ތާރީހު އޮތީ ބްރެޒިލް ކޮޅަށް، މެކްސިކޯ ދުލެއް ނުދޭނެ

ސަމާރާ (ޖުލައި 2) - ވޯލްޑް ކަޕް ފުޓްބޯޅަ މުބާރާތުގެ ޗެމްޕިއަންކަން ފަސް ފަހަރަށް ހޯދާފައިވާ ބްރެޒިލަކީ މި ފަހަރުގެ މުބާރާތުގެ ފޭވަރިޓެއްގެ ގޮތުގައި ގިނަ ބަޔަކު ގަބޫލުލުކުރާ ޓީމެވެ. މަޝްހޫރު ގިނަ ޓީމުތައް މުބާރާތުން ކަޓާފައިވާއިރު، މިރޭ މުބާރާތުގެ ދެ ވަނަ ބުރުގައި ބްރެޒިލް ނުކުންނާނީ މެކްސިކޯއާ ދެކޮޅަށެވެ. ތާރީހު އޮތީ ބްރެޒިލް ކޮޅުގަ އެވެ. އެކަމަކު އެންމެ ފަހުގެ ޗެމްޕިއަން ޖަރުމަނު އަތުން މި ފަަހަރު ހައިރާންކުރަނިވި ގޮތަކަށް މޮޅުވި މެކްސިކޯ ވެސް ބްރެޒިލަށް ދުލެއްނުދޭނެ އެވެ.

ވޯލްޑް ކަޕް ފުޓްބޯޅަ މުބާރާތެއްގައި ބްރެޒިލް އެންމެ ފަހުން ޔޫރަޕް ނޫން ޓީމެއްގެ އަތުން ބަލިވީ 1990 ވަނަ އަހަރު އާޖެންޓީނާ އަތުންނެވެ. އަނެއްކޮޅުން ވޯލްޑް ކަޕްގައި މިހާތަނަށް ސެންޓްރަލް އެމެރިކާ އާއި އުތުރު އެމެރިކާ ޓީމެއްގެ އަތުން ބްރެޒިލް ބަލިވެފައިނުވެ އެވެ.

މިރޭގެ މެޗަށް ނުކުންނައިރު ތާރީހަށް ވުރެން ބޮޑަށް ބްރެޒިލްގެ ކޯޗު ޓީޓޭ އަށް އޮތް ހިތްވަރަކީ އޭނާގެ ޓީމުގެ އެންމެ މުހިއްމު ކުޅުންތެރިއާ ނޭމާ އެއްކޮށް ފިޓްވުމެވެ.

"ނޭމާ މިހާރު ހުރީ އޭނާގެ އެންމެ ހައި ލެވެލްގައި. އޭނާ މި ހިސާބަށް އަންނަން ދިރިއުޅުމުގައި ދައްކަން ޖެހުނު އަގު އޭނާ އަށް އިހުސާސް ކުރެވޭ. ބްރެޒިލްގައި 2014 ވަނަ އަހަރު އޮތް ވޯލްޑް ކަޕުގައިވީ ކަންތައްތަކަކީ މާޒީ. ނޭމާ ހުރީ ފުރިހަމަ އަށް ތައްޔާރަށް،" ޓީޓޭ ބުންޏެވެ.

އެންމެ ފަހުން ސާބިއާއާ ދެކޮޅަށް ކުޅުނު މެޗުގައި ލިބުނު އަނިޔާއަކާ ހެދި މި މެޗުގައި ބްރެޒިލްގެ ވާތު ބެކް މާސެލޯ ނުފެންނާނެ އެވެ. އޭނާގެ ބަދަލުގައި ކުޅޭނީ ސާބިއާ މެޗުގައި ކުޅުނު ފިިލިޕޭ ލުއިޒް އެވެ. ޓީޓޭ ބުނީ މާސެލޯ ހުރީ ވަރަށް ބޮޑަށް މި މެޗުގައި ކުޅެން ބޭނުންވެފައި ކަމަށާއި އެކަމަކު ބޮޑު ރިސްކެއް ނަގަން ޖެހޭ ހާލަތެއް މެދުވެރިވެގެން ނޫނީ އަނިޔާގައި ހުރި ކުޅުންތެރިއަކު ބޭނުން ނުކުރާނެ ކަަމަށެވެ.

ބްރެޒިލުން އެންމެ ފަހުން ކުޅުނު ވޯލްޑް ކަޕް ނޮކައުޓް މެޗަކީ 2014 ވަނަ އަހަރުގެ ސެމީ ފައިނަލުގައި ޖަރުމަނު އަތުން 7-1 އިން ބަލިވި މެޗެވެ. އެއީ ބްރެޒިލް ފުޓްބޯޅައިގެ ކަޅު ދުވަހެކެވެ. އަލުން އާ ފެށުމަކުން ފުރަތަމަ ނޮކައުޓް މެޗަކަށް ބްރެޒިލް ނުކުންނައިރު އަނެއް ކޮޅުގައި އޮތީ މެކްސިކޯ އެވެ. މެކްސިކޯ އިން ވަނީ 33 އަހަރަށް ފަހު ޖަރުމަނުގެ މައްޗަށް ފުރަތަމަ ފަހަރަށް ކުރި ހޯދައިފަ އެވެ.

ކޯޗު ޓީޓޭ އަށް އޮތް އަނެއް ހިތްހަމަޖެހުމަކީ އޭނާ ހަވާލުވި ފަހުން ބްރެޒިލް ކުޅުނު 24 މެޗުގެ ތެރެއިން 19 މެޗުން މޮޅުވެފައިވުމެވެ. އަދި އޭގެ ތެރެއިން 18 މެޗުގައި ބައިކޮޅަށް ލަނޑެއް ވަދެފައި ނުވުމަކީ ވެސް ބޮޑު ހިތްހަމަ ޖެހުމެކެވެ.

މެކްސިކޯގެ ކޯޗު ހުއާން ކާލޮސް އޮސޯރިއޯ ބުނީ ޖަރުމަނާ ދެކޮޅަށް ކުޅުނު މެޗުގައި މި މެޗުގައި ވެސް ނުނެރެވޭންވީ ސަބަބެއް ނެތް ކަމަށާއި ކުޅުންތެރިން އެއް ރޫހެއްގައި މަަސައްކަތް ކޮށްފިނަމަ ކާމިޔާބުވާނެ ކަމަށެވެ.

މެކްސިކޯއާ ދެކޮޅަށް ވޯލްޑް ކަޕްގައި އެންމެ ފަހުން ކުޅުނު ހަތަރު މެޗުން ވެސް ބްރެޒިލް ބަލިވެފައިނުވެ އެވެ. އެންމެ ފަހުން 2014 ވަނަ އަހަރުގެ ވޯލްޑް ކަޕްގެ ގްރޫޕް ސްޓޭޖުގައި ކުޅުނު މެޗު ނިމުނީ ލަނޑެއް ނުޖެހި އެއްވަރުވެގެންނެވެ.

ބްރެޒިލާއި މެކްސިކޯ ކުޅޭ މެޗު ފަށާނީ މިރޭ ރާއްޖެ ގަޑިން ހަތެއް ޖަހާއިރު އެވެ.