ގައުމީ މުބާރާތުގެ އެއްވަނަ އެތުލީޓުންނަކީ ޖައިޝާ އަދި ސާއިދު

ގައުމީ މުބާރާތުގެ އެންމެ މޮޅު އެތުލީޓުންގެ އެވޯޑް، އެއްވަނަ ޑިސްޓެންސް ދުވުންތެރިޔާ އާމިނަތު ޖައިޝާ ޖުނީޒް އާއި ސްޕްރިންޓް ރޭސްތަކުގައި އެންމެ ބާރު ދުވުންތެރިޔާ ހަސަން ސާއިދު ހޯދައިފި އެވެ.

މިދިޔަ މަހު ބޭއްވި އެސޯސިއޭޝން ކަޕުގެ އެއްވަނަ ހޯދި އެތުލީޓް ސާއިދު ވަނީ މިދިޔަ އަހަރު ގައުމީ މުބާރާތުގައި އޭނާ ހޯދި މަގާމު މި އަހަރު ވެސް ދަމަހައްޓައިފަ އެވެ.

މިފަހަރުގެ ގައުމީ މުބާރާތުގައި ވެސް ސާއިދު ވަނީ އިންޑަވިޖުއަލް އެންމެ ތިން ކެޓަގަރީގެ އިތުރުން ރިލޭގެ ދެ އިވެންޓްގައި ދިވެހި ސިފައިންގެ ކްލަބްގެ ޓީމުގައި ވާދަކޮށްފަ އެވެ. އެ ހުރިހާ ކެޓަގަރީ އަކުން ވެސް ސާއިދު ވަނީ ރަން މެޑަލް ހޯދައި ޖުމުލަ ފަސް ރަން މެޑަލް ކަރުގައި އަޅުވައިލައިފަ އެވެ.

ސްޕްރިންޓް ރޭސް ތަކުގައި ދެކުނު އޭޝިއާގައި ވެސް ފާހަގަ ކުރެވޭ ދުވުންތެރިޔާ ވަނީ ގައުމީ މުބާރާތުގެ 100 މީޓަރު، 200 މީޓަރު އަދި 400 މީޓަރުގެ އިތުރުން ރިލޭގައި 400 ގުނަ 100 އާއި 4 ގުނަ 400 ގައި ވާދަކޮށްފަ އެވެ.

ޑިސްޓެންސް ދުވުންތެރިންނަށް އެއްވަނަ އެތުލީޓްގެ މަގާމު ހޯދުން އަބަދު ވެސް އޮންނަނީ އުނދަގޫ ކަމަށް ވެފަ އެވެ. އެކަމަކު މިދިޔަ އަހަރު ގްރޯން ޕްރީގައި ވެސް އެންމެ މޮޅު އެތުލީޓްގެ މަގާމު ހޯދި ޖައިޝާ ވަނީ ގައުމީ މުބާރާތުގައި އެންމެ މޮޅު އެތުލީޓްގެ މަގާމު ފުރަތަމަ ފަހަރަށް ހޯދައިފަ އެވެ.

ޑިސްޓެންސްގެ ތިން ކެޓަގަރީގެ އިތުރުން ޖައިޝާ ވަނީ އަންހެނުންގެ 4 ގުނަ 100 މީޓަރު އިވެންޓްގައި ޓްރެކް އެންޑް ފީލްޑްގެ ޓީމު ތަމްސީލިު ކޮށްފަ އެވެ. އިންޑަވިޖުއަލް ތިން ރޭހުން އޭނާ ވަނީ ރަން މެޑަލް ހޯދައިފަ އެވެ. ރިލޭގައި ލިބުނީ ރިހި މެޑަލް އެވެ.

ޑިސްޓެންސް ރޭސްތަކުގައި ޖައިޝާ ވަނީ 5،000 މީޓަރު، 1،500 މީޓަރު އަދި 800 މީޓަރުން އެއްވަނަ ހޯދައިފަ އެވެ. 5000 މީޓަރުގެ ރޭސް އޭނާ ކާމިޔާބު ކުރީ ގައުމީ ރެކޯޑަކާ އެކު އެވެ. އިންޑިއަން އޯޝަން އައިލެންޑް ގޭމްސްގައި 2019 ވަނަ އަހަރު މަރްޔަމަ އަބްދުލް ކަރީމް (މަރީ) ހެދި ރެކޯޑް ޖައިޝާ މިދިޔަ ބުރާސްފަތި ދުވަހު މުގުރާލީ 19 މިނެޓާއި 43.09 ސިކުންތުން ރޭސް ނިންމައިގެންނެވެ. އޭރު މަރީ ރެކޯޑް ހެދީ 20 މިނެޓާއި 10.30 ސިކުންތުންނެވެ.

ފިރިހެން ޑިވިޝަންގައި އެންމެ މޮޅު ކްލަބަކަށް ހޮވުނީ އަބަދު ވެސް އެ މަގާމު ދަމަހައްޓަމުން އަންނަ ދިވެހި ސިފައިންގެ ކްލަބެވެ. އަންހެން ޑިވިޝަންގެ އެންމެ މޮޅު ކްލަބްގެ މަގާމު ހޯދީ ޓްރެކް އެންޑް ފީލްޑެވެ.