ދަނޑުވެރިޔަކު އަމިއްލައަށް "މަތިންދާބޯޓެއް" ހަދައިފި

އަމިއްލަ މަތިންދާބޯޓެއް ގެންގުޅުމުގެ ހުވަފެން، ކުޑައިރުން ސުރެ ދެކެމުން އައި ޗައިނާ މީހަކު އޭނާގެ ފެންވަރުގައި އެ ހުވަފެން ހަގީގަތަކަށް ހަދައިފި އެވެ.

ލޮނުމެދު ހައްދާ ދަނޑުވެރިއެއް ކަމަށްވާ ޝޫ ޔޫ، އޭނާގެ އަމިއްލަ މަސައްކަތުން އެއާބަސް އޭ320 މަރުކާގެ ބޯޓެއް އަސްލަކަށް ބަލައިގެން ހަމަ އެ ސައިޒަށް ވަނީ ބޯޓެއް ހަދައިފަ އެވެ.

ޝަންހައިސްޓް ނޫހުން ބުނި ގޮތުގައި މީގެ ދެ އަހަރު ކުރިން މަސައްކަތް ފަށައި، މިހާތަނަށް އެ ބޯޓަށް 2.6 މިލިއަން ޔުއާން ވަނީ ހޭދަކޮށްފަ އެވެ. މީޑިއާގައި ބުނެފައިވާ ގޮތުން ޝޫ އަކީ އެންމެ ކުޑައިރު ވެސް މަތިންދާބޯޓަށް ވަރަށް ޝައުގުވެރިކަން ހުންނަ މީހެކެވެ. އަދި އަމިއްލަ ބޯޓެއް ގެންގުޅެން ބޭނުންވެގެން އަބަދުވެސް އުޅެ އެވެ.

ރީއްޗަކަށް ބާއްވާލަން ވިޔަސް، އުމުރުން 40 އަހަރުގައި މިހާރު ޝޫ އަކީ މަތިންދާބޯޓެއް އޮތް މީހެކެވެ.

މި ބޯޓު ހަދާފައި ވަނީ އިންޑަސްޓްރިއަލް ޕާކެއްގައި ހުރި ފެކްޓަރީއެއްގަ އެވެ. މި މޮޑެލް ބޯޓުގެ ދިގުމިނުގައި 124 ފޫޓު އަދި ފުޅާ މިނުގައި 118 ފޫޓު ހުރެ އެވެ. އުސްމިނަކީ 40 ފޫޓެވެ. މި ބޯޓު ހެދުމަށް ޝޫއާ އެކު އޭނާގެ ފަސް އެކުވެރިޔަކު ބައިވެރިވި ކަމަށްވެ އެވެ.

މި ބޯޓުގެ މަސައްކަތް އަދި މުޅިން ނުނިމެ އެވެ. މިއީ އުދުހޭ ބޯޓަކަށް ނުވާތީ ޝޫ ބޭނުންވަނީ މި ބޯޓު ރެސްޓޯރަންޓެއްގެ ގޮތުގައި ބޭނުންކުރާށެވެ.