ފުރަތަމަ ކުއާޓަރުގައި މުދާ ވިކުނު މިންވަރު 56 ޕަސެންޓް އިތުރުވެއްޖެ

ފުރަތަމަ ކުއާޓަރުގައި ހޯސޭލް އަދި ރީޓެއިލް ވިޔަފާރިކުރާ ތަންތަނުން މުދާ ވިކުނު މިންވަރު މިދިޔަ އަހަރުގެ ފަހު ކުއާޓަރާ އަޅާބަލާއިރު 56 ޕަސެންޓް އިތުރުވެއްޖެ އެވެ.

މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ނެރުނު މި އަހަރުގެ ފުރަތަމަ ކުއާޓަރުގެ ބިޒްނަސް ސާވޭގެ ރިޕޯޓުގައި ބުނެފައި ވަނީ ރާއްޖޭގެ އެންމެ ބޮޑެތި 100 ކުންފުނި ހިމަނައިގެން ކުރި ސާވޭގެ ނަތީޖާ ދައްކާ ގޮތުން މުދާ ވިކުނު މިންވަރު 56 ޕަސެންޓް އިތުރުވިއިރު، ސަޕްލަޔަރުންގެ ފަރާތުން ލިބުނު އޯޑަރުގެ މިންވަރު 62 ޕަސެންޓް އިތުރުވެފައިވާ ކަމަށެވެ.

އަހަރުގެ ފުރަތަމަ ކުއާޓަރުގެ ސާވޭ މަރުކަޒީ ބޭންކުން ކޮށްފައި ވަނީ މިދިޔަ އޭޕްރިލް މަހު އެވެ.

އެމްއެމްއޭ އިން ހެދި ސާވޭގައި ބުނެފައި ވަނީ ފުރަތަމަ ކުއާޓަރުގައި ތަކެތި ވިއްކި އަގަށް ބަދަލެއް ނާންނަ ކަމަށް 61 ޕަސެންޓް ތަންތަނުން ބުނެފައިވާ ކަމަށެވެ.

އެ ސާވޭގެ ރިޕޯޓުގައި ބުނެފައި ވަނީ މުދަލުގެ ސްޓޮކްހުރި މިންވަރު ވެސް 62 ޕަސެންޓް އިތުރުވެފައިވާ ކަމަށެވެ. އަދި 66 ޕަސެންޓް ކުންފުނިތަކުން ބުނެފައި ވަނީ އެ މުއްދަތުގެ ތެރޭގައި މުވައްޒަފުންގެ އަދަދު އިތުރުވެފައި ނެތް ކަމަށް ވެސް އެ ރިޕޯޓުގައި ބުނެފައިވެ އެވެ. ނަމަވެސް 28 ޕަސެންޓް ތަންތަނުން މުވައްޒަފުން އިތުރުވި ކަމަށް ބުނެފައި ވެ އެވެ.

އެމްއެމްއޭގެ ރިޕޯޓުގައި ބުނެފައި ވަނީ އެ ސާވޭގެ ނަތީޖާއަށް ބަލާއިރު މިއަހަރުގެ ދެވަނަ ކުއާޓަރުގައި މުދާ ވިއްކޭނެ މިންވަރާއި އޯޑަރު ލިބޭނެ މިންވަރު އަދި މުދަލުގެ ސްޓޮކް ވެސް އިތުރުވާނެ ކަމަށް ލަފާކުރެވޭ ކަމަށް ކުންފުނިތަކުން ބުނެފައިވާ ކަމަށެވެ.

މިއަހަރުގެ ދެވަނަ ކުއާޓަރުގައި ވިޔަފާރިތައް ކުރިއަރާނެ ކަމަށް ލަފާކޮށްފައި ވަނީ، ރޯދަމަހާ ގުޅިގެން އެތެރެކުރި މުދަލާއި ވިއްކޭނެ މުދަލުގެ އަދަދު ވަރަށް ބޮޑަށް އިތުރުވާނެތީ އެވެ.