ޖާބިރުގެ ރުޅި އެމްޑީޕީ އަށް: މަޖިލިހަކީ ޕާޓީގެ ހަރުގެއެއް ނޫން!

ރައްޔިތުންގެ މަޖިލިހަކީ އެމްޑީޕީގެ "ހަރުގެއެއް" ނޫން ކަމަށް ވިދާޅުވެ މަޖިލިހުގެ ކާށިދޫ ދާއިރާގެ ޑީއާރުޕީގެ މެމްބަރު އަބްދުﷲ ޖާބިރު އެ ޕާޓީ އަށް މިއަދު ފާޑު ވިދާޅުވެއްޖެ އެވެ.

ސަރުކާރުން ރައްޔިތުންގެ މަޖިލިހަށް ހުށަހެޅި އާމްދަނީން ޓެކްސް ނެގުމުގެ ބިލަށް މަޖިލިހުގައި ބަހުސް ކުރައްވައި ޖާބިރު ވިދާޅުވީ މަޖިލިސް "އޮޕަރޭޓް" ކުރަން ވާނީ އަހުލާގީ މިންގަނޑެއްގެ ތެރެއިން ކަމަށެވެ. މަޖިލިހަށް ވަދެ މެމްބަރުން ތިއްބެވީ ރައްޔިތުންނަށް ހިދުމަތް ކުރައްވަން ކަމަށް އޭނާ ވިދާޅުވި އެވެ.

އޭގެ ފަހުގައި، ޖާބިރު ސުވާލު ކުރެއްވީ އެއްވެ އުޅުމުގެ މިނިވަންކަން ހަނި ކުރުމަށް އެއްވެ އުޅުމުގެ ގާނޫނަށް ގެނައި އިސްލާހު ބާތިލް ކުރަން ހުށަހެޅި ބިލާ ބެހޭ ގޮތުންނެވެ. އަދި، އެ ބިލް ކޮބައިތޯ އައްސަވައި، ޑިމޮކްރަސީއަކީ އެމްޑީޕީ ބޭނުންވާ ގޮތަކަށް ކަންކަން ކުރަން އޮންނަ އެއްޗެއް ނޫން ކަމަށް ވެސް ޖާބިރު ވިދާޅުވި އެވެ.

އެއްވެ އުޅުމުގެ ގާނޫނަށް އިސްލާހު ގެނައުމުގެ ބިލް މަޖިލިހުގެ މެމްބަރުންގެ މެދުގައި ބަހުސް ކުރެއްވުމަށް ފަހު، އެ ބިލް ދިރާސާ ކުރަން ވަނީ ކޮމިޓީ އަށް ފޮނުވައިފަ އެވެ. އެކަމަކު، އެ ބިލް ކޮމިޓީން ދިރާސާކޮށް ނިންމުމަށް ފަހު މަޖިލިހުގެ ތަޅުމަށް ފޮނުވިކަން ނުވަތަ ނޫން ކަން އެނގިފައެއް ނުވެ އެވެ.

ދިވެހި ރައްޔިތުންގެ ޕާޓީ (ޑީއާރުޕީ)ގެ ލީޑަރު ކަން ކުރައްވާ ޖާބިރު ވިދާޅުވީ މަޖިލިހުން ކަންކަން ނިންމަން ހުށަހަޅަނީ ކީއްވެތޯ ސުވާލު ކުރައްވައިފަ އެވެ. އަދި އެމްޑީޕީގެ ޕާލަމެންޓްރީ ގްރޫޕުން "ތައްގަނޑު ޖަހާފައި" ފާސް ނުކުރަނީ ކީއްވެތޯ އެމްޑީޕީ މެމްބަރުންގެ އަރިހުން ޖާބިރު ވަނީ އައްސަވައިފަ އެވެ.

"ފުރަތަމަ ކަމަކަށް މަޖިލިހުގެ ހައިސިއްޔަތު އޮންނަން އެބަޖެހޭ،" ޖާބިރު ވިދާޅުވި އެވެ.

"މި މަޖިލިހަކީ އެމްޑީޕީގެ ހަރުގެއަކަށް ހަދައިގެން ނުވާނެ. މިއީ ރާއްޖޭގެ ރައްޔިތުންގެ މަޖިލިސް."

ޖާބިރު ވިދާޅުވި ގޮތުގައި މަޖިލިހުގައި ކަންކަން ކުރައްވަން ވާނީ ގާނޫނުއަސާސީ އާއި "ސަގާފަތާ" އެއްގޮތްވާ ގޮތުގެ މަތިންނެވެ. އެމްޑީޕީ އަށް ރައްޔިތުން މަޖިލިހުގެ 65 ގޮނޑި ދީފައި ވަނީ "ހިތު ހުރިހާ ގޮތަކަށް" ކަންކަން ކުރުމަށް ނޫން ކަމަށް ވެސް ވިޔަފާރިވެރިޔާ ޖާބިރު ވިދާޅުވި އެވެ.

ޖާބިރު އެގޮތަށް ވިދާޅުވި އިރު، އެމްޑީޕީން ބޭނުންވާ ގޮތަށް މަޖިލިހުގައި ކަންކަން ކުރަމުންދާ ކަމުގެ ޝަކުވާ ބޮޑެވެ. އަދި ހާއްސަކޮށް، ރައްޔިތުންގެ މަޖިލިހުގެ ރައީސް، ކުރީގެ ރައީސް މުހައްމަދު ނަޝީދު، އެމްޑީޕީ މެމްބަރުންނަށް ބުރަވާ ގޮތަށް އަމަލު ކުރައްވާ ކަމުގެ ތުހުމަތު އިދިކޮޅު މެމްބަރުން ކުރައްވަ އެވެ.

އިދިކޮޅު މެމްބަރުންގެ އެ ތުހުމަތުތައް ނަޝީދު އެތައް ފަހަރަކު ދޮގު ކުރައްވަ އެވެ.

އެކަމަކު، ޖާބިރު އެކަން ގަބޫލެއް ނުކުރައްވަ އެވެ. އެކަން ގަބޫލު ނުކުރައްވައި ޖާބިރު ވިދާޅުވީ އޭނާ މަޖިލިހަށް ވަޑައިގަންނަވަނީ އެމްޑީޕީގެ ހަރުގޭގެ މަސައްކަތް ކުރައްވަން ނޫން ކަމަށެވެ.

"ގާނޫނުއަސާސީ އާއި ގާނޫނުތަކާއި މަޖިލިހުގެ ގަވައިދުތަކާ އެއްޗެއްސަށް ހިތު ހުރިހާ ގޮތަކަށް އަމަލު ކުރުމެއް ނޯންނާނެ. މި ސުވާލު ކުރަނީ ރާއްޖޭގެ ކަންކަން މި ދަނީ ރަނގަޅަށްތޯއޭ،" މަޖިލިހުގެ ރައީސުންނަށް ތިއްބަވަނީ އެމްޑީޕީ ހަރުގޭގައި އުޅުއްވާ އިސް ބޭފުޅުން ކަން ފާހަގަ ކުރައްވައި ޖާބިރު ވިދާޅުވި އެވެ.

އެމްޑީޕީ އަށް ދީފައި އޮތް މެޖޯރިޓީއާ މެދުގައި ރައްޔިތުން ވިސްނަން ޖެހޭ ކަމަށް ވެސް ޖާބިރު ވިދާޅުވި އެވެ. އަދި ކުރިއަށް އޮތް އިންތިހާބުތަކާ ދޭތެރޭގައި ވިސްނަން ޖެހޭ ކަމަށް ވެސް އޭނާ ވިދާޅުވި އެވެ.

"ދިވެހިރާއްޖޭގެ ރައީސުލްޖުމްހޫރިއްޔާ އޮފީހުން ސްޓޭމްޕް ޖަހަން ފޮނުވާ ގޮތަށް މިތަނުން ސްޓޭމްޕެއް ނުޖެހޭނެ. ރައްޔިތުންގެ މަޖިލިހުން އެކަމާ ޑެލިބަރޭޓް ކުރަން ޖެހޭނެ،" ޖާބިރު ވިދާޅުވި އެވެ.