ރާއްޖޭގައި ބައިނަލްއަގްވާމީ ގުރުއާން މުބާރާތެއް ބާއްވަނީ

ރާއްޖޭގައި ބާއްވާ ބައިނަލްއަގްވާމީ ފުރަތަމަ ގުރުއާން މުބާރާތް އަންނަ މަހު ބާއްވަން ސަރުކާރުން ނިންމައިފި އެވެ.

އިސްލާމިކް އެފެއާޒް މިނިސްޓްރީން މިއަދު ބޭއްވި ނޫސްވެރިންގެ ބައްދަލުވުމެއްގައި، މިނިސްޓަރު ޑރ. އަހުމަދު ޒިޔާދު ވިދާޅުވީ "ނޫރުލް މުބީން" ނަމުގައި ބާއްވާ ގުރުއާން މުބާރާތް އޮންނާނީ އަންނަ މަހުގެ 13 އިން 15 ވަނަ ދުވަހުގެ ނިޔަލަށް ކަމަށެވެ. މުބާރާތުގެ ނަތީޖާ ފާޅުކުރާނީ އަންނަ މަހުގެ 17 ވަނަ ދުވަހުގެ ރެ އެވެ.

ރާއްޖެ ހިމަނައިގެން 11 ގައުމަކުން މި މުބާރާތުގައި ބައިވެރިވާނެ ކަމަށް ލަފާ ކުރެވޭ އިރު، ކޮންމެ ގައުމަކުން ވެސް ބައިވެރި ކުރާނީ އެންމެ މީހެކެވެ.

މިނިސްޓަރު ވިދާޅުވި ގޮތުގައި، ރާއްޖޭގެ ފަރާތުން މުބާރާތުގައި ބައިވެރިވާނެ މީހެއް ކަނޑައަޅަން، އަންނަ މަހުގެ ފުރަތަމަ ދުވަހު އޮޑިޝަނެއް ބާއްވާނެ އެވެ. މުބާރާތުގެ ފަނޑިޔާރުންގެ ގޮތުގައި މަސައްކަތް ކުރާނީ ރާއްޖެ އާއި ބޭރުގެ ގާރީން ކަމަށް ޒިޔާދު ވިދާޅުވި އެވެ.

ރައީސް އަބްދުﷲ ޔާމީންގެ އިސް ނެންގެވުމަކަށް ބާއްވާ މި މުބާރާތުް އިންތިޒާމް ކުރަނީ އިސްލާމިކް މިނިސްޓްރީގެ އިތުރުން ކީރިތި ގުރުއާނާ ބެހޭ މަަރުކަޒާއި ޕަބްލިކް ސާވިސް މީޑިއާ (ޕީއެސްއެމް) ގުޅިގެންނެވެ.

ކީރިތި ގުރުއާނާ ބެހޭ މަރުކަޒުގެ ރައީސް އިބްރާހީމް ރަޝީދު މޫސާ ވިދާޅުވީ، އެހެން ގައުމުތަކުގައި ބާއްވާ ގުރުއާން މުބާރާތްތަކުގައި ވެސް ދިވެހިން ބައިވެރިވެ ރަނގަޅު ކާމިޔާބީތަކެއް ހޯދާފައިވާ ކަމަށެވެ. އެހެންވެ، ރާއްޖޭގައި ބާއްވާ ގުރުއާން މުބާރާތުން ވެސް ރާއްޖެ އަށް ރަނގަޅު ވަނައެއް ލިބޭނެ ކަމަށް ވިދާޅުވި އެވެ.

ޕީއެސްއެމްގެ ޑެޕިއުޓީ މެނޭޖިން ޑިރެކްޓަރު މުހައްމަދު އިކްރާމް ވިދާޅުވީ ބައިނަލްއަގްވާމީ ގުރުއާން މުބާރާތުގެ 1 ވަނަ އަށް 30،000 ޑޮލަރު (462،000ރ.)ގެ ފައިސާގެ އިނާމު ސަރުކާރުން ހުށަހަޅާފައިވާ އިރު ދެ ވަނަ އަށް 15،000 ޑޮލަރު (21،300ރ.)ގެ އިނާމެއް ހުށަހަޅާފައިވާ ކަމަށެވެ.

މުބާރާތުގެ ހުރިހާ ބައިވެރިންނަށް ވެސް ރައީސްގެ ހާއްސަ އިނާމު ލިބޭނެ ކަމަށް އިކްރާމް ވިދާޅުވި އެވެ.