ފެނަކަ ހިންގުން ވަގުތީގޮތުން ހަލީމަށް

ކަރަންޓް ކުންފުނި، ފެނަކަ ކޯޕަރޭޝަން ވަގުތީ ގޮތުން ހިންގެވުން އެމްޕީއެލްގެ ސީއީއޯ އަބްދުއްރައްޒާގް ހަލީމާ ހަވާލުކުރަން ފެނަކަ ކޯޕަރޭޝަންގެ ބޯޑުން ނިންމައިފި އެވެ.

ފެނަކަ ކޯޕަރޭޝަންގެ މެނޭޖިން ޑިރެކްޓަރުގެ މަގާމުގައި ހުންނެވި އަހުމަދު ޝަރީފް އިލެކްޝަން ކޮމިޝަންގެ މެމްބަރު ކަމަށް މިއަދު ވަނީ އައްޔަން ކުރައްވާފަ އެވެ. ޝަރީފަކީ މިހާރު އިލެކްޝަން ކޮމިޝަންގެ ރައީސެވެ.

ފެނަކަ ޑިރެކްޓަރުންގެ ބޯޑުން މިއަދު ނިންމާފައިވަނީ އެ ކުންފުނީގެ މެނޭޖިން ޑިރެކްޓަރަށް ބޭފުޅަކު އައްޔަން ކުރަންދެން އެ ކުންފުނި ހިންގަވާނީ އެމްޕީއެލް ސީއީއޯ ހަލީމް ކަމަށެވެ.

އެމްޕީއެލްގެ ސީއީއޯގެ މަގާމާ މިދިޔަ އަހަރުގެ މާޗް މަހު ހަލީމް ހަވާލުވެވަޑައިގެންފައިވާއިރު، އޭނާ ވަނީ އޭގެ ކުރިން އެމްޓީސީސީގެ ސީއީއޯގެ މަގާމާއި އެމްއާރުޑީސީގެ މެނޭޖިން ޑިރެކްޓަރުކަން ވެސް ކުރައްވައިފަ އެވެ.