ބިހާ ނުލައި ދަރިން ލިބޭނެގޮތް ހެދުމުގެ ފުރުސަތު އެބައޮތް: ސައިންސްވެރިން

މައިމީހާގެ ބިހާ ނުލާ ދަރިން އުފެއްދުމުގެ ފުރުސަތު ތަނަވަސްވެގެން ދިއުމުގެ އުންމީދު ބޮޑުކަމަށް ސައިންސްވެރިން ބުނެފި އެވެ.

ސައިންސްވެރިން މީދާތަކެއް ބޭނުންކޮށްގެން ހަދާފައިވާ މިފަދަ އެކްސްޕެރިމެންޓެއް ކާމިޔާބު ވެފައިވާ ކަމަށާއި އެހެންކަމުން މައިމީހާގެ ބިހާ ނުލާ ދަރިން ހޯދިދާނެކަމުގެ އުންމީދު އާވެފައިވާ ކަމަށް ވެސް އެމީހުން ބުނެފައި ވެ އެވެ.

އާދައިގެ ބިސްތަކެއް ދަރިމައިކުރާ ކަމުގެ ސިގްނަލް ސްޕާމް ނުވަތަ ދަރިފަންޏަށް ދީގެން ސައިންސްވެރިން ވަނީ "އޮޅުވާލައިގެން" ކުދި މީދާތަކެއް އުފެއްދުމުގައި ކާމިޔާބު ހޯދަފަ އެވެ.

ނޭޗާ ކޮމިއުނިކޭޝަންގައި ޝާއިއުކުރި ރިޕޯޓަކާ ހަވާލާދީ ބީބީސީން ބުނީ ދަރިން އުފެއްދުމުގެ މަރުހަލާތަކުގައި އަންހެނުންނަށް ޚާއްސަވެފައިވާ ދައުރުން އެމީހުން މުޅިން ބާކީކުރެވިދާނެކަމަށް މިހާރު ސައިންސްވެރިން ގަބޫލުކުރާ ކަމަށެވެ.

ނަމަވެސް މިހާތަނަށް މިކަމާ ގުޅޭ ގޮތުން ކުރެވިފައިވާ މަސައްކަތްތަކުން ހަމައެކަނި އޮޅުން ފިލާފައިވަނީ ދަރިން ގަރުބަގަތުމާބެހޭ ތަފްސީލުތަކެވެ.

މަންމަ އާއި ބައްޕަގެ ނިމުން އަންނަނީތަ؟

ޔުނިވަސިޓީ އޮފް ބާތުގެ ސައިންސްވެރިން މި ދިރާސާ ކުރަން ފެށީ ދަރިމައިނުވާ ބިހެއް އެމީހުންގެ އެކްސްޕެރިމެންޓްގައި ބޭނުންކޮށްގެންނެވެ.

އެމީހުން ވަނީ ކެމިކަލްތަކެއް ބޭނުންކޮށްގެން އެ ބިހަށް އޮޅުވާލައިގެން ސުޑޯ-އެމްބްރިޔޯ އެއް ނުވަތަ ފޭކް ދަރިފަންޏަކަށް ބަދަލުކޮށްފަ އެވެ.

މި "ފޭކް" ދަރިފަނިތައް ވެސް އާދައިގެ ސެލްތަކުގައި ހުންނަ ސްކިން ސެލް އާއި އޭތި ބައިބައިވެ ޑީއެންއޭ ކޮންޓްރޯލް ކުރުން ފަދަ ހުރިހާ ކަމެއް ހިއްސާކުރެ އެވެ.

އެހެންކަމުން ސައިންސްވެރިން ގަބޫލުކުރަނީ މިގޮތަށް މީދަލުގެ ފޭކް އެމްބްރިޔޯ އަކަށް ސްޕާމްއެއް އިންޖެކްޓްކޮށްފި ނަމަ ސިއްހަތު ރަނގަޅު ދަރިން އުފެއްދޭނެ ކަމަށެވެ. އަދި ކޮންމެވެސް ދުވަހަކުން އިންސާނުންގެ ސެލް ބޭނުންކޮށްގެން މިފަދަ ގޮތަކަށް ބިހާ ނުލާ ދަރިން އުފެއްދިދާނެކަމަށް ސައިންސްވެރިން އުންމީދު ކުރެ އެވެ.

މީދާތަކުން މި ހެދި އެކްސްޕެރިމެންޓުގައި ކާމިޔާބުކަމާއެކު ބަލިވެ އިނުމުގެ ފުރުސަތު އޮންނަނީ ކޮންމެ ހަތަރު ފަހަރަކުން އެއް ފަހަރު އެވެ.

މި ދިރާސާގައި އިސްކޮށް ހުރި ސައިންސްވެރިޔާ ޑރ. ޓޯނީ ޕެރީ ބީބީސީ އަށް ވިދާޅުވެފައިވާ ގޮތުގައި ބިސް ނޫން އެހެން އެއްޗެއް ސްޕާމް އާ ގުޅުވައިގެން ދަރިން އުފެއްދިދާނެކަމަށް ދެއްކުނު މިއީ ފުރަތަމަ ފަހަރެވެ.

އަދި މިއީ 200 އަހަރަށް ވުރެ ގިނަ ދުވަސް ވަންދެން ގަބޫލުކުރަމުން އައި ގަބޫލުކުރުމެއް އެކޮޅުކޮޅުން ޖަހާލި އެކްސްޕެރިމެންޓެއް ކަމަށް އޭނާ ވިދާޅުވި އެވެ.

އޭނާ ވިދާޅުވި ގޮތުގައި މި އެކްސްޕެރިމެންޓްގައި އުފެއްދި ކުދި މީދާތަކުގެ ސިއްހަތު މުޅިން ބަރާބަރެވެ. އަދި އެ އެއްޗެހި އާދައިގެ މީދަލެއް ދުނިޔޭގައި ހުންނަހާ ދުވަހު ދުނިޔޭގައި އުޅެފައިވެ އެވެ. އަދި އެ އެއްޗިއްސަށް އާދައިގެ ގޮތަކަށް ދަރިން ވެސް ލިބިފައި ވެ އެވެ.

މައްސަލައަކީ ގަރުބަގަންނަ ގޮތް ނޭނގުން

މިހާރު ސައިންސްވެރިންގެ އަމާޒަކީ ގަރުބަގަންނަ ގޮތް ނުވަތަ ފާޓިލައިޒޭޝަން މެކޭނިޒަމް އަކީ ސީދާ ކޮބައިކަން ހޯދުމެވެ. ސަބަބަކީ ސްޕާމް އާއި ބިހަކާ ގުޅޭ ވަގުތު އެ ހިނގާ ކަންތައްތަކަކީ އަދިވެސް އެމީހުންގެ ބުއްދިއަށް ވިސްނޭ ވަރަށް ވުރެ މާ ކުރީގައި އުޅޭ ކަމަށް ވާކަމެވެ.

މިސާލަކަށް ބިހާއި ދަރިފަނި ބައްދަލުވެ ގަރުބަގަންނަ މަރުހަލާ ފެށުމުގެ ގޮތުން ސްޕާމް ނުވަތަ ދަރިފަނީގެ ޑީއެންއޭ އޭގެ ކެމިކަލް ބިހުން އެކުގައި ދަމައިގަނެ އޭތި މުޅިން "ބަރަހަނާ" ކޮށްލަ އެވެ. އަދި އަލުން ހެދުން އަޅުވަ އެވެ. އާ ހެދުން އެޅުވުމާއެކު ސްޕާމްގެ ކިބައިގައި ހުރި ކުރީގެ ހުރިހާ ސިފަތަކެއް ނެތިގެން ދެއެވެ. އަދި ދަރިފަންޏެއްގެ އުޅުމަށް އޭގެ އުޅުން ބަދަލުވެގެން ދެއެވެ. ނަމަވެސް މިގޮތަށް މި "ހެދުން ބަދަލުވާ" ގޮތް ސައިންސްވެރިންނަކަށް ސާފެއް ނޫނެވެ.

ޑރ. ޕެރީ ވިދާޅުވަނީ މިފަދަ އެކްސްޕެރިމެންޓެއް ދުރު މުސްތަގްބަލެއްގައި ނަމަވެސް ކާމިޔާބުވެއްޖެ ނަމަ ވެދާނެ އެއް ގޮތަކީ ހަށިގަނޑުގައިވާ އާދައިގެ ސެލްތަކެއް ވެސް ސްޕާމްއާ ގުޅުވައިގެން އެމްބްރިޔޯއެއް ނުވަތަ ދަރިފަންޏެއް އުފެއްދުމުގެ ފުރުސަތު ތަނަވަސް ވުމެވެ.

އެންމެ ފިރިހެނަކަށް ހަމައެކަނި އޭނާގެ ދަރިއެއް ވެސް ހޯދުމުގެ ފުރުސަތު އޭރުން ލިބޭނެ ކަމަށް ވެއެވެ. އެއީ އޭނާގެ އަމިއްލަ ސެލް އަކާއި އަމިއްލަ ސްޕާމް އަކުން ދަރިއަކު އުފެއްދިދާނެތީ އެވެ. ޑރ. ޕެރީ އެއްބަސްވެ ވަޑައިގަންނަވާ ގޮތުގައި އަދި މި ސްޓޭޖުގައި މިފަދަ ދުވަހަކީ ހަމައެކަނި ޚިޔާލުގައި އޮތް ދުވަހެވެ.

މިއަހަރުގެ ކުރީކޮޅު ޗައިނާގެ ސައިންސްވެރިން ވަނީ މީދަލުގެ ސްޓެމް ސެލްސް އިން ސްޕާމް އުފެއްދުމުގައި ކާމިޔާބު ހޯދާފަ އެވެ. އަދި ސިއްހަތު ރަނގަޅު މީދާތަކެއް އުފެއްދުމަށްޓަކައި މި ސްޕާމްގެ އެހީގައި ބިހެއް ފާޓިލައިޒްކޮށްފައިވެ އެވެ.

ޑރ. ޕެރީ ވިދާޅުވަނީ މި ދެ ރޮނގުން ކޮށްފައިވާ ދެ އެކްސްޕެރިމެންޓް ގުޅުވާލައިގެން ރަނގަޅު ނަތީޖާއެއް ނެރެވިދާނެ ކަމަށެވެ. އޭރުން ސްޕާމް އާއި ބިހުގެ ބޭނުމެއް ނުޖެހި ފަރުޖެއްސިދާނެ ކަމަށް އޭނާ ގަބޫލު ކުރައްވަ އެވެ.