މުސާރަ މައްސަލާގައި ސްކޫލްތަކުގެ އިދާރީ މުވައްޒަފުން އިހުތިޖާޖުކޮށްފި

މުސާރައަށް އައި ކުރިއެރުން ކުޑަވުމާއި މުސާރަ ދިނުމުގައި ގިނަ މައްސަލަތަކެއް ހުރި ކަމަށް ބުނެ ސްކޫލުތަކުގެ އިދާރީ ބައެއް މުވައްޒަފުން މިއަދު އިހްތިޖާޖް ކުރަން ފަށައިފި އެވެ.

މުސާރައިގެ މައްސަލައިގައި ހިތްހަމަނުޖެހުން ފާޅުކުރުމުގެ ގޮތުން، ރާއްޖޭގެ ގިނަ ސްކޫލުތަކުގެ އިދާރީ މުވައްޒަފުން މިއަދު ވަޒީފާއަށް ނިކުތީ ކަޅު ހެދުމުގަ އެވެ. އެގޮތުން އެކި ސްކޫލުތަކުން 230 މުވައްޒަފުން މި އިހްތިޖާޖްގައި ބައިވެރިވެފައިވާ ކަމަށް އެކަން އިންތިޒާމްކުރި ފަރާތުން ބުނެ އެވެ.

އިހްތިޖާޖްގައި އިސްކޮށް އުޅޭ މަހާޒް ތައުފީގް ބުނީ "އެޑްމިން ބްލެކް ޑޭ"ގެ ނަމުގައި އިހްތިޖާޖް ކުރަން ނިންމީ، މުސާރަ ބޮޑުކޮށްދޭނެ ކަމަށް މީގެ ތިން އަހަރު ކުރިން އެޑިއުކޭޝަން މިނިސްޓްރީން ވީ ވައުދު ފުއްދާފައި ނުވާތީ އާއި މި ފަހުން ސިވިލް ސާވެންޓުންގެ މުސާރަ ބޮޑު ކުރިއިރު އެކަށީގެންވާ މިންވަރުގެ ކުރިއެރުމެއް ލިބިފައި ނުވާތީ ކަމަށެވެ. އަދި ތައުލީމީ ފެންވަރަށް ބަލައި މުވައްޒަފުންނަށް ކޮލިފިކޭޝަން އެލަވަންސް ނުދިނުމާއި އެހެން އޮފީސްތަކުގެ އިދާރީ މުވައްޒަފުންނާ ސްކޫލުތަކުގެ އިދާރީ މުވައްޒަފުންގެ މުސާރާގައި ތަފާތު ހުރި ކަމަށް ވެސް އޭނާ ބުންޏެވެ.

ސްކޫލެއްގެ އިދާރީ ވަޒީފާއެއްގައި މިހާތަނަށް ފަސް އަހަރު ހޭދަކޮށްފައިވާ މަހާޒް ބުނިގޮތުގައި ސްކޫލްތަކުގެ އިދާރީ މުވައްޒަފުންގެ ބޭސިކް މުސާރައަކީ 4،465 ރުފިޔާ އެވެ. އެލަވަންސްގެ ގޮތުގައި 1،500 ރުފިޔާ ލިބޭއިރު އިތުރު ވަގުތުގެ ފައިސާ ލިބެނީ މުސާރައިގެ ދިހަ ޕަސެންޓްއާ ހަމައަށް ކަމަށް ވެސް ބުންޏެވެ.

މިއަށް ވުރެ ސަރުކާރުގެ އެހެން އޮފީސްތަކުގެ އިދާރީ މުވައްޒަފުންގެ މުސާރަ ބޮޑު ކަމަށްވެ އެވެ.

މިދިޔަ މަހު ސިވިލް ސާވެންޓުންގެ މުސާރަ ބޮޑުކުރި އިރު، އިދާރީ މުވައްޒަފުން ހިމެނެނީ ޖީއެސް ތިނެއްގެ ކެޓަގަރީގަ އެވެ. އޭގެ ދަށުން، އެ މުވައްޒަފުންނަށް 700ރ.ގެ އާ އެލަވަންސެއް ލިބެ އެވެ.

އިދާރީ މުވައްޒަފުންގެ ގޮތުގައި ފަސް ވަރަކަށް އަހަރު މަސައްކަތްކޮށްފައިވާ މަހާޒް ބުނީ މުވައްޒަފުންނަށް އަންގާފައި އޮތީ މުސާރައިގެ 20 ޕަސެންޓް ބޮޑުވާނެ ކަމަށެވެ. އެކަމަކު ބޮޑުވީ އެންމެ 12 ޕަސެންޓް ކަމަށް އެ މީހުން ބުނެ އެވެ.

"އިތުރު ގަޑީގެ ގޮތުގައި އަޅުގަނޑުމެންނަށް މި ލިބެނީ ބޭސިކް މުސާރައިގެ 10 ޕަސެންޓް. އެހެންވެ، އިތުރު އެލަވަންސެއް ނުދީ ބޭސިކް މުސާރައިން 12 ޕަސެންޓް ބޮޑުކުރި ނަމަވެސް، އަޅުގަނޑުމެންނަށް އިތުރު ގަޑީގެ ގޮތުގައި ލިބޭ ފައިސާ އިތުރު ވީސް،" މަހާޒް ބުންޏެވެ.

އޭނާ ބުނީ ސްކޫލްތަކުގެ އިދާރީ މުވައްޒަފުން ބަންދު ދުވަސްތަކާ އެކު ގިނަ ވަގުތުތަކެއް މަސައްކަތުގައި ހޭދަކުރާ ކަމަށެވެ. އެކަމަކު އެ މީހުންނަށް އެހާ ކުޑަ މުސާރައެއް ދިނުމަކީ ހިތާމަކުރާ ކަމެއް ކަމަށް ބުންޏެވެ. އެންމެ ބޮޑު އެއް މައްސަލައަކީ، ސްކޫލުގައި އުޅެފައި އެހެން މަސައްކަތެއް ކުރާނެ ވަގުތު ގިނަ މުވައްޒަފުންނަށް ނުލިބުމެވެ.

"އެހެންވެ، އަޅުގަނޑުމެންގެ މަގްސަދަކަށް ވީ މި ކަންކަން ކަމާ ބެހޭ ފަރާތްތަކުގެ ސަމާލުކަމަށް ގެނައުން،" މަފާޒު ބުންޏެވެ.