ރަނގަޅު "ނޯޓް 7" ފާހަގަކުރާނެ ގޮތް

ސެމްސަންގް ގެލަކްސީ ނޯޓް 7 އަށް ވަފާތެރިން ކުރި އިންތިޒާރު އުފާވެރިއެއް ނޫނެވެ. ނޯޓް 7 ބާޒާރަށް ހަމަ ނެރުތަނުން މާ ބޮޑަށް ބެޓެރީ ހޫނުވެ ބައެއް ފޯނުތައް ގޮވައި ބައެއް މީހުން ވަނީ ފިހިފަ އެވެ.

ސެމްސަންގަށް ދިމާވެފައި އެ ވަނީ ހަޔާތުގައި ވެސް ކުރިމަތި ނުވާ ވަރުގެ ބޮޑު ގެއްލުމަކާ އެވެ. އެ ހާލަތުން އަރައިގަތުމަށް ކުރި މަސައްކަތްތަކުގައި، ބެޓެރީ ހޫނުވާން ދިމާވި މައްސަލަ ދާދި އަވަހަށް ވަނީ ހައްލުކޮށްފަ އެވެ. މައްސަލަ ޖެހުނު ފޯނުތައް އަތުލައި، އާ އަދަދުތައް މިހާރު ވަނީ ބަހަން ވެސް ފަށާފަ އެވެ.

ނޯޓް 7ގެ ރަނގަޅު އަދަދުތައް ފާހަގަކުރާނެ ގޮތް ސެމްސަންގުން ވަނީ ކިޔައިދީފަ އެވެ. ސެމްސަންގުން ބުނާ ގޮތުގައި ރަނގަޅު ނޯޓް 7 ފާހަގަކުރެވޭނެ އެންމެ ފަސޭހަ ގޮތަކީ، ސްކްރީންގެ ކަނާތް ފަރާތު ކަނުގައި އިންނަ ބެޓެރީ އައިކަން އެވެ. ރަނގަޅު ނޯޓް 7 ގައި އެ އައިކަން އިންނާނީ ފެހި ކުލައިގަ އެވެ. ފޯނު ނިއްވާލަން "ޕަވާ ބަޓަން" އަށް ފިތާލުމުން ވެސް ފެހި ކުލައިގެ ބެޓެރީ އައިކަން ފެންނާނެ އެވެ. އަދި ސްކްރީން "ލޮކް" ކުރުމުން ފެންނަ "އޯލްވޭސް-އޮން ޑިސްޕްލޭ" ގައި ވެސް އެ ބެޓެރީ އިންނާނީ ފެހި ކުލައިގަ އެވެ.

ގެލެކްސީ ނޯޓް 7 ގަންނައިރު ވެސް އެއީ ރަނގަޅު ފޯނެއްތޯ ބެލެ އެވެ. އެއީ ޕެކިނުންނެވެ. ނޯޓް 7 ލާފައި އޮންނަ ފޮށީ ބޭރު ލޭބަލްގައި ކަޅު ހަތަރެސްކަން މާކެެއް ފެންނަން އިންނާނެ ކަމަށް ސެމްސަންގުން ބުނެ އެވެ.

ތިޔަ ގެންގުޅޭ ނޯޓް ހަތަކީ ބަދަލުކުރަން ޖެހޭ ފޯނެއްތޯ ބެލުމަށް ސެމްސަންގް ވެބް ސައިޓްގައި ޚާއްސަ އިންތިޒާމްތަކެއް ވަނީ ހަމަޖައްސާފަ އެވެ. ނޯޓް 7ގެ "އައިއެމްއީއައި" ނަންބަރު ޖަހާލުމުން، ކަމުނުދާ ފޯނެއް ނަމަ ބުނެދެ އެވެ.