސަން ޝައްމޫނެވެ. އެ ޓީމުގެ މޫސާ ފަޒްލީން ދެ ވަނަ ހޯދިއިރު ތިން ވަނަ މަގާމް ލިބުނީ މޭޑް ރަނާސްގެ މުހައްމަދު މައިއާޒަށެވެ.

ފިރިހެނުންގެ ލޯންގް ޖަމްޕް ފައިނަލް ވެސް މިއަދު ހަވީރު އޮތެވެ. މި އިވެންޓުގެ އެއް ވަނަ އަކީ ތިނަދޫގެ މުހައްމަދު ހަނާމް އިސްމާއިލެވެ. ކޭވައި ސްޕޯޓްސް އެކަޑަމީ ތަމްސީލްކުރި ނިފާހު އަލީ ދެ ވަނަ ހޯދިއިރު ތިން ވަނަ އަކީ ދުވުމުން އެއް ވަނަ ހޯދި ސާއިދެވެ.

ސިފައިންގެ ކްލަބުގެ ޝައްމޫން ވަނީ ޖަވެލިން އުކުމުން ވެސް އެއް ވަނަ މަގާމް ދިފާއުކޮށްފަ އެވެ. އޭނާގެ ފަހަތުން ދެ ވަނަ ހޯދީ އޭނާއާ އެކު ސިފައިންގެ ޓީމު ތަމްސީލްކުރި ފަޒްލީލެވެ. ތިން ވަނަ އަކީ ތިނަދޫގެ އިބްރާހިމް މާޒިން އެވެ.

މިރޭ ކުރިއަށް ދިޔައީ ފިރިހެނުންގެ 400 މީޓަރު ދުވުމުގެ ހީޓްތަކެވެ. ފުރަތަމަ ހީޓުން ގަދަ ތިން ދުވުންތެރިންގެ ގޮތުގައި ފައިނަލަށް ކޮލިފައިވީ 52:57 ސިކުންތުން ރޭސް ނިންމި ސިފައިންގެ ކްލަބުގެ ހުސެއިން އިނާޝާއި 52:71 ސިކުންތުން ރޭސް ނިންމައި ދެ ވަނަ ހޯދި ތިނަދޫގެ އިބްރާހިމް މުހައްމަދާއި 52.17 ސިކުންތުން ރޭސް ނިންމައި ތިން ވަނަ ހޯދި ރަނާސް މޯލްޑިވްސްގެ އަހުމަދު އަލީ އެވެ. މީގެ އިތުރުން 52:59 ސިކުންތުން ދުވެ، ހަތަރު ވަނަ އަށް ރޭސް ނިންމި ފުވައްމުލަކުގެ މުހައްމަދު ޝަޒީން ޖިހާދާއި 57:35 ސިކުންތުން ރޭސް ނިންމައި ފަސް ވަނަ ހޯދި ކޭވައި ސްޕޯޓްސް އެކަޑަމީގެ އަހުމަދު ލުޖެއިން އަށް ވެސް ވަނީ ފައިނަލުން ފުރުސަތު ލިބިފަ އެވެ.

ދެ ވަނަ ހީޓުން ފައިނަލުން ޖާގަ ހޯދީ ތިން ދުވުންތެރިއެކެވެ. އެއީ 55:44 ސިކުންތުން ރޭސް ނިންމައި އެއް ވަނަ ހޯދި ތިނަދޫގެ މުހައްމަދު މުނާޒް އަލީ އާއި 55:79 ސިކުންތުން ރޭސް ނިންމައި ދެ ވަނަ ހޯދި ފުވައްމުލަކުގެ އިބްރާހިމް ޝަހީރު މޫސާގެ އިތުރުން ތިން ވަނަ ހޯދި ރަނާސް މޯލްޑިވްސްގެ އާދަމް އަނީފް ސޮލާހެވެ. އޭނާގެ ޓައިމިން އަކީ 56:25 ސިކުންތެވެ.

ކުޅިވަރު އެކުވެނީގެ ޓްރެކް ދަނޑުގައި މުބާރާތް ކުރިއަށްދާނީ މިއަދުން ފެށިގެން ހޮނިހިރު ދުވަހުގެ ނިޔަލަށެވެ.