ނިއުކާސަލް ބަލިކޮށް އާސެނަލް ތިން ވަނަ އަށް

ލަންޑަން (އޭޕްރީލް 2) - އިނގިރޭސި ޕްރިމިއާ ލީގުގައި ރޭ ނިއުކާސަލް ޔުނައިޓެޑްގެ މައްޗަށް 2-0 އިން ކުރިހޯދައި އާސެނަލް ލީގުގެ ތިން ވަަނަ އަށް ޖެހިލައިފި އެވެ.

ރޭގެ މޮޅާ އެކު އާސެނަލް ތިން ވަނަ އަށް އެރީ 31 މެޗުން 63 ޕޮއިންޓް ހަމަކޮށްގެންނެވެ. ހަތަރު ވަނައިގައި އޮތް ޓޮޓެންހަމާއި ފަސް ވަނައިގައި އޮތް މެންޗެސްޓާ ޔުނައިޓެޑަށް 31 މެޗުން 61 ޕޮއިންޓް ލިބިފައިވާއިރު، ހަ ވަނައިގައި އޮތް ޗެލްސީގެ އޮތީ 31 މެޗުން 60 ޕޮއިންޓެވެ.

އާސެނަލްގެ އެމިރޭޓްސް ސްޓޭޑިއަމްގައި ރޭ ކުޅުނު މެޗު ފަށައިގެން 30 ވަނަ މިނިޓްގައި އެ ޓީމަށް ލީޑުނަގައިދިނީ މި ސީޒަނަށް ފަހު ޔުވެންޓަސް އަށް ބަދަލުވުމަށް ނިންމާފައިވާ ވޭލްސްގެ މިޑްފީލްޑަރު އާރޮން ރަމްސޭ އެވެ. އޭރިއާ ތެރެއިން ލިބުނު ބޯޅަ ރަމްސޭ ވަނީ ފަސޭހަކަމާ އެކު ގޯލަށް ފޮނުވާލައިފަ އެވެ.

ނިއުކާސަލް އަށް އެއްވަރުކޮށްދޭން ވެނެޒުއޭލާގެ ފޯވާޑް ސޮލޮމޮން ރޮންޑޮން އަށް ލިބުނު ފުރުސަތުން އޭނާ ޖެހި ބޯޅަ އާސެނަލް ކީޕަރު ބާން ލެނޯ ވަނީ މަތަކޮށްފަ އެވެ.

ލީޑުފުޅާކުރަން އާސެނަލުން ކުރަމުންދިޔަ މަސައްކަތް ކާމިޔާބުވީ މެޗު ނިމެން ހަތް މިނިޓަށް ވެފައިވަނިކޮށެވެ. ޕިއޭ އެމެރިކް އޮބާމަޔަން ދިން ބޯޅައަކުން މި ގޯލު ކާމިޔާބުކުރީ ފްރާންސްގެ ފޯވާޑް އަލެކްސަންޑަ ލަކަޒޭޓް އެވެ. ލަކަޒޭޓަށް ލިބުނު ބޯޅަ އޭނާ ވަނީ ނިއުކާސަލް ކީޕަރު މާޓިން ޑުބްރާވްކާ ބޯމަތިން ގޯލުގެ ތެރެއަށް ފޮނުވާލައިފަ އެވެ.

މިއީ 1998 ވަނަ އަހަރަށް ފަހު އިނގިރޭސި ޕްރިމިއާ ލީގުގައި އަމިއްލަ ދަނޑުގައި ޖެހިޖެހިގެން 10 މެޗުން އާސެނަލް މޮޅުވި ފުރަތަމަ ފަހަރެވެ.

ގަދަ ހަތަރެއްގެ ރޭހުގައި އާސެނަލަށް ރަނގަޅު ލީޑެއް ލިބުމުން އެ ޓީމުގެ ކޯޗު އުނާއި އެމެރީ ހުރީ ވަރަށް ބޮޑަށް ހިތްހަމަޖެހިފަ އެވެ. އެމެރީ ބުނީ ގަދަ ހަތަރެއްގައި ނިންމުމުގެ އަމިއްލަ ބާރު އޮތުމަކީ ދެން އޮތް މެޗުތަކަށް ނުކުންނައިރު އެ ޓީމަށް ލިބޭނެ ވަރަށް ބޮޑު ހިތްވަރެއް ކަމަށެވެ.

"އަހަރެމެން ވަރަށް ރަނގަޅަށް ކުޅުނު މެޗެއް މިއީ. އަނެއްކޮޅުން ނަތީޖާ ވެސް އަހަރެމެންނަށް ނެރެވިއްޖެ. އެހެންވީމަ މިއީ ފުރިހަމަ މެޗެއް. މި ލެވެލްގައި ކުރިއަށް ހުރި މެޗުތަކުގައި ކުޅެފިނަމަ ގަދަ ހަތަރެއްގެ ތެރޭގައި އަހަރެމެންނަށް ހަމަޖެހިލެވޭނެ،" ކުރިން ސެވިއްޔާ އާއި ވެލެންސިއާ އަށް ކޯޗުކޮށްދިން އެމެރީ ބުންޏެވެ.

އޭނާ ބުނީ ރަމްސޭ މި ސީޒަނަށް ފަހު ކްލަބް ދޫކޮށްލުމަކީ ޓީމަށް ލިބޭނެ ވަރަށް ބޮޑު ބަލިކަށިކަމެއް ކަމަށާއި އޭނާގެ ބަދަލުގައި ކުޅުންތެރިޔަކު ހޯދަން އުނދަގޫވާނެ ކަމަށެވެ.