އާސެނަލް އަށް ގަދަހަތަރެއް ދެން ނުލިބޭނެ، ގޯސް ހެދީ އަމިއްލަ އަށް: އާޓެޓާ

ނިއުކާސަލް (އޭޕްރީލް 16) - ނިއުކާސަލް ޔުނައިޓެޑާ ދެކޮޅަށް އާސެނަލް ކުޅުނު ދަށް ކުޅުމާއެކު އެޓީމަށް ޗެމްޕިއަންސް ލީގުގެ ޖާގަ ހައްގުނުވާ ކަމަށާއި އެހާލަތަށް ވެއްޓުނީ ޓީމު އަމިއްލަ އަށް ކަމަށް ކޯޗު މިކަލް އާޓެޓާ ބުނެފި އެވެ.

ރޭ ނިއުކާސަލްގެ ދަނޑުގައި ކުޅުނު މެޗުން އާސެނަލް ބަލިވީ 2-0 ންނެވެ. ހަތަރުވަނައިގައި އޮތް ޓޮޓެންހަމްއާ ވާދަކުރަން އޮތް ފުރުސަތު އާސެނަލް އަށް ވަނީ ހަނިވެފަ އެވެ. އާސެނަލް އަށް ގަދަ ހަތަރެއްގެ ޖާގަ ލިބެންއޮތީ އާސެނަލް ދެން ކުޅެންޖެހޭ މެޗުގައި އެވަޓަން އަތުން މޮޅުވެ، ޓޮޓެންހަމް، ނޯރިޗް ސިޓީއާ ދެކޮޅަށް ކުޅޭ މެޗުން ބަލިވެގެންނެވެ. މިހާރު ވެސް ރެލިގޭޓް ވެފައިވާ ނޯރިޗް އަތުން ޓޮޓެންހަމް ބަލިވުމަކީ ދުރުގައިވާ ކަމެކެވެ.

އާޓެޓާ ދެކޭ ގޮތުގައި ޗެމްޕިއަންސް ލީގުގެ ޖާގަ ނުހޯދި ވިދިދިގެން ފަސްވަނަ ސީޒަން ނިންމާލުމުގެ ބިރު އާސެނަލް އަށް ކުރިމަތިލާން ޖެހިފައިވަނީ ރޭގެ މެޗުގައި އެޓީމު އަމިއްލަ އަށް ހެދި ގޯސްތަކަކުންނެވެ. އޭނާ ބުނީ އޭނާގެ ކުޅުންތެރިން ދިފާއުކޮށް ވާހަކަ ދެއްކެން އޭނާ އަށް ނެތް ކަމަށެވެ. އެކަމަކު ނިއުކާސަލްގެ ޓީމު ފެނުނީ އާސެނަލް އަށް ވުރެ 100 ޕަސެންޓް ރަނގަޅަށް ކުޅުނުތަން ކަމަށް އާޓެޓާ ބުންޏެވެ. މިއީ އާސެނަލް އަށް އެއްހަފުތާ ތެރޭ ކުރިމަތިވި ވިދިވިދިގެން ދެވަނަ ބައްޔެވެ. ކުރީ މެޗުގައި ޓޮޓެންހަމް އަތުން ބަލިވީ 3-0 ންނެވެ.

"ޗެމްޕިއަންސް ލީގްގައި ކުޅެން ބޭނުން ނަމަ އަހަރެމެން ކުޅެން ޖެހޭ ލެވަލްއާ ކައިރިކުރާ ވަރަށް ވެސް އަހަރެމެންނަށް ކުޅުން ނުދެއްކުނު،" އާޓެޓާ ބުންޏެވެ.

"މިތާ އިށީންދެލައިގެން އިނދެ އަހަރެމެން ކުޅުނު ގޮތް އަހަންނަށް ދިފާއު ކުރެވިދާނެ. މިއަދު ނިއުކާސަލް އަކީ ފެށުނީއްސުރެ ނިމެންދެން ކޮންމެ މަގާމެއްގައި ވެސް އަހަރެމެންނަށް ވުރެ 100 ގުނަ ރަނގަޅަށް ކުޅުނު ޓީމެއް. އަދި އަހަރެމެން ކުޅުނު ގޮތް ބަލައިގަންނަން ވަރަށް އުނދަގޫ. އަހަރެމެން ރަނގަޅަށް ވާދައެއް ނުކުރަން. އަހަރުމެންނަށް މެޗުގެ ތެރެއަށް އެއްވެސް ވަރަކަށް ވަދެވިފައެއް ނުވޭ.

"އަހަރެމެން އަމިއްލަ އަށް އުނދަގޫ ހާލަތަކަށް ވެއްޓިގަތީ. ކުޅެން މަސައްކަތްކުރި ކޮންމެ ބޯޅައެއް ގެއްލުނީ. ނިއުކާސަލް އަށް މި މެޗުން މޮޅުވުން ހައްގު. ފަހަރެއްގައި ބޮޑު ތަފާތަކުން ވެސް މޮޅުވީސް. އަހަރެމެން އިސްތިރިކޮށް، ކުރެވެން ހުރި ހުރިހާކަމެއް ކުރަންވީ. އަހަރެމެންގެ ހުރިހުރިހާ ވިހައެއް ކަނޑުވާލަންވީ. އަހަރެން ވަރަށް ދެރަވޭ. އެއީ ވަރަށް މާޔޫސްކުރުވި ބައްޔެއް. އެއީ ކުރިން އަހަރެމެންގެ އަތްމަތީގައި އޮތް ކަމެއް އެކަމަކު މިހާރު އަހަރެމެންގެ އަމިއްލަ ބާރުގައ އޮތް ކަމެއް ނޫން."

މެޗުގައި ނިއުކާސަލްގެ ދެ ލަނޑު ވެސް ޖެހީ ދެވަނަ ހާފުގަ އެވެ. ދެވަނަ ހާފު ފެށިގެން 10 ވަނަ މިނެޓްގައި އެޓީމުން ލީޑް ނެގީ އާސަނަލްގެ ޑިފެންޑަރު ބެންޖަމިން ވައިޓް އަތުން ބައިކޮޅަށް ވަން ލަނޑަކުންނެވެ. ދެވަނަ ލަނޑު 85 ވަނަ މިނެޓްގައި ޖެހީ ބުރްނޯ ގިމަރޭސް އެވެ.