މަޖިލިހުގެ ނައިބަކަށް ވާދަކުރައްވާ އެމްޑީޕީގެ މެމްބަރަކަށް ސަލީމް

ރައްޔިތުންގެ މަޖިލީހުގެ ހުސްވެފައިވާ ނައިބު ރައީސް ކަމުގެ މަގާމަށް މަޖިލީހުގެ މެޖޯރިޓީ އޮންނަ އެމްޑީޕީގެ ފަރާތުން ހޯރަފުށީ ދާއިރާގެ މެންބަރު އަހުމަދު ސަލީމް ވާދަކުރައްވާ ގޮތަށް އެ ޕާޓީގެ ޕާލަމެންޓްރީ ގުރޫޕުގެ ސިއްރު ވޯޓަކުން މިއަދު ފާސްކޮށްފި އެވެ.

މަޖިލިހުގެ ނައިބު ރައީސްކަމަށް ވާދަކުރައްވަން ޝައުގުވެރިކަން ދެން ފާޅުކުރެއްވީ ސަލީމްގެ އިތުރުން އައްޑޫ މީދޫ ދާއިރާގެ މެންބަރު ރޮޒައިނާ އާދަމާއި ކާށިދޫ ދާއިރާގެ މެންބަރު އަބްދުﷲ ޖާބިރެވެ.

އެމްޑީޕީގެ ޕާލަމެންޓްރީ ގުރޫޕުގެ މެމްބަރުންގެ މެދުގައި މިއަދު ހަވީރު ނެގި ސިއްރު ވޯޓުގައި، ވޯޓު ލުމުގެ ހައްގު ލިބިގެންވާ 55 މެންބަރުން ވޯޓު ދެއްވި އެވެ. ސަލީމަށް ވޯޓު ދެއްވީ 26 ބޭފުޅެކެވެ.

ހަނި ތަފާތަކުން ބަލިވި ރޮޒައިނާއަށް ލިބިވަޑައިގަތީ 23 ވޯޓެވެ. ޖާބިރަށް ހަތަރު ވޯޓު ލިބިވަޑައިގެންނެވިއިރު، ދެ މެންބަރުންގެ ވޯޓު ބާތިލެވެ.

މަޖިލިހުގެ އާ ނައިބު ރައީސް އިންތިހާބުކުރުމަށް ބާއްވާ ޖަލްސާ އޮންނާނީ މިރޭ އަށެއް ޖަހާއިރު އެވެ. މަޖިލީހުގެ ނައިބު ރައީސް ކަމުގެ މަގާމު ހުސްވީ އެ މަގާމުގައި ހުންނެވި ގަލޮޅު އުތުރު ދާއިރާގެ މެންބަރު އީވާ އަބްދުﷲ މިއަދު އިސްތިއުފާ ދެއްވުމާ ގުޅިގެންނެވެ. އީވާ އިސްތިއުފާ ދެއްވީ އޭނާ އެ މަގާމުން ވަކިކުރުމުގެ ގަރާރު ކުރިއަށް ގެންދަނިކޮށް، ގަރާރަށް ޖަވާބުދާރީވެވަޑައިގަތުމަށް ފަހު އެވެ.