ހާރިސްގެ މަރުގެ ދައުވާލިބޭ މީހާ ގޭ ބަންދަށް ބަދަލުކޮށްފި

ހުޅުމާލޭގައި މިދިޔަ ސެޕްޓެމްބަރު މަހު މަރާލި ހާރިސް އަބްދުލްޣަފޫރުގެ މަރުގެ ދައުވާލިބޭ މީހާ ކްރިމިނަލް ކޯޓުން އިއްޔެ ގޭ ބަންދަށް ބަދަލުކޮށްފި އެވެ.

ހުޅުމާލޭ ހާފްވޭ ހައުސް ކައިރިން ތޫނު އެއްޗަކުން ހަމަލާދީ ހާރިސް މަރާލި މައްސަލާގައި ދައުލަތުން ދައުވާކުރަނީ ޏ. ފުވައްމުލަކު ހިލްޓަން، ޔާމިން ރަޝީދުގެ މައްޗަށެވެ. އޭނާގެ މައްޗަށް ކުރަނީ ތޫނު އެއްޗެއް ބޭނުންކޮށްގެން ގަސްދުގައި މީހަކު މެރުމުގެ ދައުވާ އެވެ.

ޖަލު ބަންދުގައި ހުރި ޔާމީން ގޭ ބަންދަށް ބަދަލުކުރީ އިއްޔެ ބޭއްވި އެ މައްސަލާގެ އަޑުއެހުމުގައި އޭނާގެ ފަރާތުން އެގޮތަށް އެދުމުންނެވެ. މީގެކުރިން 2015 ގައި ހިންގި މާރާމާރީއެއްގައި ޔާމީންގެ ގޮހޮރަށް ގެއްލުންވެފައިވާ ކަމަށާއި އެކަމުގެ ވޭން އަދިވެސް އޭނާ ތަހައްމަލުކުރާ ކަމަށް އޭނާގެ ފަރާތުން ބުންޏެވެ.

ޔާމީންގެ ބަންދަށް ލުޔެއް ދޭން ދައުލަތުން ދެކޮޅު ހެދި އެވެ. ދައުލަތުން ބުނީ ވަކި ކަހަލަ މާހައުލެއްގައި ދިރިއުޅެން ޔާމީނަށް ޑޮކްޓަރު ލަފާދީފައި ނެތް ކަމަށާއި އަދި އެ މައްސަލައަކީ ގިނަ އަދަދެއްގެ ހެކިން ހިމެނޭ ބޮޑު މައްސަލައަކަށް ވާތީ، އޭނާ ދޫކޮށްލައިފި ނަމަ ހެއްކަށް ނުފޫޒު ފޯރަފާނެ ކަމަށް ދައުލަތުން ބުންޏެވެ.

އެ މައްސަލަ ބައްލަވާ ގާޒީ ހަސަން ނަޖީބް ނިންމެވީ ޝަރީއަތް ނިމެންދެން ޔާމީން ގޭ ބަންދަށް ބަދަލުކުރުމަށެވެ.

ޔާމީނާ ދެކޮޅަށް ދައުލަތުން އޮތީ 17 ސިއްރު ހެކިވެރިންނާއި 13 ކިތާބީ ހެއްކެއް ހުށަހަޅައިފަ އެވެ. އިބްތިދާއީ މަރުހަލާގައި އޮތް އެ މައްސަލާގައި މިހާރު ކުރިއަށް ދަނީ ޝަރީއަތުގެ ކުރީގެ ހުށަހެޅުންތައް ހުށަހެޅުމެވެ.