އެޓަލާންޓާ އާއި އެތުލެޓިކޯ މެޑްރިޑް ދެ ވަނަ ބުރަށް

މެޑްރިޑް (ޑިސެމްބަރު 12) – ގްރޫޕުގެ ފުރަތަމަ ތިން މެޗުން ބަލިވި އިޓަލީގެ އެޓަލާންޓާ އަދި ސްޕެއިނުގެ އެތުލެޓިކޯ މެޑްރިޑުން، ފަހު މެޗުތަކުން މޮޅުވެ ޔުއެފާ ޗެމްޕިއަންސް ލީގުގެ ދެ ވަނަ ބުރުން ރޭ ފުރުސަތު ހޯދައިފި އެވެ.

އިޓަލީގެ އާދައިގެ ޓީމެއްގެ ގޮތުގައި އޮތް އެޓަލާންޓާ އިން އަލަށް ޗެމްޕިއަންސް ލީގުން ފުރުސަތު ހޯދި ފަހަރު ފުރަތަމަ ތިން މެޗުން ބަލިވުމުން ބެލެވުނީ ކެޓީ ކަމަށެވެ. އެކަމަކު ރޭ ޔޫކްރޭގެ ޝަކްތާ ޑޮނެޓްސްކް އަތުން 3-0 އިން މޮޅުވެ ހަތް ޕޮއިންޓް ހަމަކޮށް ގްރޫޕް ސީ ގެ ދެ ވަނަ ޓީމުގެ ގޮތުގައި ދެ ވަނަ ބުރުން ފުރުސަތު ހޯދީ އެވެ. މި ގްރޫޕުގެ އެއް ވަނަ ޓީމުގެ ގޮތުގައި އިނގިރޭސި ޗެމްޕިއަން މެންޗެސްޓާ ސިޓީ ވަނީ ކުރިން ފުރުސަތު ހޯދައިފަ އެވެ. އެ ޓީމު ވަނީ ފަހު މެޗުގައި ރޭ ކްރޮއޭޝިއާގެ ޑައިނަމޯ ޒެގްރެބް 4-1 އިން ބަލިކޮށް 14 ޕޮއިންޓް ހަމަކޮށްފަ އެވެ. ޒެގްރެބްގެ ޑެނިއަލް އޮލްމޯ ފުރަތަމަ ގޯލް ޖެހި ނަމަވެސް ސިޓީގެ ގެބްރިއަލް ޖީސުސްގެ ހެޓްރިކާއި ފިލިޕް ފޮޑެންގެ ގޯލުން ސިޓީ މެޗުން މޮޅުވީ އެވެ.

މި ގްރޫޕުގެ ތިން ވަނަ ޓީމުގެ ގޮތުގައި ހަ ޕޮއިންޓާ އެކު ޔުރޮޕާ ލީގުން ފުރުސަތު ހޯދީ ޝަކްތާ އެވެ. ޒެގްރެބް ދިޔައީ ފަސް ޕޮއިންޓް ލިބިގެން ފުލަށެވެ.

މިދިޔަ ފަސް އަހަރުގެ ތެރޭ ދެ ފަހަރު ފައިނަލުގައި ވާދަކުރި އެތުލެޓިކޯ އިން ގްރޫޕް ޑީ ގެ ދެ ވަނަ ޓީމުގެ ގޮތުގައި ދެ ވަނަ ބުރުން ފުރުސަތު ހޯދީ ރަޝިއާގެ ލޮކޮމޯޓިވް މޮސްކޯ އަތުން 2-0 އިން މޮޅުވެ 10 ޕޮއިންޓް ހަމަކޮށްގެންނެވެ. އަމިއްލަ ދަނޑުގައި ކުޅުނު މެޗުގައި އެތުލެޓިކޯ އަށް ގޯލް ޖަހައިދިނީ ޔޮއާއޯ ފެލިކްސް އާއި ފެލިއްޕޭ އެވެ.

މި ގްރޫޕުގެ އެއް ވަނަ މަގާމް 16 ޕޮއިންޓާ އެކު ހޯދި ޔުވެންޓަސް ވަނީ ރޭ ޖަރުމަނުގެ ބެޔާ ލެވަކޫސަން އަތުން 2-0 އިން މޮޅުވެފަ އެވެ. ރޭ ބަލިވި ނަމަވެސް ލެވަކޫސަން ވަނީ ހަ ޕޮއިންޓާ އެކު ތިން ވަނަ ޓީމުގެ ގޮތުގައި ޔުރޮޕާ ލީގުން ފުރުސަތު ހޯދައިފަ އެވެ. ފުލަށް ދިޔައީ ތިން ޕޮއިންޓާ އެކު މޮސްކޯ އެވެ.