ލަންކާގައި ރޭލެއް ދަށުވެ ދިވެއްސަކު މަރުވެއްޖެ

ސްރީ ލަންކާގައި ރޭލެއްގެ ދަށުވެ ދިވެއްސަކު މިއަދު މަރުވެއްޖެ އެވެ.

މި އެކްސިޑެންޓުގައި މަރުވީ ގދ. މަޑަވެލި ޒުވާނެއް ކަމަށް އިޒްހާމް މުހައްމަދު 21، އެވެ. އެކްސިޑެންޓުގައި އޭނާގެ ހަށިގަނޑުގެ ބޮޑުބައި ޗިސްޗިސްވެފައިވާ ކަމަށް ވެ އެވެ.

މޯލްޑިވްސް ނެޝަނަލް ޔުނިވަސިޓީ (އެމްއެންޔޫ) ގައި ޑިގްރީއަށް ކިޔަވަމުން އައި އިޒްހާމް ރަށްޓެހިންތަކަކާއެކު ލަންކާއަށް ދިޔައީ އިއްޔެ ކަމަށް އެނގިފައިވެ އެވެ.

ރަށްޓެހިންތަކަކާއެކު ސައިބޯން ނުކުމެ އުޅެނިކޮށް، އިޒްހާމް އެކްސިޑެންޓުވީ، ސައިބޯން ތިބި ތަނުގެ ކައިރިން ރޭލު ޓްރެކްގެ އަނެއް ފަރާތަށް ހީސްލާން ގޮސްފައި އެނބުރި އަންނަނިކޮށް ކަމަށް އޭނާގެ ގާތް މީހަކު ބުންޏެވެ.

"ސައިބޯން އިނދެފައި އިޒްހާމް ބުނީ އެބަ އަންނަމޭ ހީސްލައިގެން. ރޭލު ދަގަނޑުގެ އަނެއް ފަރާތުގައި އޮންނާނީ މޫދު. އެތަނަށް ގޮސްފައި އެނބުރި އަންނަނިކޮށް މިކަން މި ދިމާވީ،" އިޒްހާމްގެ ގާތް މީހާ ބުންޏެވެ.

އެކްސިޑެންޓުވި ތަން ފެނުނު ދިވެއްސަކު "މިހާރު" އަށް ބުނިގޮތުގައި، ރޭލު ދަގަނޑުމަތިން އިޒްހާމް ހުރަސްކުރި ވަގުތު އިޒްހާމާއި ރޭލާ ދެމެދު ހުންނާނީ ވިއްސަކަށް ފޫޓެވެ.

"ވަރަށް ދުރަށް [ރޭލު] ދިޔަ އޭނާގެ ގައިމަތިން. ޖެހުނު ގޮތަށް ދަށުވީ." އެކްސިޑެންޓުވި ވަގުތު އެ ހިސާބާ އަރާ ހަމަވި ދިވެހި މީހާ ކިޔައިދިނެވެ.

"ވަރަށް އަސަރުކުރި. އޭނައަށް ވީ ގޮތް ލައިވްކޮށް ދެކުނިން. އެވަގުތު [އެކްސިޑެންޓްވި އިރު] އަހަރެންނާއި މަންމަ އަދި ކޮއްކޮ އެ ހިސާބާ އަރާ ހަމަވީ. އެކްސިޑެންޓުވި ވަގުތު އެތަނުގައި ތިބި މީހުން ހަޅޭއްލަވައިގަތީމާ އަހަރެމެންނަށް ވެސް މަޑުކޮށްލެވުނީ. އެވަގުތު އެތަނުން މީހަކު ބުނީ އެއީ ދިވެއްސެކޭ"

ފޭސްބުކްގައި އާއްމުކޮށްފައިވާ ވީޑިއަކުން ފެންނަ ގޮތުގައި އެކްސިޑެންޓް ހިނގި ސަރަހައްދުގައި އިޒްހާމްގެ ހަށިގަނޑު ހުދު ފޮތިގަނޑެއް އަޅާފައި ބާއްވާފައި އޮތް އިރު، ރޭލް ދަގަނޑުތައް ކައިރީގައި ގިނަ އަދަދެއްގެ ލޭ ހުރި ތަން ފެނެ އެވެ.