ޔޫއެފްއެސްގެ ފިހާރައިގައި އަބްސީގެ ޝޯތަކެއް ބާއްވަނީ

ރާއްޖޭގެ ކާބޯތަކެތީގެ ވިޔަފާރީގައި އިސް ދައުރެއް އަދާކުރަމުން އަންނަ ޔުނައިޓެޑް ފުޑް ސަޕްލަޔާސް (ޔޫއެފްއެސް) އިން މާލޭގައި ހިންގާ އެކްސް-ޒޯން ފިހާރައިގައި މަހަކު އެއް ފަހަރު، މަޝްހޫރު ލަވަކިޔުންތެރިޔާ އަބްދުއްރަޝީދު އަލީ (އަބްސީ)ގެ ޝޯއެއް ބާއްވަން ހަމަޖައްސައިފި އެވެ.

ޔޫއެފްއެސްގެ އޮފިޝަލަކު ވިދާޅުވީ، ރާއްޖޭގެ ރިސޯޓް މިޔުޒިކުގައި އެންމެ ގިނަ ދުވަސްވީ އެއް ލަވަކިޔުންތެރިޔާގެ ޝޯއެއް ކުރިއަށް އޮތް ހަ މަސް ދުވަހު، އެކްސް-ޒޯންގައި އޮންނާނެ ކަމަށެވެ. އެގޮތުން ފުރަތަމަ ޝޯ ބާއްވަނީ އަންނަ ހޮނިހިރު ދުވަހުގެ ރޭ 8 އިން 10 އަށެވެ.

މި ޝޯ ކުރިއަށް ދާއިރު ޔޫއެފްއެސް އިން ދާދި ފަހުން ބޭއްވި ޕްރޮމޯޝަނުގެ ގުރު ނެގުން ވެސް އޮންނާނެ އެވެ.

އެކްސް-ޒޯން ހުންނަނީ ސަލާތައި ރެސްޓޯރަންޓް ކައިރީގަ އެވެ.

ޔޫއެފްއެސްގެ އޮފިޝަލް ވިދާޅުވި ގޮތުގައި އެ ކުންފުނިން ރާއްޖެ އެތެރެކުރާ ތަފާތު ބާވަތްތަކުގެ ރަހަ ބެލުމުގެ ފުރުސަތު ވެސް، އަބްސީގެ ޝޯ ކުރިއަށް ދާ އިރު އާންމުންނަށް ލިބޭނެ އެވެ. އަދި ޔޫއެފްއެސްއަށް ހާއްސަކޮށްގެން ރާއްޖޭގައި ރޯސްޓުކޮށް، ތަައްޔާރުކުރާ ކޮފީ ކަމަށް ވާ "އަރަގު" ވެސް ލިބެން ހުންނާނެ ކަމަށް އޭނާ ވިދާޅުވި އެވެ.

"އޭގެ އިތުރުން ސޭންޑްވިޗާއި، ސްމޫތީ، ޕާން އަދި ގިނަ ވައްތަރެއްގެ ސެލެޑް ވެސް މި ޝޯތަކުގައި ލިބެން ހުންނާނެ" ކަމަށް، ޔޫއެފްއެސް އިން ބުނެ އެވެ.

ޔޫއެފްއެފްއެސް 2007 ގައި އުފެއްދި ފަހުން ރާއްޖޭގެ ގިނަ ރިސޯޓްތަކަށާއި އާންމު ބާޒާރަށް ގިނަ އަދަދެއްގެ ކާބޯތަކެތި ވަނީ އެތެރެ ކޮށްފަ އެވެ. އަދި މިއީ ކާބޯތެކީގެ ރައްކާތެރިކަން ގެރެންޓީ ކުރާ އެޗްއޭސީޕީޕީ ސްޓޭޓަސް ލިބުނު ފުރަތަމަ ދިވެހި ކުންފުންޏެވެ.