އާޓިފިޝަލް ސްވީޓްނާ އަކީ ހައްލަކަށް ނުވެދާނެ

ހަކުރު ބަލީގެ މީހުންނާއި ފަލަވެދާނެތީ އުޅޭ މީހުން އާޓިފިޝަލް ސްވީޓްނާ ބޭނުން ކުރުމަކީ ވަރަށް އާންމު ކަމެކެވެ. އެއީ ހަކުރުން ދިމާވާ މައްސަލަތަކުން ރައްކާތެރިކޮށްދޭ ކަމަށް ބަލައިފަ އެވެ.

އެކަމަކު ބައެއް ދިރާސާތަކުގައި ބުނަނީ އާޓިފިޝަލް ސްވީޓްނާ އަށް މާބޮޑަށް އިތުބާރު ނުކުރުމަށެވެ.

އެމެރިކާގެ ކެލިފޯނިއާގެ ސެން ޑިއެގޯގައި މިހާރު ކުރިއަށްދާ އެމެރިކަން ސައިކޮލޮޖިކަލް ސޮސައިޓީގެ އަހަރީ ބައްދަލުވުމުގެ އެކްސްޕެރިމަންޓަލް ބައޮލޮޖީ މީޓީން އަށް ވަނީ އާޓިފިޝަލް ސްވީޓްނާއާ ބެހޭ ދިރާސާ ކަރުދާހެއް ހުށަހަޅައިފަ އެވެ.

އޭގައި ފާހަގަކޮށްފައިވާ ގޮތުން އާޓިފިޝަލް ސްވީޓްނާ އިން ފޮނިކަން ގެނެސް ދިނަސް އެއީ ހަކުރު ބައްޔާއި ފަލަވުން ފަދަ މައްސަލަތަކަށް ހައްލެއްގެ ގޮތުގައި މުޅިން ޔަގީންކޮށްގެން ނުވާނެ އެވެ. އެ ބޭނުން ކުރާ ނަމަ ހަކުރު ބަލީގެ ބިރު އޮތުމާ އެކު، ފަލަވުމުގެ ބިރު ވެސް އޮތް ކަމަށް ދިރާސާގައި ބުނެފައިވެ އެވެ. އަދި މިކަމާ ބެހޭ އިތުރު ދިރާސާތައް ކުރުން މުހިންމު ކަމަށް ވެސް ބުނެފައިވެ އެވެ.

މި ދިރާސާ ކަރުދާހާ ބެހޭ ގޮތުން މި މަހުގެ 25 އާ ހަމައަށް މަޝްވަރާކުރަން ހަމަޖެހިފައިވާ އިރު، ދިރާސާ ޓީމްގައި ހިމެނޭ ބްޔަރަމް ހޮފްމަން ވިދާޅުވި ގޮތުގައި އާދައިގެ ހަކުރުން، އާޓިފިޝަލް ސްވީޓްނާ އަށް ހިޖުރަ ކުރުމަކީ ވިސްނަންޖެހޭ ކަމެކެވެ.

"އަހަރެމެންނަށް ނަން-ކެލޮރިކް އާޓިފިޝަލް ސްވީޓްއާ ދޭތެރޭ އޮތް ޝައްކަކީ އެއަކީ ވެސް މުޅިއަކުން ސިއްހަތަށް ރައްކާތެރި އެއްޗެއް ނޫންކަން. އެ ބޭނުންކުރާ ނަމަ ހަމަ އާދައިގެ ހަކުރެކޭ އެއްގޮތަށް ހަކުރު ބައްޔާއި ފަލަވުމުގެ ބިރު އެބަ އޮތް،" އޭނާ ވިދާޅުވި އެވެ. "އެހެންވެ މިއީ އިތުރަށް ބަލަން ޖެހޭ ކަމެއް."