ދުނިޔޭގެ އެންމެ ދުވަސްވީ ޕެންޑާ މަރުވެއްޖެ

ދުނިޔޭގައި މިހާތަނަށް އެންމެ ގިނަ ދުވަސްވަންދެއް ދިރިހުރި ޕެންޑާ އުމުރުން 35 އަހަރުގައި މަރުވެއްޖެ އެވެ.

ޗައިނާގެ ހޮންގްކޮންގް ތީމް ޕާކުގައި ދިރިއުޅެމުން އައި ޕެންޑާ 'އަން އަން' މަރުވެފީ އުމުރުން ދުވަސްވުމުގެ ސަބަބުންނެވެ. ޕެންޑާގެ އުމުރުން 35 އަހަރުގައި މަރުވުމަކީ އިންސާނެއްގެ އުމުރުން 105 އަހަރުގައި މަރުވުން ފަދަ ކަމެއް ކަމަށް އެ ތީމް ޕާކުން ބުނެ އެވެ.

'އަން އަން' ދިރިއުޅެމުން އައީ އެ ޕާކުގެ އޯޝަން ޕާކް ބައިގަ އެވެ.

އެ ޕާކުން ބުނިގޮތުގައި ފާއިތުވި ހަފުތާތަކުގެ ތެރޭގައި 'އަން އަން' ގެ ސިއްހަތު ވަނީ ވަރަށް ބޮޑަށް ގޯސްވި އެވެ. މީގެ ހަފުތާއެއް ކުރިން ކެއުން މަދުވެފައިވާއިރު ދެ ދުވަހެއް ކުރިން އެއްކޮށް ކެއުން ހުއްޓައިލި އެވެ.

އެއީ އުމުރުން ދުވަސް ވެގެން ހަމަ އެއްވެސް ކަމެއް ނުކުރެވޭ ހިސާބަށް ދިޔުމުން ކަމަށް ޕާކުން ބުންޏެވެ.

'އަން އަން' އަކީ ފިރިހެން ޕެންޑާ އެކެވެ. މީގެ ކުރިން އެންމެ ދުވަސް ވަންދެއް ދުނިޔޭގައި ހުރި ޕެންޑާ އުމުރަކީ 34 އަހަރެވެ. އެއީ ޖިއާ ޖިއާ ނަމަކަށް ކިޔާ އަންހެން ޕެންޑާ އެކެވެ. އިންސާނުންގެ ބެލުމުގެ ދަށުގައި ހުންނަ ޕެންޑާގެ އުމުރަކީ އެވްރެޖްކޮށް 30 އަހަރެވެ.