މަންޓާ އެއާގެ ތިން ވަނަ މަންޒިލަކަށް ކޫއްޑޫ!

އެއާލައިން ހިންގުމުގެ ދާއިރާގައި ބޮޑު ކާމިޔާބީއެއް ހޯދަމުން އަންނަ މަންޓާ އެއާގެ ތިން ވަނަ މަންޒިލެއްގެ ގޮތުގައި، ދަތުރުތައް ގއ. ކޫއްޑު އަށް ފަށައިފި އެވެ.

އެ އެއާލައިނުން މީގެ ކުރިން ދަތުރުކުރަމުން އައީ ދ. އަތޮޅާއި ބ އަތޮޅަށެވެ.

ދަތުރުތައް ކޫއްޑު އަށް ފަށަން ބޭއްވި ރަސްމިއްޔާތު ޝަރަފްވެރި ކޮށްދެއްވީ މޯލްޑިވްސް އެސޯސިއޭޝަން އޮފް ކޮންސްޓްރަކްޝަން އިންޑަސްޓްރީ (މަސީ)ގެ ކުރީގެ ރައީސް މުހައްމަދު އަލީ ޖަނާހު (ޖަނާ) އެވެ. އޭނާ އަކީ އެ އެއާޕޯޓު ހިންގާ ކޭއެޗްއޭގެ ސީއީއޯ އެވެ.

ޖަނާ ވަނީ ކޫއްޑޫގައި އެއާޕޯޓެއް އަޅަން އޭނާ އިސްނަންގަވައި ކުރެއްވި މަސައްކަތްތައް އެ ރަސްމިއްޔާތުގައި ހިއްސާކުރައްވައިފަ އެވެ. ކޫއްޑޫގެ އެއާޕޯޓުގެ ހިދުމަތް ފެށީ 2012ގަ އެވެ.

"ވަރަށް ގިނަ މީހުން ބުނި، މި އެއާޕޯޓެއް ސަސްޓެއިނެއް ނުކުރެވޭނެ އޭ. އެހާ ގިނަ އެއާލައިންތަކެއް ދަތުރެއް ނުކުރާނެއޭ،" އޭނާ ވިދާޅުވި އެވެ.

ގއ. އަތޮޅުގައި 1،200 ޓޫރިސްޓް އެނދު ގާއިމްކޮށްފައިވާ އިރު ކޮންމެ ދުވަހަކު އެ އެއާޕޯޓަށް ހަތް ފްލައިޓް ޖައްސާކަމަށް އޭނާ ވިދާޅުވި އެވެ. މަންޓާގެ ދަތުރުތައް ފަށާފައިވާތީ ކޫއްޑޫ އެއާޕޯޓުގެ ހިދުމަތްތައް އިތުރަށް ފުރިހަމަ ވެގެންދާނެ ކަމަށާއި މި އެއާޕޯޓުގައި ކޮންމެ ދުވަހަކު 15 ފްލައިޓް ޖެއްސުމުގެ އަމާޒު ހާސިލުވާނެ ކަމުގެ ފޮނި އުންމީދު އިތުރަށް އާލާވެއްޖެ ކަމަށް އޭނާ ވިދާޅުވި އެވެ.

މަންޓާގެ ސީއީއޯ މުހައްމަދު ހަލީލު ވިދާޅުވީ، ރާއްޖޭގެ އޭވިއޭޝަން ދާއިރާއަށް އިންގިލާބީ ބޮޑެތި ބަދަލުތަކެއް ގެންނެވުމަށް މަސައްކަތް ކުރައްވާނެ ކަމަށެވެ. މަތިންދާ ބޯޓުން ކުރާ ދަތުރުތަކުގައި އެންމެ ބޭނުންވާ ފަދަ ތަޖުރިބާ ހޯދައިދެއްވަން ވެސް މަސައްކަތްތަކެއް ފައްޓަވާފައިވާ ކަމަށް ވިދާޅުވި އެވެ.

"ހަމައެކަނި އަޅުގަނޑުމެން މަސައްކަތް ކުރަނީ އާމްދަނީއެއް ހޯދުމަކަށް ނޫން. ކަސްޓަމަރުންނަށް ރަނގަޅު އެކްސްޕީރިއެންސެއް ދިނުމަކީ އެންމެ އިސްކަންދޭ ކަންކަން،" އޭނާ ވިދާޅުވި އެވެ.

އެހެން އެއާލައިންތަކާ ހިލާފަށް މަންޓާ އެއާގެ ދަތުރުތައް ހަ މަސް ކުރިން ޝެޑިއުލް ކުރާ ކަމަށް އޭނާ ވިދާޅުވި އެވެ. އެހެން ކަމުން ދުނިޔޭގެ ކޮންމެ ހިސާބަކު ހުރެގެން ވެސް ޓިކެޓްތައް ބުކް ކުރެވޭނެ ކަމަށް އޭނާ ވިދާޅުވި އެވެ. އޭނާ ވިދާޅުވި ގޮތުގައި އޭވިއޭޝަން ހިދުމަތްތައް ވީހާ ވެސް ފަސޭހަ ކުރުމަށްޓަކައި ޓެކްނޮލިޖީއަށް ވަރަށް ބޮޑަށް އަންނަނީ އިންވެސްޓް ކުރަމުންނެވެ.

ކަސްޓަމަރުންނަށް އަމިއްލައަށް ޗެކިން ވެވޭނެ އިންތިޒާމުތައް ހަމަޖެއްސުމުގެ މަސައްކަތް ކުރަމުންދާ ކަމަށާއި އެ ޚިދުމަތް ފެށުމުން މަންޓާ ވާނީ ރާއްޖޭގައި އެފަދަ ނިޒާމެއް ގާއިމް ކުރާ ފުރަތަމަ އެއާލައިނަށް ކަމަށް އޭނާ ވިދާޅުވި އެވެ.

ކޫއްޑު އަށް ކޮންމެ ދުވަހަކު މަންޓާގެ ދެ ދަތުރު ކުރަން ޝެޑިއުލްކޮށްފައިވެ އެވެ. އަންނަ ޖެނުއަރީ 31 ގެ ނިޔަލަށް މަންޓާ އެއާ މެދުވެރިކޮށް ކުއްޑޫއަށް 829ރ. އަށް ދަތުރު ކުރެވޭނެ އެވެ.

މަންޓާ އެއާ ތިން ވަނަ މަންޒިލަކަށް ދަތުރުތައް ފަށާފައިވާ އިރު އެއާލައިނުން ވަނީ މިހާރު ސީ ޕްލޭންގެ ދަތުރުތައް ވެސް ފަށައިފަ އެވެ.