މިއަންމާގެ ދެ ނޫސްވެރިންގެ މައްސަލަ ކުރިއަށް ގެންދަން ކޯޓުން ނިންމައިފި

ނޭޕީޑޯ (އެޕްރީލް 12) - ރަކީން ސްޓޭޓުގައި މިއަންމާ ސިފައިން ހިންގި ގަތުލް އާއްމު ރިޕޯޓްކުރި ރޮއިޓާސްގެ ދެ ނޫސްވެރިންގެ މައްސަލަ ދޫކޮށްލަން އެ ގައުމުގެ ކޯޓަކުން ދެކޮޅު ހަދައިފި އެވެ.

މިއަންމާގެ ދެ ނޫސްވެރިން ކަމަށްވާ ވަ ލޯން، 32، އާއި ކިޔޯ ސޮއެ އޫ، 27، ހައްޔަރު ކުރީ މިދިޔަ ޑިސެމްބަރު މަހު އެވެ. އެ މީހުން ކުށްވެރިކޮށްފައި ވަނީ ރަކީން ސްޓޭޓުގައި މިއަންމާ ސިފައިން ހިންގި ޖަރީމާގެ މައްޗަށް ތަހުގީގީ ރިޕޯޓެއް ތައްޔާރުކުރުމުންނެވެ. އެ މީހުންގެ މައްޗަށް ދައުވާ ކުރަނީ އޮފިޝަލް ސީކްރެޓް އެކްޓުގެ ދަށުންނެވެ. ދެ ނޫސްވެރިންގެ މައްޗަށް ކުށް ސާބިތުވެއްޖެ ނަމަ 14 އަހަރަށް ޖަލަށްލާނެ އެވެ.

ދެ ނޫސްވެރިން ރިޕޯޓްކުރީ ރަކީންގައި މިއަންމާ ސިފައިން މުސްލިމުންނާ ދެކޮޅަށް ހިންގި ގަތުލްއާއްމެއްގެ މައްސަލަ އެވެ. އެ ގަތުލްއާއްމުގައި ބައިވެރިވި މިއަންމާ ސިފައިންގެ ހަތް މީހުންގެ މައްޗަށް އެ ގައުމުން އިއްޔެ ވަނީ ބުރަ މަސައްކަތާ އެކު 10 އަހަރުގެ ޖަލު ހުކުމެއް އިއްވައިފަ އެވެ.

ދެ ނޫސްވެރިންގެ ވަކީލުން މިދިޔަ ހަފުތާގައި ވަނީ މައްސަލަ ދޫކޮށްލުމަށް ގޮވާލައިފަ އެވެ. ވަކީލުންގެ ޓީމުގައި ވަނީ މަޝްހޫރު ވަކީލް އަމާލް ކްލޫނީ ވެސް ބައިވެރިވެފަ އެވެ. އަމާލް ވިދާޅުވީ މިއަންމާގައި ބަންދުކޮށްފައި ތިބި ލަ ލޯން އާއި ކިޔައޯ ސޮއެ ސޫ އަކީ ކުށެއް ނެތް ބައެއްކަން ޝައްކެއް ނެތް މިންވަރަށް ޔަގީން ކުރެވޭ ކަމަށެވެ.

މިއަންމާގައި ހުންނަ އެމެރިކާ އެމްބަސީން ނެރުނު ބަޔާނެއްގައި ބުނީ ދެ ނޫސްވެރިން ރިޕޯޓްކުރި މައްސަލާގައި ސިފައިން ކުށްވެރިވާ ކަމަށް ހުކުމް އިއްވުމުން ދެ ނޫސްވެރިން ދޫކޮށްލަން ޖެހޭނެ ކަމަށެވެ. ރޮއިޓާސްގެ ރައީސް ސްޓެފަން ޖޭ. އެޑްލާ ވިދާޅުވީ ކޯޓުގެ ނިންމުމުގެ ސަބަބުން މާޔޫސްވެއްޖެ ކަމަށެވެ.